អគ្គិភ័យឆាបឆេះយប់មិញនៅទួលគោក ខូចខាតផ្ទះច្រើនបន្ទប់ សមត្ថកិច្ចកំពុងស្រាវជ្រាវមូលហេតុ

(ភ្នំពេញ)៖ នៅវេលាម៉ោង២០:៤០នាទីយប់ ថ្ងៃទី១៨ ខែមីនា ឆ្នាំ២០២៦ មានករណីអគ្គិភ័យឆាបឆេះមួយកន្លែង ស្ថិតនៅតាមបណ្ដោយផ្លូវរថភ្លើង ភូមិ៩ សង្កាត់បឹងកក់ទី២ ខណ្ឌទួលគោក បង្កឱ្យមានការភ្ញាក់ផ្អើលដល់ប្រជាពលរដ្ឋនៅក្បែរតំបន់នោះយ៉ាងខ្លាំង។

តាមប្រភពព័ត៌មានពីសមត្ថកិច្ចបានឱ្យដឹងថា អគ្គិភ័យនេះបានឆេះខូចខាតបន្ទប់ឈើប្រក់ស័ង្កសីចំនួន៥បន្ទប់ ហើយបានឆេះរាលដាលបន្តទៅផ្ទះឈើលើថ្មក្រោមចំនួន១ខ្នង និងផ្ទះថ្ម ១ជាន់ ស្មើនឹង ៣បន្ទប់ បណ្តាលឱ្យខូចខាតទ្រព្យសម្បត្តិមួយចំនួន។ ចំពោះមូលហេតុនៃអគ្គិភ័យ សមត្ថកិច្ចជំនាញកំពុងបន្តស្រាវជ្រាវយ៉ាងម៉ត់ចត់។

ដោយការខិតខំប្រឹងប្រែងយ៉ាងសកម្មពីកម្លាំងជំនាញ នៅវេលាម៉ោង២១:៤០នាទីយប់ ថ្ងៃខែឆ្នាំដដែល អគ្គិភ័យត្រូវបានគ្រប់គ្រង និងពន្លត់បានទាំងស្រុង ដោយប្រើប្រាស់រថយន្តពន្លត់អគ្គិភ័យរបស់ការិយាល័យអគ្គិភ័យរាជធានីភ្នំពេញចំនួន ១៧គ្រឿង ប្រើប្រាស់ទឹកអស់ចំនួន ៣៤ឡាន ស្មើនឹង ១៣៦ម៉ែត្រគូប។

ក្រៅពីនេះ ក៏មានរថយន្តជំនួយពីក្រសួងមហាផ្ទៃចំនួន ០២គ្រឿង (មិនបានប្រើប្រាស់ទឹក) និងរថយន្តអគ្គិភ័យរបស់ក្រុមហ៊ុនស្រាបៀរកម្ពុជាចំនួន ១គ្រឿង ដែលបានប្រើប្រាស់ទឹកអស់ ១ឡាន ស្មើនឹង ៦ម៉ែត្រគូប ដើម្បីចូលរួមគ្រប់គ្រងស្ថានការណ៍ផងដែរ។

សមត្ថកិច្ចបានអំពាវនាវដល់ប្រជាពលរដ្ឋឱ្យមានការប្រុងប្រយ័ត្នខ្ពស់ ចំពោះការប្រើប្រាស់ភ្លើង និងឧបករណ៍ដែលអាចបង្កអគ្គិភ័យ ជាពិសេសនៅពេលយប់ ដើម្បីចៀសវាងហានិភ័យដែលអាចបណ្តាលឱ្យខូចខាតទ្រព្យសម្បត្តិ និងគ្រោះថ្នាក់ដល់អាយុជីវិត៕