ក្រុមហ៊ុនអូទ្រីស ១៩ ចាប់អារម្មណ៍វិនិយោគ និងបង្កើតដៃគូយូរអង្វែងនៅកម្ពុជា

(ភ្នំពេញ)៖ ក្រុមហ៊ុនអូទ្រីសធំៗចំនួន១៩ បានបង្ហាញចំណាប់អារម្មណ៍ខ្ពស់ក្នុងការស្វែងរកឱកាសវិនិយោគ និងកសាងភាពជាដៃគូយូរអង្វែងជាមួយកម្ពុជា ក្នុងវេទិកាធុរកិច្ចកម្ពុជា-អូទ្រីស ដែលប្រព្រឹត្តទៅនាព្រឹកថ្ងៃទី១៧ ខែមីនា ឆ្នាំ២០២៦ ក្រោមអធិបតីភាពឯកឧត្ដមឧបនាយករដ្ឋមន្ត្រី ស៊ុន ចាន់ថុល អនុប្រធានទី១ ក្រុមប្រឹក្សាអភិវឌ្ឍន៍កម្ពុជា (ក.អ.ក.) ។

វេទិកានេះជាបេសកកម្មពាណិជ្ជកម្មធំបំផុតមួយរបស់អូទ្រីសនៅកម្ពុជា បង្កើតឱកាសឱ្យវិនិយោគិនទទួលបានការយល់ដឹងស៊ីជម្រៅអំពីបរិយាកាសវិនិយោគ និងភ្ជាប់ទំនាក់ទំនងជាមួយក្រសួង-ស្ថាប័នពាក់ព័ន្ធ ដើម្បីជំរុញកិច្ចសហការថ្មីៗ។

ឯកឧត្ដមឧបនាយករដ្ឋមន្ត្រីបានបញ្ជាក់ថា កម្ពុជាមានសក្តានុពលខ្ពស់ជាគោលដៅវិនិយោគ ដោយសារច្បាប់វិនិយោគអំណោយផល ស្ថិរភាពម៉ាក្រូសេដ្ឋកិច្ច កម្លាំងពលកម្មវ័យក្មេង និងហេដ្ឋារចនាសម្ព័ន្ធកំពុងអភិវឌ្ឍ ខណៈរដ្ឋាភិបាលក៏ប្តេជ្ញាបង្កើនបរិយាកាសវិនិយោគឱ្យកាន់តែប្រសើរ។

ភាគីអូទ្រីសបានកោតសរសើរ និងអរគុណចំពោះការគាំទ្រយ៉ាងកក់ក្តៅពីភាគីកម្ពុជា ហើយរំពឹងថាវេទិកានេះនឹងក្លាយជាជំហានសំខាន់ក្នុងការបម្លែងពីការពិភាក្សា ទៅជាកិច្ចសហការធុរកិច្ចពិតប្រាកដ (B2B) បន្ថែមទៀត។

វេទិកានេះត្រូវបានរំពឹងថានឹងជំរុញការចូលរួមរបស់ក្រុមហ៊ុនអូទ្រីសនៅកម្ពុជាកាន់តែច្រើន និងរួមចំណែកដល់កំណើនសេដ្ឋកិច្ចប្រកបដោយចីរភាព៕