ខេត្តកណ្តាលកំពុងអភិវឌ្ឍខ្លាំង! អាជ្ញាធរខេត្តប្រជុំពិនិត្យសំណង់ទូទាំងខេត្ត ពង្រឹងការគ្រប់គ្រងឱ្យម៉ឺងម៉ាត់

(កណ្តាល)៖ រដ្ឋបាលខេត្តកណ្តាល នៅរសៀលថ្ងៃទី១២ ខែមីនា ឆ្នាំ២០២៦ បានបើកកិច្ចប្រជុំពិនិត្យ និងវាយតម្លៃវឌ្ឍនភាពការងារសាងសង់សំណង់គ្រប់ប្រភេទក្នុងភូមិសាស្ត្រខេត្ត ដើម្បីពង្រឹងការគ្រប់គ្រង និងធានាឱ្យការអភិវឌ្ឍសំណង់ប្រព្រឹត្តទៅតាមបទប្បញ្ញត្តិច្បាប់។ កិច្ចប្រជុំនេះដឹកនាំដោយ ឯកឧត្តម ហាក់ សុខមករា អភិបាលរងខេត្តកណ្តាល ដោយមានការចូលរួមពីមន្ទីរជំនាញពាក់ព័ន្ធ អាជ្ញាធរក្រុង-ស្រុក និងមន្ត្រីរាជការជាច្រើនរូប។

ក្នុងកិច្ចប្រជុំ ឯកឧត្តម ហាក់ សុខមករា បានសង្កត់ធ្ងន់ថា ខេត្តកណ្តាលកំពុងមានសន្ទុះអភិវឌ្ឍយ៉ាងលឿន ដូច្នេះការគ្រប់គ្រងសំណង់ត្រូវអនុវត្តឱ្យបានម៉ឺងម៉ាត់ និងត្រឹមត្រូវ ដើម្បីជៀសវាងសំណង់ខុសច្បាប់ និងធានាសុវត្ថិភាពដល់ប្រជាពលរដ្ឋ។

ជាមួយគ្នានេះ ឯកឧត្តម ក៏បានណែនាំឱ្យមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត សហការជាមួយអាជ្ញាធរមូលដ្ឋាន បន្តចុះណែនាំ និងផ្សព្វផ្សាយដល់ម្ចាស់សំណង់ឱ្យយល់ដឹងពីកាតព្វកិច្ច និងការអនុវត្តតាមច្បាប់ ដើម្បីធានាបាននូវសំណង់មានស្តង់ដារ និងរបៀបរៀបរយក្នុងការអភិវឌ្ឍខេត្ត៕