ក្រសួងពាណិជ្ជកម្មចុះសម្របសម្រួលទីផ្សារ ដោះស្រាយការកកស្ទះកសិផល ការពារផលប្រយោជន៍កសិករ

(ភ្នំពេញ)៖ ក្រសួងពាណិជ្ជកម្ម បានចេញសេចក្តីជូនដំណឹងជម្រាបជូនសាធារណជន បងប្អូនប្រជាកសិករ និងអាជីវករ អំពីការបន្តចុះសម្របសម្រួលដោះស្រាយបញ្ហាកកស្ទះកសិផលក្នុងស្រុក ដែលកើតឡើងដោយសារការស្រូបចូលទីផ្សារមិនទាន់ទាន់ពេលវេលា ជាពិសេសនៅក្នុងអំឡុងរដូវប្រមូលផល ដើម្បីធានាស្ថិរភាពទីផ្សារ និងការពារផលប្រយោជន៍ជូនដល់ប្រជាកសិករ។ នេះបើតាមសេចក្ដីជូនដំណឹងរបស់ក្រសួងពាណិជ្ជកម្មដែលអង្គភាព The Mirror News ទទួលបាននៅថ្ងៃទី១៣ ខែមីនា ឆ្នាំ២០២៦នេះ។

តាមការបញ្ជាក់របស់ក្រសួង ក្រុមការងារមន្ទីរពាណិជ្ជកម្ម បានចុះសម្របសម្រួលការទិញ–លក់ និងស្វែងរកទីផ្សារជូនប្រជាកសិករ ដោយសហការជាមួយវិស័យឯកជន ក្នុងការប្រមូលទិញបន្លែគ្រប់ប្រភេទ រួមមានត្រប់ស្រួយ ត្រប់វែង និងកសិផលផ្សេងៗ ដែលកំពុងប្រឈមបញ្ហាកកស្ទះទីផ្សារនៅខេត្តបាត់ដំបង ក្នុងតម្លៃសមរម្យ។

ជាមួយគ្នានេះ ក្រសួងពាណិជ្ជកម្ម តាមរយៈមន្ទីរពាណិជ្ជកម្មរាជធានី–ខេត្ត កំពុងបន្តតាមដានស្ថានភាពទីផ្សារកសិផលយ៉ាងសកម្ម ដើម្បីចុះជួយសម្របសម្រួលការកកស្ទះ និងដោះស្រាយបញ្ហាទីផ្សារជាបន្តបន្ទាប់ នៅតាមតំបន់ផលិតកម្ម និងបណ្តារាជធានី–ខេត្តនានា ដែលជួបបញ្ហា។

ក្នុងន័យនេះ ក្រសួងពាណិជ្ជកម្ម ក៏អំពាវនាវឱ្យបងប្អូនប្រជាកសិករ ផ្តល់ព័ត៌មានអំពីករណីកកស្ទះកសិផល មកមន្ទីរពាណិជ្ជកម្មរាជធានី–ខេត្ត ឬទំនាក់ទំនងមកនាយកដ្ឋានអភិវឌ្ឍន៍វិស័យឯកជន នៃអគ្គនាយកដ្ឋានពាណិជ្ជកម្មក្នុងប្រទេស តាមរយៈលេខទូរសព្ទ ០១២ ៧២៣ ៦៤៥ / ០១២ ២៥៩ ៩៩៧ ឬតាមប្រព័ន្ធទូរសព្ទសាធារណៈរបស់ក្រសួងលេខ ១២៦៦ ដើម្បីឱ្យអាជ្ញាធរជំនាញអាចចុះអន្តរាគមន៍ និងសម្របសម្រួលទីផ្សារបានទាន់ពេលវេលា៕