លើកកម្ពស់សហគ្រិនស្រ្តី! រដ្ឋមន្រ្តីពាណិជ្ជកម្មជួប CWEA ពិភាក្សាពង្រឹងសេដ្ឋកិច្ចស្រ្តី

(ភ្នំពេញ)៖ លោកជំទាវ ចម និម្មល រដ្ឋមន្រ្តីក្រសួងពាណិជ្ជកម្ម បានអនុញ្ញាតជូនគណៈប្រតិភូសមាគមសហគ្រិនស្រ្តីកម្ពុជា (CWEA) ដឹកនាំដោយលោកជំទាវ ចាន់ ភារី ប្រធានសមាគម ចូលជួបសម្តែងការគួរសម និងពិភាក្សាការងារ ក្នុងបរិយាកាសស្និទ្ធស្នាល និងស្ថាបនា។

ជំនួបនេះបានប្រព្រឹត្តទៅនៅថ្ងៃទី១៧ ខែមីនា ឆ្នាំ២០២៦ នៅទីស្តីការក្រសួងពាណិជ្ជកម្ម ដែលក្នុងនោះ លោកជំទាវរដ្ឋមន្រ្តី បានសម្តែងការស្វាគមន៍យ៉ាងកក់ក្តៅ និងថ្លែងកោតសរសើរខ្ពស់ចំពោះតួនាទីសំខាន់របស់សមាគម ក្នុងការលើកកម្ពស់សហគ្រិនស្រ្តី និងពង្រឹងអំណាចស្រ្តី ក្នុងការចូលរួមអភិវឌ្ឍន៍វិស័យសេដ្ឋកិច្ច និងពាណិជ្ជកម្ម។

ក្នុងឱកាសនោះ លោកជំទាវប្រធានសមាគម ចាន់ ភារី បានរាយការណ៍អំពីសមិទ្ធិផលសំខាន់ៗក្នុងឆ្នាំ២០២៥ ដែលសមាគមបានសម្រេចបាន ក្នុងការគាំទ្រ និងលើកស្ទួយសហគ្រិនស្រ្តី ឱ្យមានសមត្ថភាពប្រកួតប្រជែង និងពង្រីកឱកាសចូលរួមក្នុងទីផ្សារអន្តរជាតិ។

ជាការឆ្លើយតប លោកជំទាវ ចម និម្មល បានវាយតម្លៃខ្ពស់លើកិច្ចខិតខំប្រឹងប្រែងរបស់សមាគម និងបានបង្ហាញពីសមិទ្ធិផលសំខាន់ៗរបស់ក្រសួងពាណិជ្ជកម្ម ក្នុងការបង្កើតបរិយាកាសអំណោយផលសម្រាប់ធុរកិច្ច ជាពិសេសការគាំទ្រសហគ្រិនស្រ្តី។ ព្រមទាំងបានគាំទ្រយ៉ាងពេញទំហឹងលើគំនិតផ្តួចផ្តើមថ្មីៗរបស់សមាគម ដូចជាការរៀបចំវេទិកា WEE Market Hub ដែលមានគោលបំណងជំរុញសក្តានុពលសេដ្ឋកិច្ចស្រ្តីឱ្យកាន់តែរីកចម្រើន។

ជំនួបនេះត្រូវបានចាត់ទុកថា ជាជំហានសំខាន់មួយក្នុងការពង្រឹងភាពជាដៃគូរវាងរដ្ឋ និងវិស័យឯកជន ដើម្បីរួមគ្នាលើកស្ទួយសហគ្រិនស្រ្តី និងជំរុញកំណើនសេដ្ឋកិច្ចប្រកបដោយចីរភាព៕