សំណង់អត់ច្បាប់កំពុងសាងសង់យ៉ាងរលូន ខណៈអាជ្ញាធរស្រុកកណ្ដាលស្ទឹងបានត្រឹមឆ្លើយថា «គេសុំទៅក្រសួងមិនឆ្លងស្រុក» បង្កចម្ងល់ពីប្រសិទ្ធភាពនៃការគ្រប់គ្រង

(កណ្ដាល)៖ ប្រភពព័ត៌មានបានឲ្យដឹងថា មានសំណង់ឃ្លាំងមួយកន្លែង ស្ថិតនៅភូមិបាង ឃុំដើមឬស ស្រុកកណ្ដាលស្ទឹង ខេត្តកណ្ដាល ត្រូវបានគេសង្ស័យថា កំពុងសាងសង់ដោយមិនទាន់មានការអនុញ្ញាតត្រឹមត្រូវតាមផ្លូវច្បាប់នៅឡើយ។ ទោះជាយ៉ាងណា សំណង់នេះនៅតែបន្តដំណើរការសាងសង់យ៉ាងសកម្ម និងរលូន ដោយមិនឃើញមានវិធានការទប់ស្កាត់ឬការផ្អាកពីសំណាក់អាជ្ញាធរពាក់ព័ន្ធឡើយ។

ជុំវិញករណីនេះ លោក អ៊ូច សាវឿន អភិបាលស្រុកកណ្ដាលស្ទឹង បានប្រាប់អង្គភាព The Mirror News ថា បញ្ហាខាងលើ ពាក់ព័ន្ធនឹងថ្នាក់ក្រសួង ហើយបានលើកឡើងថា «ថ្នាក់ក្រសួងមិនឆ្លងស្រុកទេ»។ ការឆ្លើយតបបែបនេះ បានធ្វើឲ្យមតិសាធារណៈមួយចំនួនមានការងឿងឆ្ងល់ថា តើអាជ្ញាធរមូលដ្ឋានមានតួនាទី និងសមត្ថកិច្ចយ៉ាងណាក្នុងការត្រួតពិនិត្យ ឬទប់ស្កាត់សំណង់ដែលមិនទាន់មានច្បាប់ នៅក្នុងដែនសមត្ថកិច្ចរបស់ខ្លួន។

បើតាមមន្ត្រីជំនាញមួយរូបទៀតបានបញ្ជាក់ថា កន្លងមកក្រុមការងារជំនាញបានចុះសួរនាំអំពីសំណង់នេះរួចហើយ ហើយក៏បានរាយការណ៍ជូនលោកចៅហ្វាយស្រុកផងដែរ។ នៅក្នុងកំណត់ហេតុចុះថ្ងៃទី២៧ ខែកុម្ភៈ ឆ្នាំ២០២៦ បានបង្ហាញថា ម្ចាស់សំណង់រោងចក្រធ្វើពូកឈ្មោះ ចៅ សីគុណ កំពុងដាក់ពាក្យសុំអាជ្ញាបណ្ណទៅក្រសួងពាក់ព័ន្ធ។

ទោះជាយ៉ាងណា ការអនុញ្ញាតឲ្យសំណង់ដែលមិនទាន់ទទួលបានអាជ្ញាបណ្ណតាមផ្លូវច្បាប់ បន្តសាងសង់ដោយគ្មានការផ្អាក ឬវិធានការបណ្តោះអាសន្នពីអាជ្ញាធរ បានបង្កឲ្យមានការរិះគន់ពីមតិសាធារណៈថា ប្រព័ន្ធត្រួតពិនិត្យនៅមូលដ្ឋានហាក់បីដូចជាមិនទាន់មានប្រសិទ្ធភាពគ្រប់គ្រាន់។

ជុំវិញការលើកឡើងពាក់ព័ន្ធឃ្លាំងខាងលើ លោក ណាំ វុទ្ធី មន្ត្រីភូមិបាលស្រុក បានឆ្លើយតបជាមួយអ្នកសារព័ត៌មានថា ក្រុមការងារជំនាញបានចុះទៅសួរនាំម្ចាស់ទីតាំងរួចហើយ ហើយម្ចាស់ទីតាំងបានអះអាងថា ខ្លួនមានឯកសារច្បាប់ និង​ នឹងយកមកបង្ហាញជូនមន្ត្រីជំនាញនៅពេលក្រោយ។

ទោះជាយ៉ាងណា ការឆ្លើយតបរបស់មន្ត្រីជំនាញក្នុងលក្ខណៈនេះ ត្រូវបានមតិសាធារណៈមួយចំនួនមើលឃើញថា ហាក់បីដូចជាមិនទាន់បង្ហាញពីភាពច្បាស់លាស់ និងការទទួលខុសត្រូវពេញលេញក្នុងការពិនិត្យផ្ទៀងផ្ទាត់ឯកសារជាក់ស្ដែងនោះទេ។ ជាពិសេស នៅពេលដែលសំណង់ ឬឃ្លាំងមួយបានដំណើរការឬសាងសង់ទៅមុខរួចហើយ ការពឹងផ្អែកតែការអះអាងពីម្ចាស់ទីតាំង ដោយមិនទាន់មានការបង្ហាញឯកសារច្បាប់ជាក់ស្ដែង អាចបង្កឲ្យមានចម្ងល់ពីប្រជាពលរដ្ឋជុំវិញតម្លាភាព និងប្រសិទ្ធភាពនៃការអនុវត្តច្បាប់។

មហាជនមួយចំនួនបានលើកឡើងថា មន្ត្រីជំនាញគួរតែបង្ហាញលទ្ធផលនៃការពិនិត្យឯកសារ ឬបញ្ជាក់ឲ្យបានច្បាស់ថា សំណង់ ឬឃ្លាំងនោះមានអាជ្ញាបណ្ណត្រឹមត្រូវដែរឬទេ ដើម្បីបញ្ចប់ចម្ងល់ និងបង្កើនទំនុកចិត្តរបស់សាធារណៈចំពោះការអនុវត្តច្បាប់។

អ្នកសង្កេតការណ៍សង្គមមួយចំនួនក៏បានលើកឡើងផងដែរថា ដើម្បីរក្សារបបច្បាប់ និងធានាឲ្យការអភិវឌ្ឍមានរបៀបរៀបរយ អាជ្ញាធរមូលដ្ឋានគួរតែបង្ហាញភាពសកម្មក្នុងការត្រួតពិនិត្យ និងអនុវត្តវិធានការតាមច្បាប់ឲ្យបានតឹងរ៉ឹងជាងនេះ។ ព្រោះប្រសិនបើសំណង់អត់ច្បាប់ត្រូវបានអនុញ្ញាតឲ្យសាងសង់បន្តដោយគ្មានការទប់ស្កាត់ នោះវាអាចបង្កជាគំរូមិនល្អ និងធ្វើឲ្យវិន័យនៃការគោរពច្បាប់នៅក្នុងសង្គមទទួលរងផលប៉ះពាល់។

ជាមួយគ្នានេះ មតិសាធារណៈក៏សង្ឃឹមថា អាជ្ញាធរពាក់ព័ន្ធទាំងថ្នាក់មូលដ្ឋាន និងថ្នាក់ជាតិ នឹងពិនិត្យស្រាវជ្រាវករណីនេះ ឲ្យបានច្បាស់លាស់ ដើម្បីធានាថា ការអភិវឌ្ឍសំណង់នៅក្នុងតំបន់ ត្រូវអនុវត្តតាមនីតិវិធី និងបទប្បញ្ញត្តិច្បាប់យ៉ាងត្រឹមត្រូវ៕