ល្បាតដោយកង់! នគរបាលទេសចរណ៍កំពង់ធំបង្កើនសន្តិសុខ ខណៈបំផុសគំនិតការពារបរិស្ថាន!

(កំពង់ធំ)៖ អនុវត្តតាមអនុសាសន៍ដឹកនាំរបស់នាយឧត្តមសេនីយ៍ ស ថេត អគ្គស្នងការនគរបាលជាតិ កាលពីថ្ងៃទី១៤ ខែមីនា ឆ្នាំ២០២៦ លោកឧត្តមសេនីយ៍ទោ ហេង សុផល ស្នងការនគរបាលខេត្តកំពង់ធំ បានបន្តយកចិត្តទុកដាក់ដឹកនាំកម្លាំងការពារ និងរក្សាសន្តិសុខ សុវត្ថិភាព សណ្តាប់ធ្នាប់ជូនភ្ញៀវទេសចរណ៍ជាតិ និងអន្តរជាតិ នៅតាមមណ្ឌលរមណីយដ្ឋាននានាទូទាំងខេត្ត។

ជាមួយនឹងការអនុវត្តភារកិច្ចប្រចាំថ្ងៃ កម្លាំងការិយាល័យនគរបាលទេសចរណ៍បានផ្លាស់ប្តូរវេនប្រចាំការ និងចុះល្បាតត្រួតពិនិត្យភូមិសាស្ត្រជាបន្តបន្ទាប់ ដោយប្រើប្រាស់ទាំងមធ្យោបាយយានយន្ត និងការល្បាតដោយថ្មើរជើង តាមទីតាំងជិតឆ្ងាយ ដើម្បីធានាបាននូវសុវត្ថិភាព និងភាពកក់ក្តៅដល់ភ្ញៀវទេសចរ។

គួរបញ្ជាក់ថា ក្រោមការយកចិត្តទុកដាក់ពីថ្នាក់ដឹកនាំក្រសួងមហាផ្ទៃ និងអគ្គស្នងការដ្ឋាននគរបាលជាតិ ស្នងការដ្ឋាននគរបាលរាជធានី–ខេត្ត ត្រូវបានឧបត្ថម្ភសម្ភារៈ និងមធ្យោបាយជាបន្តបន្ទាប់។ ថ្មីៗនេះ ថ្នាក់ដឹកនាំក៏បានផ្តល់កង់មួយចំនួនដល់អង្គភាព ដើម្បីឲ្យមន្ត្រីជំនាញប្រើប្រាស់ក្នុងការចុះបំពេញភារកិច្ចឲ្យកាន់តែងាយស្រួល។

សកម្មភាពល្បាតដោយជិះកង់ ត្រូវបានចាត់ទុកថាជាគំនិតឆ្លាតវៃមួយ ដែលមិនត្រឹមតែជួយសន្សំសំចៃថវិកា និងកាត់បន្ថយការប្រើប្រាស់ប្រេងឥន្ធនៈប៉ុណ្ណោះទេ ប៉ុន្តែថែមទាំងរួមចំណែកកាត់បន្ថយការបំពុលបរិស្ថាន ព្រមទាំងបំផុសស្មារតីឲ្យប្រជាពលរដ្ឋចូលរួមថែរក្សាអនាម័យ ការពារបរិស្ថាន និងអភិរក្សធនធានធម្មជាតិឲ្យមាននិរន្តរភាព។

នៅក្នុងកិច្ចប្រជុំថ្មីៗនេះ លោកឧត្តមសេនីយ៍ទោ ហេង សុផល ក៏បានក្រើនរំឭកដល់កងកម្លាំងនគរបាលទេសចរណ៍ឲ្យយកចិត្តទុកដាក់ថែទាំសុខភាព គោរពវិន័យ ពង្រឹងរបៀបរបបការងារ គ្រងឯកសណ្ឋានឲ្យសក្តិសមជាមន្ត្រីនគរបាលជាតិ និងប្រកាន់ខ្ជាប់សីលធម៌ សាមគ្គីភាពផ្ទៃក្នុង។

ជាមួយគ្នានេះ កម្លាំងត្រូវបន្តផ្លាស់ប្តូរវេនប្រចាំការ ចេញល្បាតតាមគោលដៅងាយរងគ្រោះ រៀបចំសណ្តាប់ធ្នាប់តាមទីសាធារណៈ តំបន់ទេសចរណ៍ ដងផ្លូវ និងតំបន់ប្រាង្គប្រាសាទ ដើម្បីធានាសន្តិសុខសុវត្ថិភាពជូនភ្ញៀវជាតិ និងអន្តរជាតិ ព្រមទាំងការពារបេតិកភណ្ឌជាតិឲ្យបានគង់វង្ស៕