បាត់ដំបងត្រៀមសង្រ្កាន្តឆ្នាំ២០២៦! ផ្ដោតលើប្រពៃណីខ្មែរ និងល្បែងប្រជាប្រិយ

(បាត់ដំបង)៖ ឯកឧត្តម សុខ លូ អភិបាលខេត្តបាត់ដំបងបានដឹកនាំកិច្ចប្រជុំត្រៀមរៀបចំព្រឹត្តិការណ៍សង្រ្កាន្តបាត់ដំបង ឆ្នាំ២០២៦ ដើម្បីអបអរសាទរបុណ្យចូលឆ្នាំថ្មីប្រពៃណីជាតិខ្មែរ ដែលនឹងប្រព្រឹត្តទៅពីថ្ងៃទី១៤ ដល់ថ្ងៃទី១៦ ខែមេសាខាងមុខ។

ក្នុងកិច្ចប្រជុំថ្ងៃទី១៨ ខែមីនា ឯកឧត្តមបានណែនាំឱ្យគ្រប់មន្ទីរ អង្គភាព និងអាជ្ញាធរពាក់ព័ន្ធ ពន្លឿនការរៀបចំតុបតែងទីតាំងសំខាន់ៗ និងសហការនាំយកផលិតផលក្នុងស្រុកមកតាំងបង្ហាញ ខណៈព្រឹត្តិការណ៍នេះនឹងមានការបង្ហាញធ្វើម្ហូបខ្មែរ និងបង្អែម ដើម្បីទាក់ទាញភ្ញៀវទេសចរ។

សង្រ្កាន្តឆ្នាំនេះ នឹងរៀបចំតាមបែបប្រពៃណី ដោយបែងចែកជាតំបន់សាសនា តំបន់ផលិតផលក្នុងស្រុក ភូមិអាហារខ្មែរ ផ្សារខ្មែរ និងភូមិល្បែងប្រជាប្រិយ ដើម្បីជំរុញឱ្យយុវជនចូលរួមលេងល្បែងបុរាណឱ្យបានផុសផុល។

គួរបញ្ជាក់ថា ព្រឹត្តិការណ៍ឆ្នាំនេះ មិនមានការប្រគុំតន្ត្រីធំៗ ការបាញ់ទឹក ឬលេងប៉ាតម្ស៉ៅនោះទេ ប៉ុន្តែផ្ដោតលើការអភិរក្សវប្បធម៌ប្រពៃណី និងបង្កើនភាពសប្បាយរីករាយសុវត្ថិភាពជូនប្រជាពលរដ្ឋ និងភ្ញៀវទេសចរ៕