សម្ដេចតេជោ ហ៊ុន សែន រំលឹកខួប៥៦ឆ្នាំ រដ្ឋប្រហារ១៨ មីនា បង្ហាញដំណើរលំបាកពីសង្គ្រាមដល់ការស្ដារប្រទេស

(ភ្នំពេញ)៖ បើតាមសាររបស់សម្ដេចតេជោ ហ៊ុន សែន បានបង្ហោះលើបណ្ដាញសង្គមហ្វេសប៊ុក នៅថ្ងៃទី១៨ ខែមីនា ឆ្នាំ២០២៦ ក្នុងឱកាសខួបលើកទី៥៦ នៃព្រឹត្តិការណ៍រដ្ឋប្រហារ ថ្ងៃទី១៨ ខែមីនា ឆ្នាំ១៩៧០ ដែលបានទម្លាក់សម្តេចព្រះនរោត្តម សីហនុ និងនាំឱ្យប្រទេសកម្ពុជា ធ្លាក់ចូលទៅក្នុងសង្គ្រាមយ៉ាងពេញលេញ។

សម្ដេចតេជោ បានរំលឹកថា ព្រឹត្តិការណ៍នោះ គឺជាចំណុចបំបែកដ៏សំខាន់មួយ ដែលបម្លែងប្រទេសពីសន្តិភាព ទៅកាន់សង្គ្រាមដ៏វឹកវរ និងការរងទុក្ខវេទនារយៈពេលយូរ។ជាមួយគ្នានេះ សម្ដេចក៏បានចែករំលែករូបថតមួយសន្លឹក ដែលត្រូវបានស្រាវជ្រាវដោយលោក អេង សុធីវណ្ណ ហើយថតដោយអ្នកថតរូបបរទេស កាលពីថ្ងៃទី១៥ ខែមីនា ឆ្នាំ១៩៧៩ នៅរាជធានីភ្នំពេញ។ សម្ដេចបានរៀបរាប់ថា នៅពេលនោះ ទោះមានវ័យក្មេង និងទម្ងន់ប្រមាណ៥០គីឡូក្រាម ប៉ុន្តែជីវភាពរស់នៅគឺលំបាកខ្លាំង។ សម្លៀកបំពាក់មិនសមរម្យ អាវត្រូវបានរើសពីផ្ទះមួយនៅផ្សារធំថ្មី ខណៈវ៉ែនតាក៏ខូចមិនអាចប្រើបានទៀត។ទោះជាយ៉ាងណា ក្នុងស្ថានភាពដ៏លំបាកនោះ សម្ដេចបានបញ្ជាក់ថា មិនបានរត់ចោលប្រជាជនឡើយ ប៉ុន្តែបានខិតខំឈរឡើងវិញ ដើម្បីរស់ និងចូលរួមស្តារ និងកសាងប្រទេសជាតិឡើងវិញ រហូតឈានដល់ការអភិវឌ្ឍដូចសព្វថ្ងៃ។

សម្ដេចក៏បានរំលឹកអនុស្សាវរីយ៍ផ្ទាល់ខ្លួនមួយថា បន្ទាប់ពីបានជួបកូនប្រុសឡើងវិញ នៅថ្ងៃទី២៤ ខែកុម្ភៈ ឆ្នាំ១៩៧៩ កូននៅពេលនោះ មិនទាន់ហៅថា “ពុក” ទេ ប៉ុន្តែហៅថា “ពូ” ហើយតែងតែបណ្តេញចេញ នៅពេលទៅជិតម្តាយរបស់គេ ដែលបង្ហាញពីការបែកបាក់គ្រួសារដោយសារសង្គ្រាម។

ជាមួយនឹងរូបថតនោះ អ្នកនិពន្ធបរទេសបានសរសេរថា៖ “The world’s youngest foreign minister: Hun Sen, then 26 years old, meets with a Mongolian delegation in Phnom Penh on March 15, 1979.” មានន័យថា សម្ដេចតេជោ ហ៊ុន សែន ក្នុងវ័យ២៦ឆ្នាំ ត្រូវបានចាត់ទុកថាជារដ្ឋមន្ត្រីការបរទេសវ័យក្មេងបំផុតក្នុងពិភពលោក ខណៈកំពុងបំពេញភារកិច្ចជួបជាមួយគណៈប្រតិភូម៉ុងហ្គោលីនៅភ្នំពេញ នៅថ្ងៃទី១៥​ ខែមីនា ឆ្នាំ១៩៧៩។

សារនេះ មិនត្រឹមតែជាការរំលឹកអតីតកាលនោះទេ ប៉ុន្តែជាការបញ្ជាក់ពីដំណើរលំបាក និងការតស៊ូរបស់កម្ពុជា ពីសង្គ្រាមទៅរកសន្តិភាព និងការអភិវឌ្ឍ ដែលមិនអាចកើតឡើងបាន ប្រសិនបើគ្មានការខិតខំ និងការមិនបោះបង់របស់ជំនាន់មុន៕