បើកផ្លូវឱ្យយុវជនបញ្ចេញគំនិត! កម្មវិធី «ជជែកដេញដោលយុវជនថ្នាក់ជាតិ ២០២៦» បើកជាផ្លូវការ

(ភ្នំពេញ)៖នាព្រឹកថ្ងៃទី១៤ ខែមីនា ឆ្នាំ២០២៦ នាយកដ្ឋានអប់រំយុវជន និងកុមារ នៃអគ្គនាយកដ្ឋានយុវជន ក្រសួងអប់រំ យុវជន និងកីឡា បានបើកជាផ្លូវការ កម្មវិធី «ជជែកដេញដោលយុវជនថ្នាក់ជាតិ ២០២៦» ក្រោមអធិបតីភាព ឯកឧត្តម សេរី ជំនះ រដ្ឋលេខាធិការ និងជាតំណាងដ៏ខ្ពង់ខ្ពស់ ឯកឧត្ដម​បណ្ឌិត​សភាចារ្យ​ ហង់ជួន ណារ៉ុន​ ឧបនាយករដ្ឋមន្ត្រី​ រដ្ឋមន្ត្រី​ក្រសួងអប់រំ យុវជន និងកីឡា។

កម្មវិធីនេះមានការចូលរួមពីបេក្ខជន បេក្ខនារីតំណាង ៣២វិទ្យាល័យ មកពីរាជធានីខេត្តទាំង២៥ និងស្ថាប័នយុវជនចំនួន៣ ដើម្បីប្រកួតជម្រុះយក១៦ក្រុម ឆ្ពោះទៅវគ្គបន្ទាប់។

ថ្លែងក្នុងពិធីបើក ឯកឧត្តមបានបញ្ជាក់ថា កម្មវិធីនេះមិនត្រឹមជាការប្រកួតវោហាស័ព្ទប៉ុណ្ណោះទេ ប៉ុន្តែជាវេទិកាសម្រាប់បណ្តុះគំនិតយុវជន ឱ្យចេះគិតវិភាគ បង្ហាញហេតុផល ស្តាប់មតិយោបល់គ្នា និងពង្រឹងភាពជាអ្នកដឹកនាំសម្រាប់អនាគត។

ឯកឧត្ដមបានបញ្ជាក់ទៀតថា កម្មវិធីជជែកដេញដោលយុវជនថ្នាក់ជាតិមានគោលបំណង៖ *១៖ បណ្តុះបណ្តាលយុវជន ឱ្យចេះប្រើប្រាស់វប្បធម៌សន្ទនាតាមរយៈការជជែកដេញដោល និងចូលរួមដោះស្រាយបញ្ហាផ្សេងៗ ដូចពាក្យមួយឃ្លាពោលថា ទស្សនៈខុសគ្នាគឺជាទ្រព្យសម្បិត្តិ ប្រាជ្ញារួមគ្នាគឺជាកម្លាំងក៏សាងជាតិ។*២៖បណ្តុះឱ្យយុវជនចេះសម្លឹងមើលបញ្ហាមួយក្នុងរូបភាពច្រើនជ្រុងជ្រោយ និងដោះស្រាយដោយហេតុផល។*៣៖ពង្រឹងជំនាញនៃការត្រិះរិះពិចារណា ដល់យុវជនចេះគិតមុននឹងជឿ និង ការសិក្សាស្រាវជ្រាវការចែករំលែកគំនិត ជំនាញក្នុងការនិយាយសាធារណៈ។*៤៖ ផ្តល់ឱកាសឱ្យយុវជនបញ្ចេញគំនិតយោបល់ បង្ហាញសមត្ថភាព និងទេពកោសល្យ ជាសាធារណៈក្នុងការជជែកដេញដោលដើម្បីបង្កើតសង្គមពុទ្ធិក្នុងសមរភូមិគំនិត និង ស្វែងរកសុខដុមនីយកម្មសម្រាប់ទាំងអស់គ្នា។*៥៖បង្កើនបណ្តាញទំនាក់ទំនងល្អរវាងយុវជននិងយុវជន ដើម្បីផ្លាស់ប្តូរបទពិសោធគ្នាក្នុងតម្លៃមិត្តភាព។*៦៖បណ្ដុះគំនិតយុវជនខ្មែរឱ្យមានភាពក្លាហាន បញ្ចេញមតិប្រកបដោយក្រមសីលធម៌ និងចំណេះដឹងពិតប្រាកដ។*៦៖បណ្ដុះសមត្ថភាពក្នុងការជជែកដេញដោលដោយសន្តិសហវិជ្ជមាន។*៧៖បង្កើតជាថ្នាលសម្រាប់យុវជនហាត់ការឱ្យរឹងមាំ មានភាពចាស់ទុំនៃគំនិត និងចេះគិតយ៉ាងហ្មត់ចត់។*៨៖ភាពជាអ្នកដឹកនាំ ការពង្រីកទស្សនៈរបស់ខ្លួន ចាប់ពីការអប់រំរហូតដល់អាជីព។

កម្មវិធីជម្រុះជុំទី១ នឹងប្រព្រឹត្តទៅនៅថ្ងៃទី១៤-១៥ និងថ្ងៃទី២១-២២ ខែមីនា ឆ្នាំ២០២៦ តាមប្រព័ន្ធអនឡាញ (Zoom)៕