ប៉ូលិសព្រះវិហារបំភ្លឺករណីវីដេអូអះអាងផាកពិន័យ១,២០០,០០០៛ បញ្ជាក់ថា អនុវត្តតាមច្បាប់ និងមិនទទួលលុយក្រៅ!

(ព្រះវិហារ)៖ ស្នងការដ្ឋាននគរបាលខេត្តព្រះវិហារ បានចេញសេចក្តីបំភ្លឺ បន្ទាប់ពីមានគណនីហ្វេសប៊ុកឈ្មោះ «ឆវី ឆវី» បង្ហោះវីដេអូអះអាងថា នគរបាលចរាចរណ៍ផាកពិន័យដល់ទៅ ១,២០០,០០០៛។

តាមការបញ្ជាក់ កាលពីរសៀលថ្ងៃទី១៣ ខែមីនា ឆ្នាំ២០២៥ កម្លាំងនគរបាលចរាចរណ៍ផ្លូវគោក បានដាក់គោលដៅរឹតបន្តឹងច្បាប់លើផ្លូវជាតិលេខ៩ ក្នុងក្រុងព្រះវិហារ។ ក្នុងប្រតិបត្តិការ បានហៅត្រួតពិនិត្យរថយន្តសាំយ៉ុងមួយគ្រឿង ដែលកែច្នៃខុសលក្ខណៈបច្ចេកទេស និងអ្នកបើកបរគ្មានបណ្ណបើកបរ។

អ្នកបើកបរបានព្យាយាមយកលុយ ២០០,០០០៛ និងបន្ទាប់មក ១,០០០,០០០៛ មកសុំសម្រួល ប៉ុន្តែកម្លាំងសមត្ថកិច្ចបានបដិសេធ ដោយបញ្ជាក់ថា មិនទទួលលុយក្រៅដោយមិនចេញបង្កាន់ដៃឡើយ ហើយបានអនុវត្តការផាកពិន័យតាមអនុក្រឹត្យលេខ៣៩ ក្នុងទឹកប្រាក់ ១,២០០,០០០៛។

ក្រោយមក អ្នកបើកបរបានយល់ព្រមទទួលការផាកពិន័យតាមផ្លូវច្បាប់ និងបានអោយអ្នកមានបណ្ណបើកបរមកបើករថយន្តបន្តដំណើរ៕