បង្ក្រាបទីតាំង Online Scam មួយកន្លែង នៅបុរីបឹងស្នោ ឃាត់ខ្លួនជនជាតិចិន១៩នាក់ ដកហូតសម្ភារៈជាច្រើន

(ភ្នំពេញ)៖ កម្លាំងចម្រុះ នៃគណៈបញ្ជាការឯកភាពរដ្ឋបាលរាជធានីភ្នំពេញ បានបន្តប្រតិបត្តិការយ៉ាងតឹងរឹង ចុះបង្ក្រាបទីតាំងសង្ស័យពាក់ព័ន្ធសកម្មភាពឆបោកតាមប្រព័ន្ធបច្ចេកវិទ្យា (Online Scam) មួយកន្លែង ស្ថិតក្នុងបុរីប៉េងហួតបឹងស្នោ ផ្ទះលេខ១៤ ផ្លូវ M០៥ ភូមិបឹងឈូក សង្កាត់និរោធ ខណ្ឌច្បារអំពៅ។

ក្នុងប្រតិបត្តិការនេះ សមត្ថកិច្ចបានឃាត់ខ្លួនជនជាតិចិនចំនួន ១៩នាក់ និងដកហូតវត្ថុតាងជាច្រើន រួមមាន ទូរសព្ទដៃ ១២៣គ្រឿង កុំព្យូទ័រ All-in-One ០៨គ្រឿង ម៉ូនីទ័រ ០២គ្រឿង កុំព្យូទ័រយួរដៃ ០១គ្រឿង CPU ០១គ្រឿង ព្រមទាំងមួក និងឯកសណ្ឋានក្លែងបន្លំជាសមត្ថកិច្ចចិន ចំនួន ០៣កំប្លេ។

ប្រតិបត្តិការនេះបានអនុវត្តនៅថ្ងៃទី១៧ ខែមីនា ឆ្នាំ២០២៦ ក្រោមការបញ្ជាដឹកនាំរបស់ឯកឧត្តម ឃួង ស្រេង អភិបាលរាជធានីភ្នំពេញ ដោយមានការចូលរួមពីអាជ្ញាធរខណ្ឌច្បារអំពៅ និងសម្របសម្រួលនីតិវិធីច្បាប់ដោយលោកស្រី ភី ស៊ីថង ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ។

យោងតាមការសន្និដ្ឋានបឋម សមត្ថកិច្ចជំនាញបានឲ្យដឹងថា ក្រុមជនសង្ស័យទាំងនេះ បានប្រើប្រាស់ទឹកដីកម្ពុជា ជាគោលដៅបង្កប់ ដើម្បីប្រព្រឹត្តសកម្មភាពឆបោកតាមអនឡាញ ក្រោមរូបភាពក្លែងបន្លំ និងប្រើឯកសារក្លែងធ្វើជាសមត្ថកិច្ចប្រទេសចិន។

បច្ចុប្បន្ន ជនសង្ស័យ និងវត្ថុតាងទាំងអស់ ត្រូវបានប្រគល់ជូនសមត្ថកិច្ចជំនាញ នៃស្នងការដ្ឋាននគរបាលរាជធានីភ្នំពេញ ដើម្បីអនុវត្តតាមនីតិវិធីច្បាប់ និងបន្តស្រាវជ្រាវស្វែងរកមេខ្លោងពាក់ព័ន្ធ។

គួរបញ្ជាក់ថា សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានប្ដេជ្ញាចិត្តយ៉ាងម៉ឺងម៉ាត់ ក្នុងការបោសសម្អាតបទល្មើសឆបោកតាមប្រព័ន្ធបច្ចេកវិទ្យា ឱ្យអស់ពីកម្ពុជា នៅត្រឹមខែមេសា ឆ្នាំ២០២៦ ដោយបញ្ជាក់ថា កម្ពុជា មិនមែនជាទីជ្រកកោនសម្រាប់ឧក្រិដ្ឋជនបច្ចេកវិទ្យា ឬបទល្មើសឆ្លងដែនឡើយ ហើយរាល់មុខសញ្ញាពាក់ព័ន្ធ នឹងត្រូវទទួលទោសតាមច្បាប់យ៉ាងតឹងរឹង ដោយគ្មានការយោគយល់ឡើយ៕