ប៉ូលិសចាប់ចោរលួចម៉ូតូបាន២នាក់!

(ភ្នំពេញ)៖ ជនសង្ស័យ២នាក់ ត្រូវបានកម្លាំងនគរបាលខណ្ឌទួលគោក សហការជាមួយខណ្ឌឫស្សីកែវ ស្រាវជ្រាវ និងឃាត់ខ្លួនបានជោគជ័យ ពាក់ព័ន្ធករណីលួចយកម៉ូតូ និងកាន់កាប់ ឬដឹកជញ្ជូនអាវុធដោយគ្មានការអនុញ្ញាត។

ប្រតិបត្តិការនេះ អនុវត្តតាមបទបញ្ជារបស់ឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ ដោយធ្វើឡើងនៅថ្ងៃទី១៧ ខែមីនា ឆ្នាំ២០២៦ បន្ទាប់ពីករណីនេះកើតឡើងកាលពីថ្ងៃទី១៣ ខែមីនា នៅចំណុចមុខផ្ទះលេខ២០៥ ផ្លូវលេខ១៣២ សង្កាត់ទឹកល្អក់ទី១ ខណ្ឌទួលគោក។

ជនសង្ស័យទាំង២រួមមាន៖ ១.ឈ្មោះ ចាន់ ណារ៉ុង អាយុ៣៣ឆ្នាំ មុខរបរមិនពិតប្រាកដ ស្នាក់នៅខណ្ឌដូនពេញ។២.ឈ្មោះ រឿន ឆៃ អាយុ៣២ឆ្នាំ មុខរបរមិនពិតប្រាកដ ស្នាក់នៅខណ្ឌឫស្សីកែវ។

បច្ចុប្បន្ន ជនសង្ស័យទាំង២ កំពុងត្រូវបានឃាត់ខ្លួនបណ្ដោះអាសន្ន នៅអធិការដ្ឋាននគរបាលខណ្ឌទួលគោក ដើម្បីកសាងសំណុំរឿង បញ្ជូនទៅតុលាការ ចាត់ការតាមនីតិវិធីច្បាប់។

ករណីនេះ បង្ហាញពីការចាត់វិធានការយ៉ាងតឹងរឹងរបស់សមត្ថកិច្ច ក្នុងការបង្ក្រាបបទល្មើស និងការពារសន្តិសុខសង្គមឲ្យកាន់តែមានប្រសិទ្ធភាព៕