ករណីផ្ទុះអាវុធនៅស្រុកស្វាយទាប មិនមែនបាញ់ប្រជាពលរដ្ឋដោយអយុត្តិធម៌នោះទេ

(ស្វាយរៀង)៖ ក្នុងពេលថ្មីៗនេះ មានបណ្តាញសារព័ត៌មានមួយចំនួនបានចុះផ្សាយថា «លោកនាយប៉ុស្តិ៍ពពែត ស្រុកស្វាយទាប ខេត្តស្វាយរៀង បាញ់មនុស្សបាក់ភ្លៅ ហើយបញ្ចប់រឿងដោយស្ងាត់ៗ»។ ពាក់ព័ន្ធនឹងការចុះផ្សាយនេះ អធិការដ្ឋាននគរបាលស្រុកស្វាយទាប សូមធ្វើការបំភ្លឺជូនសាធារណជនឱ្យបានច្បាស់លាស់ដូចខាងក្រោម៖

តាមការបញ្ជាក់ នៅថ្ងៃទី១៤ ខែមីនា ឆ្នាំ២០២៦ វេលាម៉ោង ២២:៤០នាទីយប់ មានប្រជាពលរដ្ឋឈ្មោះ ញឹម ចន្ទី ភេទស្រី អាយុ ៣៨ឆ្នាំ បានរាយការណ៍តាមទូរស័ព្ទមកប៉ុស្តិ៍នគរបាលរដ្ឋបាលឃុំពពែតថា មានបុរសម្នាក់ឈ្មោះ គង់ ដា អាយុ ៣៦ឆ្នាំ បានចូលទៅក្នុងផ្ទះរបស់ខ្លួន បង្កភាពអុកឡុក ស្រែកឡូឡា បំផ្លាញទ្រព្យសម្បត្តិ និងចាក់ទ្វារពីខាងក្រៅ មិនឱ្យម្ចាស់ផ្ទះចេញ។
ភ្លាមៗនោះ លោកនាយប៉ុស្តិ៍នគរបាលឃុំពពែត និងកម្លាំងពាក់ព័ន្ធ បានចុះអន្តរាគមន៍ដល់ទីតាំងកើតហេតុ។ នៅពេលទៅដល់ ជនបង្កឈ្មោះ គង់ ដា មានកាន់កាំបិត ហើយបានស្ទុះមកវាយប្រហារលើលោកនាយប៉ុស្តិ៍ បណ្តាលឱ្យរងរបួសចំទ្រូងខាងស្តាំ ហូរឈាម មុនពេលរត់គេចខ្លួន។

បន្ទាប់មក នៅថ្ងៃទី១៦ ខែមីនា ឆ្នាំ២០២៦ វេលាម៉ោង ០៨:៣០នាទីព្រឹក កម្លាំងនគរបាលចំនួន ៥នាក់ បានទៅដល់ផ្ទះជនសង្ស័យ ក្នុងគោលបំណងហៅមកអប់រំណែនាំ។ ទោះយ៉ាងណា ជនសង្ស័យបានកាន់ពូថៅ ស្ទុះចេញមក និងបង្ហាញអាកប្បកិរិយាវាយប្រហារលើសមត្ថកិច្ចម្តងទៀត ទោះបីមានការព្រមានជាបន្តបន្ទាប់ក៏ដោយ។

ក្នុងស្ថានភាពបន្ទាន់ និងគំរាមកំហែងដល់ជីវិត លោកនាយប៉ុស្តិ៍បានប្រើសិទ្ធិការពារខ្លួន ដោយបាញ់ផ្ទុកដីចំនួន ២គ្រាប់ដើម្បីព្រមាន ប៉ុន្តែជនសង្ស័យនៅតែបន្តស្ទុះចូល។ ដោយមិនអាចទប់ស្កាត់បាន លោកនាយប៉ុស្តិ៍បានបាញ់មួយគ្រាប់ទៀត បណ្តាលឱ្យជនសង្ស័យរងរបួសចំជើងខាងស្តាំ និងដួលនៅកន្លែងកើតហេតុ។

ក្រោយកើតហេតុ សមត្ថកិច្ច អាជ្ញាធរ និងក្រុមគ្រួសារ បានហៅរថយន្តសង្គ្រោះ ដឹកជនរងរបួសទៅព្យាបាលនៅមន្ទីរពេទ្យបង្អែកជីភូ។ ខណៈពេលក្រោយមក ក្រុមគ្រួសារជនសង្ស័យ បានស្នើសុំបញ្ចប់រឿង ដោយមិនប្តឹងផ្តល់ ព្រោះយល់ថា សកម្មភាពបាញ់របស់សមត្ថកិច្ច គឺស្ថិតក្នុងស្ថានភាពការពារខ្លួន បន្ទាប់ពីជនសង្ស័យបានប្រើអាវុធវាយប្រហារមុន។

អធិការដ្ឋាននគរបាលស្រុកស្វាយទាប សូមបញ្ជាក់ថា ការប្រើប្រាស់អាវុធក្នុងករណីនេះ គឺធ្វើឡើងក្នុងក្របខណ្ឌច្បាប់ និងក្នុងគោលបំណងការពារជីវិត មិនមែនជាការបាញ់ប្រហារប្រជាពលរដ្ឋដោយអយុត្តិធម៌ដូចការចុះផ្សាយមិនពិតមួយចំនួននោះឡើយ៕