បង្ក្រាបខ្សែបណ្តាញគ្រឿងញៀនធំ! នគរបាលកំពង់ស្ពឺចាប់ខ្លួន៧នាក់ ដកហូតជិត២គីឡូក្រាម

(កំពង់ស្ពឺ)៖ ដោយអនុវត្តតាមបទបញ្ជារបស់លោកឧត្តមសេនីយ៍ទោ ឃឹម សុកខៃ ស្នងការនគរបាលខេត្តកំពង់ស្ពឺ កម្លាំងនគរបាលការិយាល័យប្រឆាំងគ្រឿងញៀន សហការជាមួយនគរបាលស្រុកសំរោងទង និងស្រុកគងពិសី បានបើកប្រតិបត្តិការបង្ក្រាបករណីគ្រឿងញៀនជាបន្តបន្ទាប់ ចាប់ពីថ្ងៃទី៩ ដល់ថ្ងៃទី១៤ ខែមីនា ឆ្នាំ២០២៦។

ប្រតិបត្តិការនេះ សមត្ថកិច្ចបានឃាត់ខ្លួនជនសង្ស័យសរុប ៧នាក់ (ស្រី២នាក់) និងដកហូតម្សៅក្រាមពណ៌សថ្លាសង្ស័យជាគ្រឿងញៀនចំនួន ១៥កញ្ចប់ សរុបទម្ងន់ប្រមាណ ១,៦៩៧.២៧ក្រាម (ជិត២គីឡូក្រាម) ព្រមទាំងវត្ថុតាងមួយចំនួនទៀត រួមមាន ទូរស័ព្ទ៩គ្រឿង ម៉ូតូ២គ្រឿង ជញ្ជីងថ្លឹងគ្រឿងញៀន១ និងឧបករណ៍វេចខ្ចប់គ្រឿងញៀន។

សមត្ថកិច្ចបញ្ជាក់ថា ប្រតិបត្តិការនេះធ្វើឡើងតាមខ្សែបណ្តាញស្រាវជ្រាវជាបន្តបន្ទាប់ ដែលនាំឱ្យឃាត់ខ្លួនមុខសញ្ញាចែកចាយគ្រឿងញៀនជាបន្តៗ នៅក្នុងស្រុកគងពិសី និងស្រុកសំរោងទង ខេត្តកំពង់ស្ពឺ។

បច្ចុប្បន្ន ជនសង្ស័យទាំងអស់ និងវត្ថុតាង ត្រូវបានសមត្ថកិច្ចកសាងសំណុំរឿងបញ្ជូនទៅតុលាការ ដើម្បីចាត់ការតាមនីតិវិធីច្បាប់៕