ក្រុមការងាររាជរដ្ឋាភិបាលចុះមូលដ្ឋានខេត្តកំពង់ធំ បូកសរុបលទ្ធផលឆ្នាំ២០២៥ និងដាក់ចេញទិសដៅការងារថ្មីឆ្នាំ២០២៦

(កំពង់ធំ)៖ នាព្រឹកថ្ងៃចន្ទ ទី១៦ ខែមីនា ឆ្នាំ២០២៦ ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម អនុប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ធំ និងជាប្រធានក្រុមការងាររាជរដ្ឋាភិបាលចុះមូលដ្ឋានស្រុកស្ទោង បានអញ្ជើញចូលរួមក្នុងកិច្ចប្រជុំបូកសរុបសកម្មភាព និងលទ្ធផលការងារចុះមូលដ្ឋានប្រចាំឆ្នាំ២០២៥ និងលើកទិសដៅបន្តសម្រាប់ឆ្នាំ២០២៦។

កិច្ចប្រជុំនេះប្រព្រឹត្តទៅក្រោមអធិបតីភាពដ៏ខ្ពង់ខ្ពស់របស់ឯកឧត្តម វង្សី វិស្សុត ឧបនាយករដ្ឋមន្ត្រីប្រចាំការ រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ធំ។

តាមរបាយការណ៍បានឱ្យដឹងថា គិតត្រឹមដំណាច់ឆ្នាំ២០២៥ ក្រុមការងាររាជរដ្ឋាភិបាលចុះមូលដ្ឋានខេត្តកំពង់ធំមានចំនួនសរុប ៣,០២៨នាក់ ដែលបានបំពេញភារកិច្ចនៅតាមស្រុក-ក្រុងទាំង៩ ឃុំ-សង្កាត់៨១ និងភូមិ៧៦៥។ ក្រុមការងារគ្រប់លំដាប់ថ្នាក់បានសហការយ៉ាងជិតស្និទ្ធក្នុងការផ្សព្វផ្សាយខ្លឹមសារសំខាន់ៗនៃយុទ្ធសាស្ត្របញ្ចកោណដំណាក់កាលទី១ កម្មវិធីគោលនយោបាយអាទិភាពទាំង៦ និងវិធានការគន្លឹះទាំង៥ របស់រាជរដ្ឋាភិបាល ដើម្បីលើកកម្ពស់ការគាំទ្រ និងការចូលរួមពីប្រជាពលរដ្ឋនៅមូលដ្ឋាន។

ជាមួយគ្នានេះ ក្រុមការងារក៏បានពង្រឹងស្មារតីសាមគ្គីភាព ឯកភាពជាតិ និងការសហការជាកម្លាំងតែមួយរវាងរដ្ឋាភិបាល កងទ័ព និងប្រជាជន ដោយបង្ហាញពីការប្តេជ្ញាចិត្តក្នុងការការពារ អធិបតេយ្យភាព និងបូរណភាពទឹកដីកម្ពុជា។

គួរបញ្ជាក់ថា ក្រុមការងាររាជរដ្ឋាភិបាលចុះមូលដ្ឋានខេត្តកំពង់ធំ បានបង្កើតក្រុមការងារតាមវិស័យចំនួន៨ ដើម្បីប្រមូលផ្តុំធនធាន និងគំនិតយុទ្ធសាស្ត្រ ស្របតាមស្ថានភាពជាក់ស្តែង ហើយបានកំណត់ការដ្ឋានយុទ្ធសាស្ត្រសំខាន់៣ រួមមាន ការដោះស្រាយបញ្ហាសេដ្ឋកិច្ចប្រជាជន និងសមធម៌សង្គម ការជំរុញអនុវត្តកម្មវិធីនយោបាយ និងយុទ្ធសាស្ត្ររបស់រាជរដ្ឋាភិបាល និងការពង្រឹងយន្តការផ្សព្វផ្សាយ ព្រមទាំងការគ្រប់គ្រងមតិសាធារណៈឱ្យកាន់តែមានប្រសិទ្ធភាព៕