មន្ទីរអប់រំខេត្តកណ្តាលចុះចងសម្ព័ន្ធមេត្រីភាព ជួយគាំទ្រសាលារៀនរងផលប៉ះពាល់ពីសង្គ្រាម នៅបន្ទាយមានជ័យ

(កណ្ដាល)៖ លោក ចេង សំអ៊ុល ប្រធានមន្ទីរអប់រំ យុវជន និងកីឡាខេត្តកណ្តាល នៅព្រឹកថ្ងៃទី១៣ ខែមីនា ឆ្នាំ២០២៦ បានដឹកនាំប្រតិភូមន្ត្រីរាជការមន្ទីរ ចុះចុះកិច្ចព្រមព្រៀងចងសម្ព័ន្ធមេត្រីភាព ជាមួយសាលាគោលដៅចំនួន២ ក្នុងខេត្តបន្ទាយមានជ័យ ដើម្បីរៀបចំផែនការជួយគាំទ្រ និងជំរុញការអប់រំ សម្រាប់សាលារៀនដែលរងផលប៉ះពាល់ពីសង្គ្រាមថៃឈ្លានពានកម្ពុជា។

ក្នុងឱកាសនោះ ប្រតិភូបានអញ្ជើញទៅកាន់ វិទ្យាល័យយាងដង្គុំ និងសាលាបឋមសិក្សាអូរបីជាន់ ដោយបានជួបសំណេះសំណាល សួរសុខទុក្ខជាមួយគណៈគ្រប់គ្រងសាលា លោកគ្រូអ្នកគ្រូ និងសិស្សានុសិស្ស។

ជាមួយគ្នានេះ មន្ទីរអប់រំខេត្តកណ្តាលក៏បាននាំយកសម្ភារៈ និងគ្រឿងឧបភោគបរិភោគជាច្រើន ដូចជា អង្ករ ទឹកត្រី ទឹកស៊ីអ៊ីវ សៀង មីជាតិ ទឹកសុទ្ធ នំ ខោអាវ និងថ្នាំពេទ្យ មកចែកជូនផងដែរ។ បន្ថែមពីនេះ សាលានីមួយៗ ទទួលបានថវិកាឧបត្ថម្ភចំនួន ៥០ម៉ឺនរៀល ខណៈលោកគ្រូ អ្នកគ្រូ និងគណៈកម្មការសាលាម្នាក់ៗ ទទួលបាន២ម៉ឺនរៀល ដើម្បីជួយសម្រាលបន្ទុកក្នុងការបំពេញភារកិច្ចអប់រំ។

សកម្មភាពនេះ ត្រូវបានចាត់ទុកថាជាការរួមចំណែកពង្រឹងសាមគ្គីភាព និងលើកទឹកចិត្តដល់វិស័យអប់រំ នៅតំបន់ដែលរងផលប៉ះពាល់ពីសង្គ្រាម៕