កម្ពុជា–នូវែលហ្សេឡង់ពង្រីកពាណិជ្ជកម្ម! ផលិតផលខ្មែរចូលទីផ្សារអន្តរជាតិ កាន់តែទូលំទូលាយ

(នូវែលហ្សេឡង់)៖ នៅថ្ងៃទី១៨ ខែមីនា ឆ្នាំ២០២៦នេះ ឯកឧត្ដម​បណ្ឌិត កៅ ថាច ប្រតិភូរាជរដ្ឋាភិបាល និងជាអគ្គនាយក ធនាគារអភិវឌ្ឍន៍ជនបទ និងកសិកម្ម រួមជាមួយសហការី បានអញ្ជើញជួបពិភាក្សាការងារជាមួយ Erik Ly ប្រធានក្រុមហ៊ុន Ecly Ltd នៅទីក្រុង អូក្លិន ដើម្បីជំរុញកិច្ចសហប្រតិបត្តិការពាណិជ្ជកម្ម និងពង្រីកទីផ្សារផលិតផលខ្មែរ។

ក្នុងជំនួបនេះ ក៏មានការចូលរួមពីលោក ឃួយ ម៉ៃខល ប្រធានការិយាល័យតំណាង សភាពាណិជ្ជកម្មកម្ពុជា ប្រចាំនូវែលហ្សេឡង់ និងតំណាង សហព័ន្ធស្រូវអង្ករកម្ពុជា ផងដែរ ដែលបង្ហាញពីការចូលរួមយ៉ាងសកម្មរបស់ភាគីពាក់ព័ន្ធក្នុងការជំរុញនាំចេញផលិតផលជាតិ។

ជាក់ស្តែង ក្រុមហ៊ុន Ecly Ltd ដែលមានឃ្លាំងស្តុកទំនិញ និងបណ្តាញចែកចាយរឹងមាំបាននិងកំពុងនាំចូលផលិតផលសក្តានុពលពីកម្ពុជា ដូចជា «អង្ករខ្មែរ និង Hanuman Beer ចូលទៅកាន់ទីផ្សារនូវែលហ្សេឡង់ ដែលកំពុងទទួលបានការចាប់អារម្មណ៍កើនឡើងជាបន្តបន្ទាប់»។

ភាគីទាំងពីរ ក៏បានពិភាក្សាលម្អិតអំពីយុទ្ធសាស្ត្រពង្រីកការនាំចេញផលិតផលកសិកម្មផ្សេងៗទៀតពីកម្ពុជា ដើម្បីឆ្លើយតបទៅនឹងតម្រូវការទីផ្សារ និងលើកកម្ពស់វត្តមានទំនិញខ្មែរឱ្យកាន់តែទូលំទូលាយនៅលើឆាកអន្តរជាតិ។

ឯកឧត្តមបណ្ឌិត កៅ ថាច បានថ្លែងអំណរគុណ និងកោតសរសើរយ៉ាងខ្ពស់ចំពោះលោក Erik Ly ដែលបានដើរតួនាទីសំខាន់ជាស្ពានសេដ្ឋកិច្ច ក្នុងការភ្ជាប់ផលិតផលខ្មែរទៅកាន់ទីផ្សារអន្តរជាតិ តាមរយៈហេដ្ឋារចនាសម្ព័ន្ធឃ្លាំង និងបទពិសោធន៍ចែកចាយយ៉ាងវិជ្ជាជីវៈ។

ជំនួបនេះ ត្រូវបានគេចាត់ទុកថា ជាជំហានសំខាន់មួយក្នុងការពង្រឹងទំនាក់ទំនងសេដ្ឋកិច្ច និងពាណិជ្ជកម្មរវាងកម្ពុជា និងនូវែលហ្សេឡង់ ខណៈផលិតផលខ្មែរកំពុងឈានទៅរកទីផ្សារអន្តរជាតិកាន់តែរឹងមាំ និងមានសក្ដានុពលខ្ពស់៕