រដ្ឋមន្ត្រី ថោ ជេដ្ឋា៖ “ការតែងតាំងមន្ត្រីមិនមែនចៃដន្យទេ ត្រូវផ្អែកលើសមត្ថភាព និងការខិតខំបំពេញភារកិច្ច”

(បន្ទាយមានជ័យ)៖ ក្នុងពិធីប្រកាសចូលកាន់មុខតំណែងប្រធានមន្ទីរថ្មី នាព្រឹកថ្ងៃទី១២ ខែមីនា ឆ្នាំ២០២៦ នៅសាលប្រជុំរដ្ឋបាលខេត្តបន្ទាយមានជ័យ លោក ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម បានលើកឡើងថា ការតែងតាំងមន្ត្រីមួយរូបឱ្យកាន់តំណែង គឺជាការវាយតម្លៃលើសមត្ថភាព ស្នាដៃ និងការខិតខំបំពេញភារកិច្ច មិនមែនជារឿងចៃដន្យនោះឡើយ។

ពិធីនេះត្រូវបានធ្វើឡើងដើម្បីប្រកាសចូលកាន់មុខតំណែងលោក ឡាយ សុទ្ធី ជាប្រធានមន្ទីរធនធានទឹក និងឧតុនិយម ខេត្តបន្ទាយមានជ័យ ដោយមានការចូលរួមពីលោក ប្លែក វ៉ារី ប្រធានក្រុមប្រឹក្សាខេត្ត និងលោក អ៊ុំ រាត្រី អភិបាលនៃគណៈអភិបាលខេត្ត ព្រមទាំងមន្ត្រីរាជការជាច្រើនរូប។

ក្នុងអង្គពិធី លោករដ្ឋមន្ត្រីបានមានប្រសាសន៍ថា ការប្រកាសតែងតាំងមន្ត្រីថ្មីនៅថ្ងៃនេះ បង្ហាញពីការយកចិត្តទុកដាក់របស់ក្រសួង និងរាជរដ្ឋាភិបាល ចំពោះមន្ត្រីដែលមានគុណវុឌ្ឍិ សមត្ថភាព និងបានបំពេញការងារដោយស្មោះត្រង់ស្របតាមគោលនយោបាយកែទម្រង់ស៊ីជម្រៅរបស់រាជរដ្ឋាភិបាល។

លោកបានបញ្ជាក់ថា៖ «ការតែងតាំងមន្ត្រីមួយរូបឱ្យកាន់តំណែង មិនមែនជារឿងចៃដន្យនោះទេ ប៉ុន្តែជាការទទួលស្គាល់ចំពោះសមត្ថភាព ការខិតខំប្រឹងប្រែង និងការបំពេញភារកិច្ច ដើម្បីលើកកម្ពស់ប្រសិទ្ធភាពការងារ និងការផ្ដល់សេវាសាធារណៈជូនប្រជាពលរដ្ឋ»។

ជាមួយគ្នានេះ លោករដ្ឋមន្ត្រីក៏បានផ្តាំផ្ញើដល់លោក ឡាយ សុទ្ធី ដែលទើបទទួលបានការតែងតាំងថ្មី ឱ្យខិតខំបំពេញភារកិច្ចឱ្យកាន់តែមានប្រសិទ្ធភាព ប្រកាន់ខ្ជាប់គោលការណ៍សមូហភាពដឹកនាំ បុគ្គលទទួលខុសត្រូវ រក្សាសុចរិតភាព និងពង្រឹងសាមគ្គីភាពផ្ទៃក្នុងស្ថាប័ន។

លោកក៏បានលើកទឹកចិត្តឱ្យមន្ទីរធនធានទឹក និងឧតុនិយមខេត្ត បន្តពង្រឹងកិច្ចសហប្រតិបត្តិការជាមួយមន្ទីរ-អង្គភាពពាក់ព័ន្ធ អាជ្ញាធរមូលដ្ឋាន និងដៃគូអភិវឌ្ឍន៍ ដើម្បីធានាការគ្រប់គ្រងធនធានទឹក និងឆ្លើយតបទាន់ពេលវេលាចំពោះគ្រោះធម្មជាតិដែលអាចកើតមានក្នុងមូលដ្ឋាន។

គួរបញ្ជាក់ថា តាមអនុក្រឹត្យរាជរដ្ឋាភិបាលកម្ពុជា លេខ ១៦០ អនក្រ.តត ចុះថ្ងៃទី១១ ខែកុម្ភៈ ឆ្នាំ២០២៦ បានតែងតាំងលោក ឡាយ សុទ្ធី អត្តលេខ ១៦៩១៧០០០២៦ ឋានន្តរស័ក្តិវរមន្ត្រី ថ្នាក់លេខ១ នៃក្របខណ្ឌមន្ត្រីគ្រប់គ្រងរដ្ឋបាល ឱ្យកាន់តំណែងជាប្រធានមន្ទីរធនធានទឹក និងឧតុនិយម ខេត្តបន្ទាយមានជ័យ ជំនួសលោក យឹម ប៊ុនរ៉ុម ដែលបានចូលនិវត្តន៍។

ប្រសាសន៍របស់រដ្ឋមន្ត្រីក៏ត្រូវបានមើលឃើញថា ជាការរំលឹកដល់មន្ត្រីជំនាញក្នុងមូលដ្ឋានឱ្យបន្តពង្រឹងប្រសិទ្ធភាពការងារ និងទទួលខុសត្រូវខ្ពស់ក្នុងការបម្រើប្រជាពលរដ្ឋ៕