កូនតិរច្ឆានគំរាមសម្លាប់ម្តាយ និងបំផ្លិចទ្រព្យសម្បត្តិក្នុងផ្ទះ សមត្ថកិច្ចអាវុធហត្ថកំពង់ស្ពឺចុះឃាត់ខ្លួនភ្លាមៗ

(កំពង់ស្ពឺ)៖ បុរសម្នាក់ត្រូវបានកម្លាំងកងរាជអាវុធហត្ថខេត្តកំពង់ស្ពឺ ចុះបង្ក្រាប និងឃាត់ខ្លួនភ្លាមៗ បន្ទាប់ពីធ្វើសកម្មភាពគំរាមសម្លាប់ម្តាយបង្កើតរបស់ខ្លួន ដុតផ្ទះ និងបំផ្លិចបំផ្លាញទ្រព្យសម្បត្តិនៅក្នុងផ្ទះស្ទើរតែគ្មានសល់ បង្កការភ្ញាក់ផ្អើល និងភ័យខ្លាចដល់អ្នកជិតខាង។ ប្រតិបត្តិការនេះធ្វើឡើងតាមបទបញ្ជារបស់លោកឧត្តមសេនីយ៍ត្រី ម៉េង ស្រ៊ុន មេបញ្ជាការកងរាជអាវុធហត្ថខេត្តកំពង់ស្ពឺ។

តាមព័ត៌មានពីសមត្ថកិច្ចបានឱ្យដឹងថា ហេតុការណ៍នេះ បានកើតឡើងនៅវេលាម៉ោងប្រមាណ ២២:០០នាទីយប់ ថ្ងៃទី១០ ខែមីនា ឆ្នាំ២០២៦ បន្ទាប់ពីមណ្ឌលប្រតិបត្តិការ Hotline ១២៩២ បានទទួលការហៅទូរសព្ទពីស្ត្រីម្នាក់ឈ្មោះ ដូង មិនា អាយុ៤១ឆ្នាំ រាយការណ៍អំពីករណីហិង្សាក្នុងគ្រួសារ និងការបំផ្លិចបំផ្លាញទ្រព្យសម្បត្តិ ដែលកើតឡើងនៅភូមិផ្លូវជ្រូក ឃុំសែនដី ស្រុកសំរោងទង ខេត្តកំពង់ស្ពឺ។

ភ្លាមៗក្រោយទទួលព័ត៌មាន កម្លាំងមន្ទីរស្រាវជ្រាវ និងបង្ក្រាបបទល្មើស បានសហការជាមួយកម្លាំងមូលដ្ឋានកងរាជអាវុធហត្ថស្រុកសំរោងទង ចុះអន្តរាគមន៍ដល់ទីតាំងកើតហេតុ និងបានធ្វើការឃាត់ខ្លួនជនសង្ស័យឈ្មោះ ដូង ឧត្តម ភេទប្រុស អាយុ៣៣ឆ្នាំ មុខរបរមិនពិតប្រាកដ រស់នៅទីតាំងកើតហេតុខាងលើ។

ជនរងគ្រោះដែលត្រូវជាម្តាយបង្កើតមានឈ្មោះ ជឹម អូន អាយុ៦២ឆ្នាំ។ ក្នុងប្រតិបត្តិការនេះ សមត្ថកិច្ចបានដកហូតវត្ថុតាងមួយចំនួន រួមមានកាំបិតផ្គាក់ចំនួន ០១ដើម។

បច្ចុប្បន្ន ជនសង្ស័យ និងវត្ថុតាង ត្រូវបានកម្លាំងជំនាញកសាងសំណុំរឿង ដើម្បីចាត់ការបន្តតាមនីតិវិធីច្បាប់។

កងរាជអាវុធហត្ថខេត្តកំពង់ស្ពឺក៏បានអំពាវនាវដល់ប្រជាពលរដ្ឋទាំងអស់ ឱ្យចូលរួមរាយការណ៍ភ្លាមៗតាមលេខអន្តរាគមន៍បន្ទាន់ ១២៩២ នៅពេលប្រទះឃើញ ឬសង្ស័យថាមានអំពើហិង្សា ឬហេតុការណ៍បង្កអសន្តិសុខផ្សេងៗ ដើម្បីឱ្យសមត្ថកិច្ចអាចចុះអន្តរាគមន៍បានទាន់ពេលវេលា។

សមត្ថកិច្ចបានបញ្ជាក់ថា អំពើហិង្សាក្នុងគ្រួសារ គឺជាអំពើខុសច្បាប់ធ្ងន់ធ្ងរ ដែលប៉ះពាល់ដល់សុវត្ថិភាព សេចក្តីថ្លៃថ្នូរ និងសន្តិសុខសង្គម ហើយត្រូវការការចូលរួមពីគ្រប់ភាគីក្នុងការទប់ស្កាត់ និងបង្ការ៕