តុលាការខេត្តព្រះសីហនុកាត់ទោសជនជាតិបរទេស៩នាក់ ពាក់ព័ន្ធករណីគ្រឿងញៀន និងសម្អាតប្រាក់

(ព្រះសីហនុ )៖ សាលាដំបូងខេត្តព្រះសីហនុបានសម្រេចផ្តន្ទាទោសជនជាប់ចោទចំនួន៩នាក់ពាក់ព័ន្ធបទល្មើសផលិត និងជួញដូរគ្រឿងញៀនដោយខុសច្បាប់ សម្អាតប្រាក់ និងប្រើប្រាស់អាវុធដោយគ្មានការអនុញ្ញាត។ ការប្រកាសសាលក្រមនេះ ត្រូវបានធ្វើឡើងនៅថ្ងៃទី១១ ខែមីនា ឆ្នាំ២០២៦ បន្ទាប់ពីសវនាការជាសាធារណៈ ដែលបានបើកកាលពីថ្ងៃទី២៣ ខែធ្នូ ឆ្នាំ២០២៥ និងបន្តនៅថ្ងៃទី៨ ខែមករា ឆ្នាំ២០២៦។

យោងតាមសេចក្ដីប្រកាសព័ត៌មានរបស់អ្នកនាំពាក្យសាលាដំបូងខេត្តព្រះសីហនុ នៅថ្ងៃទី១៣ ខែមីនា ឆ្នាំ២០២៦ បានឲ្យដឹងថា ជនជាប់ចោទ៤នាក់ ត្រូវបានផ្តន្ទាទោសដាក់ពន្ធនាគារអស់មួយជីវិត និងពិន័យជាប្រាក់ម្នាក់ៗ ២០០លានរៀល។ អ្នកទាំងនោះរួមមាន៖ ដូ ធានក្វាង (DO THIEN QUANG), ស៊ាវ ឈីហុង (XIAO QIHONG), ចាង ឈូយ៉ូ (ZHANG CHU YU) និង ថាំង ចាងវ័យ (TANG ZHANG WEI)។

តុលាការបានរកឃើញថា ពួកគេពាក់ព័ន្ធនឹងបទល្មើសផលិត និងជួញដូរគ្រឿងញៀនដោយខុសច្បាប់ សម្អាតប្រាក់ និងប្រើប្រាស់អាវុធដោយគ្មានលិខិតអនុញ្ញាត ដែលបានប្រព្រឹត្តនៅក្រុងព្រះសីហនុ កាលពីថ្ងៃទី១៥ ខែមិថុនា ឆ្នាំ២០២៤។

ដោយឡែក ជនជាប់ចោទម្នាក់ទៀតឈ្មោះ ហេង រិទ្ធិថា អាយុ៣៨ឆ្នាំ ត្រូវបានផ្តន្ទាទោសដាក់ពន្ធនាគាររយៈពេល២០ឆ្នាំ និងពិន័យជាប្រាក់១០០លានរៀល ពីបទសមគំនិតក្នុងអំពើផលិត និងជួញដូរគ្រឿងញៀនដោយខុសច្បាប់ និងសម្អាតប្រាក់។

ចំណែកជនជាប់ចោទ៤នាក់ទៀត រួមមាន៖ ជូ ស៊ាវឡុង (ZHU XIAO LONG), ឡេ ជីអាញ់ហុង (LE THIANH HONG), ថាំង ចាន់តឹង (TANG ZHANG BING) និង យ៉ាង ឈិនស្យុង (YANG CHEN XIONG) ត្រូវបានផ្តន្ទាទោសដាក់ពន្ធនាគារម្នាក់ៗរយៈពេល២ឆ្នាំ ពីបទសមគំនិតក្នុងអំពើរក្សាទុកគ្រឿងញៀនដោយខុសច្បាប់។

ជាមួយគ្នានេះ តុលាការក៏បានសម្រេចហាមឃាត់ជនជាប់ចោទទាំងនេះ (ជនជាតិចិន និងវៀតណាម) មិនឲ្យចូល និងស្នាក់នៅក្នុងដែនដីព្រះរាជាណាចក្រកម្ពុជាវិញឡើយ បន្ទាប់ពីបញ្ចប់ការអនុវត្តទោស។

សម្រាប់វត្ថុតាងពាក់ព័ន្ធនឹងបទល្មើស តុលាការបានសម្រេចរឹបអូសតាមច្បាប់ស្តីពីការត្រួតពិនិត្យគ្រឿងញៀន និងក្រមព្រហ្មទណ្ឌ៕