បញ្ហាចាស់ តែវិធានការថ្មី! អាជ្ញាធរក្រុងតាខ្មៅចុះរៀបចំសណ្តាប់ធ្នាប់បំបាត់ភាពរញ៉េរញ៉ៃតាមផ្លូវ

(កណ្តាល)៖ បញ្ហាការលក់ដូររំលោភលើចំណីផ្លូវសាធារណៈ នៅតាមបណ្តាផ្សារ និងផ្លូវមួយចំនួន កំពុងក្លាយជាប្រធានបទក្តៅគគុក ដែលបង្កឱ្យមានការកកស្ទះចរាចរណ៍យ៉ាងធ្ងន់ធ្ងរ និងប៉ះពាល់ដល់សោភ័ណ្ឌភាពទីក្រុងយ៉ាងច្បាស់លាស់។

ដើម្បីដោះស្រាយបញ្ហានេះ នាព្រឹកថ្ងៃទី១៨ ខែមីនា ឆ្នាំ២០២៦ អាជ្ញាធរក្រុងតាខ្មៅ ដឹកនាំដោយលោក ឃឹម សំភារ អភិបាលក្រុងតាខ្មៅ និងជាប្រធានគណៈបញ្ជាការឯកភាពក្រុង រួមជាមួយកម្លាំងពាក់ព័ន្ធ បានចុះអនុវត្តវិធានការរៀបចំសណ្តាប់ធ្នាប់សាធារណៈឡើងវិញ នៅលើកំណាត់ផ្លូវលេខ២០៣ កែងផ្លូវ២០២ ខាងកើតផ្សារតាខ្មៅថ្មី។

តាមការសង្កេតជាក់ស្តែង ប្រជាពលរដ្ឋមួយចំនួនដែលមានលំនៅឋាននៅតាមបណ្តោយផ្លូវខាងលើ បានយកចំណីផ្លូវសាធារណៈមុខផ្ទះទៅជួលឱ្យអាជីវករលក់បន្លែ ត្រី សាច់ ដែលបណ្តាលឱ្យមានភាពរញ៉េរញ៉ៃ កកស្ទះចរាចរណ៍ ប៉ះពាល់ដល់អនាម័យ និងបរិស្ថានជុំវិញតំបន់ផ្សារ។

ការយកចិញ្ចើមផ្លូវធ្វើជាទីតាំងលក់ដូរ មិនត្រឹមតែរារាំងដល់អ្នកថ្មើរជើងប៉ុណ្ណោះទេ ប៉ុន្តែថែមទាំងបង្ខំឱ្យពួកគេត្រូវចុះដើរលើទ្រូងផ្លូវ បង្កើនហានិភ័យគ្រោះថ្នាក់ចរាចរណ៍។ ជាមួយគ្នានេះ ការចតយានយន្តមិនមានរបៀបរបស់អតិថិជននៅមុខតូបលក់ដូរ ក៏ធ្វើឱ្យចរាចរណ៍ជុំវិញតំបន់ផ្សារត្រូវជាប់គាំងស្ទើរតែទាំងស្រុងនៅម៉ោងមមាញឹកផងដែរ។

លោក ឃឹម សំភារ បានបញ្ជាក់ថា ការចុះអនុវត្តលើកនេះ គឺអនុវត្តតាមការណែនាំពីថ្នាក់ដឹកនាំខេត្ត ដោយក្រុមការងារចម្រុះបានធ្វើការអប់រំ និងណែនាំដល់អាជីវករ និងម្ចាស់ផ្ទះ ឱ្យយល់ដឹងអំពីច្បាប់សណ្តាប់ធ្នាប់សាធារណៈ និងផលប៉ះពាល់នៃការរំលោភចំណីផ្លូវ។

អាជ្ញាធរក្រុងបានអំពាវនាវយ៉ាងតឹងរឹង ដល់ម្ចាស់ផ្ទះទាំងអស់ ត្រូវបញ្ឈប់ជាបន្ទាន់នូវការយកដីសាធារណៈទៅជួល ដើម្បីប្រយោជន៍ផ្ទាល់ខ្លួន។ ក្នុងករណីនៅតែបន្តល្មើស នឹងត្រូវអនុវត្តវិធានការរដ្ឋបាល និងផ្សព្វផ្សាយសាធារណៈដោយគ្មានការលើកលែង។

ជាមួយគ្នានេះ អាជ្ញាធរក៏បានអំពាវនាវដល់អាជីវករទាំងអស់ សូមចូលរួមសហការជាមួយអាជ្ញាធរ ដោយផ្លាស់ប្តូរទៅលក់នៅទីតាំងដែលបានរៀបចំសមស្រប ដើម្បីរក្សាសណ្តាប់ធ្នាប់ និងកាត់បន្ថយបញ្ហាកកស្ទះចរាចរណ៍ ក៏ដូចជាបញ្ហាសំរាម និងអនាម័យបរិស្ថាន។

លោកអភិបាលក្រុងបានបន្ថែមថា គោលដៅនៃការរៀបចំសណ្តាប់ធ្នាប់នេះ គឺដើម្បីធានាលំហូរចរាចរណ៍ឱ្យមានប្រសិទ្ធភាព កាត់បន្ថយគ្រោះថ្នាក់ និងលើកកម្ពស់មុខមាត់ទីក្រុងឱ្យកាន់តែស្អាត និងមានសណ្ដាប់ធ្នាប់។ “សណ្តាប់ធ្នាប់ល្អ ចាប់ផ្តើមពីយើងម្នាក់ៗ” ការចូលរួមរបស់ប្រជាពលរដ្ឋ គឺជាកត្តាសំខាន់ក្នុងការកសាងសហគមន៍ឱ្យមានភាពរីកចម្រើន និងរស់នៅបានយ៉ាងថ្លៃថ្នូរ។

យ៉ាងណាមិញ ប្រជាពលរដ្ឋដែលធ្វើដំណើរតាមកំណាត់ផ្លូវនេះ បានសម្តែងការមិនពេញចិត្ត និងរិះគន់យ៉ាងខ្លាំងចំពោះម្ចាស់ផ្ទះមួយចំនួន ដែលយកដីសាធារណៈរបស់រដ្ឋទៅជួលយកផលប្រយោជន៍ផ្ទាល់ខ្លួន ដោយមិនគិតពីផលប៉ះពាល់ដល់សាធារណៈជន។

គួរបញ្ជាក់ផងដែរថា អាជីវករដែលលក់ដូរនៅលើកំណាត់ផ្លូវលេខ២០៣ កែងផ្លូវ២០២ ខាងកើតផ្សារតាខ្មៅថ្មី ភាគច្រើនជួលទីតាំងពីម្ចាស់ផ្ទះនៅតំបន់នោះ ដោយតម្លៃជួលមានចន្លោះពីប្រហែល ១៥០,០០០ រៀល ដល់ ១,០០០,០០០ រៀល អាស្រ័យលើទីតាំង និងប្រវែងកន្លែងលក់៕