ចុះបង្ក្រាបកន្លែងបោកប្រាស់អនឡាញក្នុងបុរីប៉េងហួត ឃាត់ខ្លួនជនបរទេស៩នាក់ ដកហូតឧបករណ៍ជាច្រើន

(ភ្នំពេញ)៖ កម្លាំងចម្រុះនៃគណៈបញ្ជាការឯកភាពរដ្ឋបាលរាជធានីភ្នំពេញ កាលពីថ្ងៃទី១៨ ខែមីនា ឆ្នាំ២០២៦ បានបើកប្រតិបត្តិការចុះបង្ក្រាបទីតាំងសង្ស័យពាក់ព័ន្ធនឹងការប្រព្រឹត្តបទល្មើសអនឡាញខុសច្បាប់មួយកន្លែង ស្ថិតនៅផ្ទះលេខ១ ផ្លូវ M០៩ ក្នុងបុរីប៉េងហួត ភូមិបឹងឈូក សង្កាត់និរោធ ខណ្ឌច្បារអំពៅ។

ក្នុងប្រតិបត្តិការនេះ សមត្ថកិច្ចបានឃាត់ខ្លួនជនបរទេសសរុបចំនួន៩នាក់ ក្នុងនោះរួមមាន ជនជាតិចិន ៨នាក់ និងជនជាតិម៉ាឡេស៊ី ១នាក់ ខណៈដែលមន្ត្រីជំនាញក៏បានដកហូតវត្ថុតាងបច្ចេកទេសជាច្រើន ដូចជា ទូរសព្ទដៃចំនួន ២៤៧គ្រឿង កុំព្យូទ័រ All in One ចំនួន ០៨គ្រឿង ធុង CPU ចំនួន ០២គ្រឿង និងម៉ូនីទ័រ ចំនួន ០២គ្រឿង។

ប្រតិបត្តិការបង្ក្រាបនេះ ធ្វើឡើងក្រោមការបញ្ជាដឹកនាំដោយលោក ឃួង ស្រេង អភិបាលរាជធានីភ្នំពេញ និងមានការចូលរួមពីអាជ្ញាធរខណ្ឌច្បារអំពៅ ដោយមានការសម្របសម្រួលនីតិវិធីច្បាប់ពីលោកស្រី ភី ស៊ីថង ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ។

តាមការសន្និដ្ឋានរបស់សមត្ថកិច្ច ទីតាំងខាងលើគឺជាមូលដ្ឋានប្រតិបត្តិការល្បែងស៊ីសងអនឡាញ ដែលមានគោលដៅបោកបញ្ឆោតជនរងគ្រោះនៅក្រៅប្រទេស រួមមាន ប្រទេសម៉ាឡេស៊ី សិង្ហបុរី និងប្រទេសចិន។

បច្ចុប្បន្ន ជនសង្ស័យ និងវត្ថុតាងទាំងអស់ ត្រូវបានប្រគល់ជូនសមត្ថកិច្ចជំនាញនៃស្នងការដ្ឋាននគរបាលរាជធានីភ្នំពេញ ដើម្បីបន្តអនុវត្តតាមនីតិវិធីច្បាប់ និងស្រាវជ្រាវបន្ថែម ក្នុងគោលបំណងកំណត់មុខសញ្ញាមេខ្លោងពាក់ព័ន្ធជាបន្តទៀត។

គួរបញ្ជាក់ថា សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានប្ដេជ្ញាចិត្តយ៉ាងម៉ឺងម៉ាត់ ក្នុងការបោសសម្អាតបទល្មើសឆបោកតាមប្រព័ន្ធបច្ចេកវិទ្យា ឲ្យអស់ពីកម្ពុជា នៅត្រឹមខែមេសា ឆ្នាំ២០២៦។ សម្ដេចបានបញ្ជាក់យ៉ាងច្បាស់ថា កម្ពុជាមិនមែនជាទីជម្រកសម្រាប់ឧក្រិដ្ឋជនបច្ចេកវិទ្យា ឬសកម្មភាពឆបោកឆ្លងដែនឡើយ ហើយបុគ្គល ឬក្រុមណាដែលពាក់ព័ន្ធ នឹងត្រូវប្រឈមមុខនឹងទោសទណ្ឌខ្ពស់បំផុត ដោយគ្មានការយោគយល់ ឬការអន្តរាគមន៍ណាមួយឡើយ៕