សោកស្ដាយខ្លាំងណាស់ ទើបភ្ជាប់ពាក្យហើយថ្មីៗ! នារីវ័យក្មេងបាត់បង់ជីវិតភ្លាមៗ ក្រោយបុករថយន្តដឹកទឹកកកពីក្រោយនៅផ្លូវជាតិលេខ៥

(ភ្នំពេញ)៖ ហេតុការណ៍គ្រោះថ្នាក់ចរាចរណ៍ដ៏សោកសៅមួយ បានកើតឡើងនៅវេលាម៉ោង៥:២១នាទីព្រឹក ថ្ងៃទី១៨ ខែមីនា ឆ្នាំ២០២៦ បណ្តាលឲ្យនារីម្នាក់បាត់បង់ជីវិតភ្លាមៗនៅកន្លែងកើតហេតុ ធ្វើឲ្យអ្នកឃើញហេតុការណ៍មានការអាសូរយ៉ាងខ្លាំង។

តាមប្រភពព័ត៌មានបានឲ្យដឹងថា នារីរងគ្រោះបានជិះម៉ូតូមួយគ្រឿងម៉ាក Scoopy ពណ៌ខ្មៅ ពាក់ផ្លាកលេខ 1LK-7128 ដោយមានដឹកគូរដណ្ដឹង ដែលទើបភ្ជាប់ពាក្យបានប្រមាណ១ខែកន្លះ ធ្វើដំណើរទៅធ្វើការ ហើយនៅពេលត្រឡប់មកវិញ ក៏បានជួបគ្រោះថ្នាក់ដ៏អាក្រក់នេះតែម្តង។

ក្នុងហេតុការណ៍នេះ ម៉ូតូរបស់នារីរងគ្រោះបានបុកពីក្រោយរថយន្តដឹកទឹកកកមួយគ្រឿង ពាក់ផ្លាកលេខ ភ្នំពេញ 2AG-4992 បណ្ដាលឲ្យនាងស្លាប់ភ្លាមៗនៅកន្លែងកើតហេតុ ដោយមិនអាចជួយសង្គ្រោះបានឡើយ។

ហេតុការណ៍នេះបានកើតឡើងនៅតាមបណ្ដោយផ្លូវជាតិលេខ៥ ស្ថិតក្នុងភូមិសាស្ត្រសង្កាត់ច្រាំងចំរេះទី២ ខណ្ឌឫស្សីកែវ រាជធានីភ្នំពេញ។

ក្រោយពេលកើតហេតុ អ្នកបើកបររថយន្តបានរត់គេចខ្លួនបាត់ ខណៈសមត្ថកិច្ចជំនាញបានចុះទៅដល់កន្លែងកើតហេតុ ដើម្បីធ្វើការត្រួតពិនិត្យ និងចាត់វិធានការតាមនីតិវិធី។ ចំណែកសពនារីរងគ្រោះ ត្រូវបានប្រគល់ជូនក្រុមគ្រួសារ ដើម្បីយកទៅធ្វើបុណ្យតាមប្រពៃណី។

ហេតុការណ៍នេះបានធ្វើឲ្យមហាជនមានការសោកស្ដាយយ៉ាងខ្លាំង ពិសេសចំពោះគូស្នេហ៍ដែលទើបចាប់ផ្តើមជីវិតគ្រួសារជាមួយគ្នា ប៉ុន្តែត្រូវបញ្ចប់ដោយគ្រោះថ្នាក់ដ៏មិនគួរឲ្យជឿនេះ៕