កន្ទុយលេខលក់ចំហកណ្តាលក្រុងបាត់ដំបង មេបណ្តាញធំ «ចែវ៉ែនតា» ខណៈមហាជនរង់ចាំចម្លើយពីអាជ្ញាធរ!(Videos)
(បាត់ដំបង)៖ ក្រុងបាត់ដំបង ដែលជាទីក្រុងសំខាន់មួយក្នុងតំបន់ភាគពាយ័ព្យ កំពុងត្រូវប្រជាពលរដ្ឋមួយចំនួនលើកឡើងពីបញ្ហាល្បែងស៊ីសងខុសច្បាប់ប្រភេទឆ្នោតយួន ឬកន្ទុយលេខ ដែលត្រូវគេសង្ស័យថា កំពុងដំណើរការយ៉ាងសកម្មនៅតាមចំណុចមួយចំនួនក្នុងក្រុង។ នេះបើតាមប្រភពដែលអង្គភាពព័ត៌មាន The Mirror News ទទួលបាននៅថ្ងៃទី១៥ ខែមីនា ឆ្នាំ២០២៦នេះ។
តាមប្រភពពីប្រជាពលរដ្ឋបានឱ្យដឹងថា បណ្តាញល្បែងនេះ ត្រូវគេសង្ស័យថា មានស្ត្រីម្នាក់ដែលគេហៅថា “ចែវ៉ែនតា” ជាមេធំ ប្រមូលលេខពីកូនកញ្ជ្រែងតាមទីតាំងផ្សេងៗ មុននឹងបញ្ជូនបន្តទៅកាន់បណ្តាញខាងក្រៅ។ សកម្មភាពនេះត្រូវបានខ្សឹបឱ្យដឹងថា កើតមានជាប្រចាំថ្ងៃ ហាក់ដូចជាដំណើរការយ៉ាងរលូន។
ប្រភពដដែលបានបញ្ជាក់ថា ទីតាំងដែលត្រូវគេសង្កេតឃើញមានសកម្មភាពទទួលកន្ទុយលេខ រួមមាន៖ *ទីតាំងទី១ ស្ថិតនៅ ភូមិព្រែកមហាទេព សង្កាត់ស្វាយប៉ោ ក្រុងបាត់ដំបង ខេត្តបាត់ដំបង។ *ទីតាំងទី២ ស្ថិតនៅ ផ្លូវលេខ 111 ភូមិព្រែកមហាទេព សង្កាត់ស្វាយប៉ោ ក្រុងបាត់ដំបង ខេត្តបាត់ដំបង។ *ទីតាំងទី៣ ស្ថិតនៅ ផ្ទះចំណុចស្តុបផ្សារលើ ភូមិបូរីកម្មករ សង្កាត់ស្វាយប៉ោ ក្រុងបាត់ដំបង ខេត្តបាត់ដំបង។
ការលើកឡើងនេះ បានធ្វើឱ្យប្រជាពលរដ្ឋមួយចំនួនចាប់ផ្តើមមានការព្រួយបារម្ភ ព្រោះល្បែងស៊ីសងខុសច្បាប់អាចបង្កផលប៉ះពាល់ដល់សន្តិសុខសង្គម និងជីវភាពគ្រួសារ ប្រសិនបើមិនមានការទប់ស្កាត់ឱ្យបានទាន់ពេលវេលា។
ប្រភពខ្លះទៀតបានលើកឡើងថា បញ្ហានេះគួរត្រូវបានអាជ្ញាធរ និងសមត្ថកិច្ចពាក់ព័ន្ធ ចុះស្រាវជ្រាវឱ្យបានច្បាស់លាស់ ដើម្បីពិនិត្យថា តើមានការដំណើរការពិតប្រាកដដូចការលើកឡើងរបស់ប្រជាពលរដ្ឋឬយ៉ាងណា ហើយបើមានពិត ត្រូវចាត់វិធានការតាមផ្លូវច្បាប់ ដើម្បីទប់ស្កាត់ឱ្យមានប្រសិទ្ធភាព។
មហាជនក៏សង្ឃឹមថា អាជ្ញាធរមូលដ្ឋាន និងសមត្ថកិច្ចក្នុងក្រុងបាត់ដំបង និងស្នងការដ្ឋាននគរបាលខេត្តបាត់ដំបង រួមទាំងរដ្ឋបាលខេត្តនឹងយកចិត្តទុកដាក់លើបញ្ហានេះ ដោយចុះពិនិត្យ និងអនុវត្តច្បាប់យ៉ាងតឹងរ៉ឹង ដើម្បីរក្សាសណ្តាប់ធ្នាប់សង្គម និងបង្កើនទំនុកចិត្តរបស់ប្រជាពលរដ្ឋចំពោះការអនុវត្តច្បាប់។
បញ្ហានេះកំពុងត្រូវមហាជនរង់ចាំមើលថា តើអាជ្ញាធរ និងសមត្ថកិច្ចនឹងមានវិធានការយ៉ាងដូចម្តេច ចំពោះការលើកឡើងពីសកម្មភាពល្បែងស៊ីសងខុសច្បាប់នៅកណ្តាលក្រុងបាត់ដំបងនេះ៕
