អធិការថ្មីស្រុកបាទី ត្រូវបានតែងតាំង ខណៈអាជ្ញាធរ ជំរុញឲ្យពង្រឹងសន្តិសុខ និងបម្រើប្រជាពលរដ្ឋឲ្យកាន់តែប្រសើរ

(តាកែវ)៖ លោកឧត្តមសេនីយ៍ទោ ម៉ែន លី ស្នងការនគរបាលខេត្តតាកែវ និងលោក ភួន ឈីម អភិបាលស្រុកបាទី នៅរសៀលថ្ងៃទី១៣ ខែមីនា ឆ្នាំ២០២៦ បានអញ្ជើញជាអធិបតីក្នុងពិធីប្រកាសផ្ទេរភារកិច្ច និងតែងតាំងមុខតំណែង លោកវរសេនីយ៍ទោ មូល សារ៉ាត់ ពីអធិការរង នៃអធិការដ្ឋាននគរបាលស្រុកអង្គរបូរី មកជាអធិការ នៃអធិការដ្ឋាននគរបាលស្រុកបាទី។

ក្នុងពិធីនេះ លោក ភួន ឈីម អភិបាលស្រុកបាទី បានលើកទឹកចិត្ត និងជំរុញឲ្យអធិការថ្មី បន្តដឹកនាំអង្គភាពឲ្យមានប្រសិទ្ធភាព ដើម្បីធានារក្សាសន្តិសុខ សណ្តាប់ធ្នាប់ និងសុវត្ថិភាពសង្គម ជូនប្រជាពលរដ្ឋក្នុងមូលដ្ឋានឲ្យកាន់តែល្អប្រសើរ។

ជាមួយគ្នានេះ លោកឧត្តមសេនីយ៍ទោ ម៉ែន លី ក៏បានផ្តល់អនុសាសន៍ឲ្យអធិការថ្មី ខិតខំដឹកនាំអង្គភាពឲ្យមានប្រសិទ្ធភាព ទាំងការបំពេញភារកិច្ចវិជ្ជាជីវៈ ការកែលម្អ និងអភិវឌ្ឍសមត្ថភាពអង្គភាពបន្ថែម។ ព្រមទាំងត្រូវយកចិត្តទុកដាក់លើការងាររបស់មន្ត្រីជំនាញ និងប៉ុស្តិ៍នគរបាលរដ្ឋបាល ជាពិសេសការជំរុញអនុវត្តគោលនយោបាយ «ភូមិ ឃុំ មានសុវត្ថិភាព» និងបម្រើសេវាសាធារណៈជូនប្រជាពលរដ្ឋឲ្យបានល្អប្រសើរ។

លោកស្នងការនគរបាលខេត្ត ក៏បានសង្កត់ធ្ងន់ឲ្យមន្ត្រីក្នុងអង្គភាព រួមសាមគ្គីគ្នា បំពេញភារកិច្ចដោយទំនួលខុសត្រូវ និងស្មារតីបម្រើប្រជាពលរដ្ឋ៕