រដ្ឋមន្ត្រីព័ត៌មានកោះប្រជុំមន្ទីរព័ត៌មានទូទាំងប្រទេសជំរុញពង្រឹងការផ្សព្វផ្សាយ និងប្រយុទ្ធព័ត៌មានក្លែងក្លាយ!

(ភ្នំពេញ)៖ ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន នៅព្រឹកថ្ងៃទី១២ ខែមីនា ឆ្នាំ២០២៦នេះ បានដឹកនាំកិច្ចប្រជុំជាមួយថ្នាក់ដឹកនាំ និងប្រធានមន្ទីរព័ត៌មានរាជធានី–ខេត្ត ដើម្បីពិនិត្យវឌ្ឍនភាពការងារ និងពិភាក្សាបញ្ហាប្រឈមក្នុងការគ្រប់គ្រងវិស័យព័ត៌មាន និងសោតទស្សន៍នៅមូលដ្ឋាន។ កិច្ចប្រជុំនេះក៏បានលើកឡើងពីការពង្រឹងរបៀបរបបការងារ ការផលិត និងផ្សព្វផ្សាយព័ត៌មាននៅតាមខេត្ត ព្រមទាំងការរៀបចំវេបសាយមន្ទីរព័ត៌មានដោយសហការជាមួយក្រសួងប្រៃសណីយ៍ និងទូរគមនាគមន៍។

ឯកឧត្ដមរដ្ឋមន្ត្រីក៏បានជំរុញឱ្យមន្ត្រីព័ត៌មានគ្រប់ថ្នាក់ ពង្រឹងវិជ្ជាជីវៈសារព័ត៌មាន គោរពក្រមសីលធម៌ និងចូលរួមប្រយុទ្ធប្រឆាំងព័ត៌មានក្លែងក្លាយ ខណៈជំរុញឱ្យមន្ទីរព័ត៌មាននៅតាមរាជធានី–ខេត្ត បន្តផ្សព្វផ្សាយព័ត៌មានអំពីសក្តានុពល ការអភិវឌ្ឍ និងសមិទ្ធផលនានានៅមូលដ្ឋាន ដើម្បីឱ្យប្រជាពលរដ្ឋទទួលបានព័ត៌មានត្រឹមត្រូវ និងទាន់ពេលវេលា៕