បេសកកម្មមនុស្សធម៌! ក្រុមគ្រូពេទ្យស្ម័គ្រចិត្តរបស់ឯកឧត្តមឧបនាយករដ្ឋមន្ត្រី ស៊ុន ចាន់ថុល ចុះពិនិត្យ-ព្យាបាលជំងឺឥតគិតថ្លៃ ជូនពលរដ្ឋខេត្តកណ្តាល

(កណ្តាល)៖ ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន នាព្រឹកថ្ងៃទី១៤ ខែមីនា ឆ្នាំ២០២៦  បានអញ្ជើញជាអធិបតីក្នុងកម្មវិធីពិនិត្យ និងព្យាបាលជំងឺឥតគិតថ្លៃ ជូនប្រជាពលរដ្ឋនៅស្រុកស្អាង និងស្រុកកោះធំ ដែលរៀបចំដោយក្រុមគ្រូពេទ្យស្ម័គ្រចិត្តរបស់ឯកឧត្តមឧបនាយករដ្ឋមន្ត្រី ស៊ុន ចាន់ថុល។

កម្មវិធីនេះធ្វើឡើងក្នុងគោលបំណងផ្តល់សេវាពិនិត្យសុខភាព ពិគ្រោះយោបល់ និងព្យាបាលជំងឺដោយឥតគិតថ្លៃ ជាពិសេសផ្តោតលើការការពារ និងតាមដានជំងឺមិនឆ្លង តាមរយៈការប្រមូល និងវិភាគទិន្នន័យសុខភាពប្រជាពលរដ្ឋ ដើម្បីកំណត់បញ្ហាអាទិភាពក្នុងសហគមន៍។

ក្នុងឱកាសនោះ ឯកឧត្តម ប៉េង ពោធិ៍នា បានលើកឡើងថា ការចុះពិនិត្យ និងព្យាបាលជំងឺជូនប្រជាពលរដ្ឋនាពេលនេះ គឺជាកាយវិការមនុស្សធម៌សុទ្ធសាធ ដែលបង្ហាញពីការយកចិត្តទុកដាក់របស់ ឯកឧត្តម ស៊ុន ចាន់ថុល ចំពោះសុខទុក្ខប្រជាពលរដ្ឋនៅមូលដ្ឋាន។

បេសកកម្មមនុស្សធម៌នេះ មានការចូលរួមពីក្រុមគ្រូពេទ្យស្ម័គ្រចិត្ត ក្រុមគ្រូពេទ្យពីប្រទេសបារាំង មន្ទីរពេទ្យតេជោសែនកោះធំ មន្ទីរពេទ្យបង្អែកស្អាង និងក្រុមការងារបច្ចេកទេសជាច្រើន ដែលបានចំណាយពេលវេលា និងកម្លាំងកាយចិត្ត ដើម្បីផ្តល់សេវាសុខាភិបាលជូនប្រជាពលរដ្ឋដោយឥតគិតថ្លៃ៕