លោកឧត្តមសេនីយ៍ស្នងការ ឈឿន សុចិត្ត អញ្ជើញចូលរួមកិច្ចប្រជុំបូកសរុបឆ្នាំ២០២៥ និងដាក់ចេញទិសដៅថ្មីឆ្នាំ២០២៦

(កណ្ដាល)៖ នៅព្រឹកថ្ងៃអង្គារ ទី១៧ ខែមីនា ឆ្នាំ២០២៦ លោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាល បានអញ្ជើញចូលរួមកិច្ចប្រជុំផ្សព្វផ្សាយរបាយការណ៍សរុបការងារប្រយុទ្ធប្រឆាំងអំពើជួញដូរមនុស្ស សម្រាប់ឆ្នាំ២០២៥ និងលើកទិសដៅអនុវត្តបន្តសម្រាប់ឆ្នាំ២០២៦ របស់គណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស (គ.ជ.ប.ជ)។

កិច្ចប្រជុំនេះ ប្រព្រឹត្តទៅក្រោមអធិបតីភាពដ៏ខ្ពង់ខ្ពស់ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធាន គ.ជ.ប.ជ នៅសាលប្រជុំអគារ S នៃទីស្តីការក្រសួងមហាផ្ទៃ។

ក្នុងឱកាសនោះ កិច្ចប្រជុំបានធ្វើការបង្ហាញពីលទ្ធផលសំខាន់ៗនៃការអនុវត្តការងារប្រយុទ្ធប្រឆាំងអំពើជួញដូរមនុស្សក្នុងឆ្នាំ២០២៥ កន្លងមក ព្រមទាំងពិភាក្សាលើបញ្ហាប្រឈមនានា និងដាក់ចេញនូវវិធានការ និងទិសដៅសំខាន់ៗសម្រាប់ឆ្នាំ២០២៦ ដើម្បីបន្តពង្រឹងប្រសិទ្ធភាពការងារ ឆ្ពោះទៅរកការកាត់បន្ថយ និងបង្ការអំពើជួញដូរមនុស្សឱ្យកាន់តែមានប្រសិទ្ធភាព។

ការចូលរួមរបស់ថ្នាក់ដឹកនាំនិងមន្ត្រីពាក់ព័ន្ធគ្រប់លំដាប់ថ្នាក់ បានបង្ហាញពីការប្តេជ្ញាចិត្តខ្ពស់ក្នុងការរួមគ្នាបង្កើនសមត្ថភាព សហការណ៍ និងអនុវត្តវិធានការយ៉ាងម៉ឺងម៉ាត់ ក្នុងការបង្ក្រាប និងទប់ស្កាត់អំពើជួញដូរមនុស្ស ឱ្យទទួលបានលទ្ធផលកាន់តែប្រសើរ៕