កម្ពុជាកំពុងបង្កើនការនាំចូលប្រេងពីសិង្ហបុរី-ម៉ាឡេស៊ី ខណៈពិភពលោករងផលប៉ះពាល់ការផ្គត់ផ្គង់!

(ភ្នំពេញ)៖ ឯកឧត្ដម កែវ រតនៈ រដ្ឋមន្ត្រីក្រសួងរ៉ែ និងថាមពល បានបញ្ជាក់ថា កម្ពុជាកំពុងបង្កើនការនាំចូលប្រេងឥន្ធនៈបន្ថែមពីសិង្ហបុរី និងម៉ាឡេស៊ី ដើម្បីបំពេញការខ្វះខាតនៃការផ្គត់ផ្គង់ពីវៀតណាម និងចិន ខណៈស្ថានភាពតានតឹងអន្តរជាតិ កំពុងបង្កការរំខានដល់ខ្សែសង្វាក់ផ្គត់ផ្គង់ប្រេងឥន្ធនៈនៅទូទាំងពិភពលោក។

ក្នុងកិច្ចសម្ភាសន៍ជាមួយអ្នកសារព័ត៌មាន ឯកឧត្តមបានឲ្យដឹងថា ប្រហែលមួយភាគបីនៃស្ថានីយប្រេងឥន្ធនៈនៅកម្ពុជា ក្នុងចំណោមប្រមាណ ៦,៣០០ទីតាំង ដែលបម្រើប្រជាជនជិត១៨លាននាក់ បានបិទទ្វារជាបណ្ដោះអាសន្នចាប់តាំងពីសប្តាហ៍មុន។ អាជ្ញាធរកំពុងបើកការស៊ើបអង្កេត ដើម្បីពិនិត្យថា តើមានការស្តុកទុកប្រេងក្នុងគោលបំណងរង់ចាំតម្លៃឡើងខ្ពស់បន្ថែមឬយ៉ាងណា។

ឯកឧត្តមបន្ថែមថា ការកើនឡើងនៃការនាំចូលនេះ កើតឡើងស្របពេលដែលវៀតណាម និងចិន បានអនុវត្តវិធានការរឹតត្បិតការនាំចេញប្រេងឥន្ធនៈ រហូតដល់យ៉ាងហោចណាស់ចុងខែមីនា ដើម្បីធានាសុវត្ថិភាពផ្គត់ផ្គង់ក្នុងស្រុករបស់ពួកគេ។ ដោយហេតុនេះ កម្ពុជាបានបង្វែរយុទ្ធសាស្ត្រទៅរកប្រភពផ្គត់ផ្គង់ថ្មីៗ ដូចជា សិង្ហបុរី និងម៉ាឡេស៊ី។

យ៉ាងណាមិញ កម្ពុជានៅតែអាចនាំចូលប្រេងឥន្ធនៈមួយចំនួនពីចិន ប៉ុន្តែការរឹតត្បិតនានា បានធ្វើឲ្យបរិមាណនាំចូលមានកម្រិត។ ទោះជាយ៉ាងណា ដោយសារតែមានភាពជាដៃគូជាមួយក្រុមហ៊ុនអន្តរជាតិដូចជា TotalEnergies និង Chevron កម្ពុជាអាចបន្តរក្សាស្ថិរភាពផ្គត់ផ្គង់ និងកាត់បន្ថយហានិភ័យបានមួយផ្នែក។

ឯកឧត្តមក៏បានបញ្ជាក់ថា ស្ថានភាពស្តុកប្រេងឥន្ធនៈបច្ចុប្បន្ន នៅតែស្ថិតក្នុងកម្រិតដែលអាចគ្រប់គ្រងបាន និងប្រៀបធៀបបាននឹងកម្រិតប្រវត្តិសាស្ត្រ។

គួរឱ្យកត់សម្គាល់ថា ក្នុងរយៈពេល ១៨ថ្ងៃដំបូងនៃខែមីនា ឆ្នាំ២០២៦ ការនាំចេញប្រេងសាំង និងប្រេងម៉ាស៊ូតពីប្រទេសដៃគូ មកកាន់កម្ពុជា បានកើនឡើងលើស ២៥ភាគរយ បើធៀបនឹងរយៈពេលដូចគ្នាកាលពីឆ្នាំមុន ដែលបង្ហាញពីការឆ្លើយតបយ៉ាងសកម្មរបស់កម្ពុជា ចំពោះបញ្ហាផ្គត់ផ្គង់នៅលើទីផ្សារពិភពលោក៕