បង្ក្រាបក្តៅៗ! អាវុធហត្ថកំពង់ស្ពឺ ឆ្មក់បំបែកសង្វៀនជល់មាន់ ឃាត់ខ្លួនមនុស្ស ៨នាក់ បញ្ជូនចូលពន្ធនាគារ

(កំពង់ស្ពឺ)៖ កម្លាំងកងរាជអាវុធហត្ថខេត្តកំពង់ស្ពឺបានបើកប្រតិបត្តិការបង្ក្រាបទីតាំងលេងល្បែងស៊ីសងជល់មាន់មួយកន្លែង ឃាត់ខ្លួនជនសង្ស័យចំនួន៨នាក់ ខណៈកំពុងប្រព្រឹត្តបទល្មើសជាក់ស្តែង នៅភូមិខោប សង្កាត់រការធំ ក្រុងច្បារមន។

ប្រតិបត្តិការនេះ ធ្វើឡើងកាលពីវេលាម៉ោង ១៥:១០នាទី ថ្ងៃទី០៨ ខែមីនា ឆ្នាំ២០២៦ ដោយអនុវត្តតាមបទបញ្ជាយ៉ាងម៉ឺងម៉ាត់របស់លោកឧត្តមសេនីយ៍ត្រី ម៉េង ស្រ៊ុន មេបញ្ជាការកងរាជអាវុធហត្ថខេត្តកំពង់ស្ពឺ និងមានការសម្របសម្រួលនីតិវិធីពីព្រះរាជអាជ្ញាអមសាលាដំបូងខេត្ត។

ក្នុងប្រតិបត្តិការនេះ សមត្ថកិច្ចបានដកហូតវត្ថុតាងមួយចំនួន រួមមាន ម៉ូតូ៩គ្រឿង ទូរស័ព្ទ ៦គ្រឿង មាន់ជល់ ៣ក្បាល និងជញ្ជីងថ្លឹងមាន់ ១គ្រឿង។

បច្ចុប្បន្ន ជនត្រូវចោទទាំង ៨នាក់ ត្រូវបានតុលាការចេញដីកាឃុំខ្លួន ដាក់ពន្ធនាគាររួចហើយ ដើម្បីបន្តនីតិវិធីតាមផ្លូវច្បាប់៕