មេខ្លោងល្បែងស៊ីសងខុសច្បាប់ប្រចាំស្រុកស្អាង ឈ្មោះ ឡាយ លាងឈាង ត្រូវបានកម្លាំងអាជ្ញាធរខេត្តកណ្ដាលចាប់ឃាត់ខ្លួន ខណៈចៅក្រមសាលាដំបូងខេត្តកណ្តាលចេញដីកាឃុំខ្លួនហើយ!
(កណ្ដាល)៖ ចៅក្រមជំនុំជម្រះ នៃសាលាដំបូងខេត្តកណ្តាល លោក ហោ ចាន់ពិសី នៅថ្ងៃទី១០ ខែមីនា ឆ្នាំ២០២៦នេះ បានចេញដីកាបង្គាប់ឱ្យឃុំខ្លួនឈ្មោះ ឡាយ លាងឈាង ភេទប្រុស អាយុ ៤៥ឆ្នាំ ជនជាតិខ្មែរ មុខរបរកសិករ ទីកន្លែង កំណើត ភូមិក្បាលកោះលិច ឃុំកោះខ្សាច់ទន្លា ស្រុកស្អាង ខេត្តកណ្តាល ទីលំនៅបច្ចុប្បន្នភូមិក្បាលកោះលិច ឃុំកោះខ្សាច់ទន្លា ស្រុកស្អាង ខេត្តកណ្តាលជាប់ចោទពីបទ៖ «ចាត់ចែងល្បែងស៊ីសង និងបើកកន្លែងលេងល្បែងស៊ីសងខុសច្បាប់ (ជល់មាន់)» នៅចំណុចចំការស្វាយ ស្ថិតនៅភូមិទួលស្ពឺ ឃុំតាលន់ ស្ថិតនៅភូមិទួលក្តី ឃុំត្រើយស្លា និងនៅភូមិស្វាយប្រទាល ឃុំស្វាយប្រទាល ក្នុងស្រុកស្អាង ខេត្តកណ្តាល។នេះបើតាមប្រភពដែលអង្គភាព The Mirror News ទទួលបាននៅថ្ងៃទី១០ ខែមីនា ឆ្នាំ២០២៦នេះ។
ប្រភពបានបន្តថា ជនជាប់ចោទខាងលើនេះ បានប្រព្រឹត្តចាប់តាំងពីអំឡុងឆ្នាំ២០២៣ រហូតដល់ថ្ងៃទី០៧ ខែមីនា ឆ្នាំ២០២៦។ ប្រភពបន្ថែមថា ចំពោះជនជាប់ចោទឈ្មោះ ឡាយ លាងឈាង ត្រូវបានលោក ហោ ចាន់ពិសី ចៅក្រមជំនុំជម្រះ នៃសាលាដំបូងខេត្តកណ្តាលបញ្ជាឱ្យភ្នាក់ងារមានសមត្ថកិច្ចនៃកងកម្លាំងសាធារណៈធ្វើការនាំខ្លួនទៅប្រធានពន្ធនាគារខេត្តកណ្តាល ដោយអនុវត្តឱ្យបានត្រឹមត្រូវតាមច្បាប់។ និងបានបង្គាប់ឱ្យប្រធានពន្ធនាគារខេត្តកណ្តាលទទួលជននេះ និងឃុំខ្លួនជននេះរហូតដល់មានបទបញ្ជាថ្មីសម្រេច ផ្សេងពីនេះ។
គួររំលឹកថា កាលពីវេលាម៉ោង ១៥៖០០នាទី ថ្ងៃទី៧ ខែមីនា ឆ្នាំ២០២៦ លោក ណុប តារា អភិបាលរងខេត្តកណ្តាល ដោយមានសម្របសម្រួលនិតិវិធីដោយ
លោក រ៉ែន នរិន្ទ ព្រះរាជអាជ្ញារងអមសាលាខេត្តកណ្តាល បានដឹកនាំកម្លាំងគណ:បញ្ជាការឯកភាពស្រុក កម្លាំងជំនាញកងរាជអាវុធខេត្ត-ស្រុក ចុះប្រតិបត្តិការ បង្ក្រាបបទល្មើសល្បែងស៊ីសងខុសច្បាប់ជល់មាន់ និងឃាត់ខ្លួនមេខ្លោងបានម្នាក់ ដកហូតម៉ូតូចំនួន១៩គ្រឿង និងសម្ភារ:សម្រាប់ការភ្នាល់ជល់មាន់មួយចំនួនទៀត នៅចំណុចចំការស្វាយមួយកន្លែង តែមិនស្គាល់ម្ចាស់នៅក្នុងភូមិទួលក្តី ឃុំត្រើយស្លា ស្រុកស្អាង ខេត្តកណ្តាល ។
កម្លាំងសមត្ថកិច្ចបានឃាត់ខ្លួនជនសង្ស័យម្នាក់ជាមេខ្លោងឈ្មោះ ឡាយ លាងឈាង ភេទប្រុស អាយុ៤៥ឆ្នាំជនជាតិខ្មែរ មុខរបរ កសិករ មានទីលំនៅ ភូមិក្បាលកោះ (លិច) ឃុំកោះខ្សាច់ទន្លា ស្រុកស្អាង ខេត្តកណ្តាល រួមជាមួយវត្ថុតាងចាប់បានមាន៖ មាន់ជល់៣ក្បាល(ងាប់ទាំង០៣) ជញ្ជីងថ្លឹងមាន់០១គ្រឿង កន្រ្តក់ដាក់មាន់ចំនួន០៩ ចានបាញ់អាប៉ោង០១ តុបាញ់អាប៉ោង០១ កៅអីជរ័ចំនួន៧០ ស្បែកជើងចំនួន០៦គូរ និង ម៉ូតូចំនួន១៩គ្រឿង(សេ១២៥ចំនួន១០គ្រឿង ម៉ូតូគប់ចង្គៀងម៉ូលចំនួន០៥គ្រឿង ម៉ូតូវ៉េវ ចំនួន០៣គ្រឿង ម៉ូតូនិច០១គ្រឿង) ទូរសព្ទដៃចំនួន០៣គ្រឿង។
ជនសង្សយ័បានសារភាពថា ខ្លួនគេតែងតែណាត់អ្នកជល់មាន់ មានចំនួន០២ទីតាំងរួមមាននៅភូមិទួលស្ពឺ ឃុំតាលន់ និងភូមិទួលក្តី ឃុំត្រើយស្លា ស្រុកស្អាង ខេត្តកណ្តាល។ ចំពោះការណាត់គ្នាលេងល្បែងជល់មាន់នេះ គឺខ្លួនគេបានចាត់ចែងឲ្យក្រុមអ្នកសារព័ត៌មានតាមហ្គ្រុប តេកេក្រាម ប្រហែលជា ១០អង្គភាព ដោយក្នុងមួយអង្គភាព ខ្លួនបានឲ្យលុយចំនួន ០២មុឺនរៀល ឬ០៦មុឺនរៀល ០៨មុឺនរៀល តាមអង្គភាពសារព័ត៌មានតូចធំ។ ក្រោយមកជនសង្ស័យនិងវត្ថុតាង ត្រូវបានកម្លាំងជំនាញបញ្ជូនទៅបញ្ជាការដ្ឋានកងរាជអាវុធហត្ថខេត្តដើម្បីបន្តនីតិវិធី។
បច្ចុប្បន្ន ជនជាប់ចោទឈ្មោះ ឡាយ លាងឈាង ត្រូវបានលោក ហោ ចាន់ពិសី ចៅក្រមជំនុំជម្រះនៃសាលាដំបូងខេត្តកណ្តាល ចេញដីកាបង្គាប់ឱ្យឃុំខ្លួនពីបទ៖ «ចាត់ចែងល្បែងស៊ីសង និងបើកកន្លែងលេងល្បែងស៊ីសងខុសច្បាប់ (ជល់មាន់)» នៅចំណុចចំការស្វាយ ស្ថិតនៅភូមិទួលស្ពឺ ឃុំតាលន់ ស្ថិតនៅភូមិទួលក្តី ឃុំត្រើយស្លា និងនៅភូមិស្វាយប្រទាល ឃុំស្វាយប្រទាល ក្នុងស្រុកស្អាង ខេត្តកណ្តាលហើយ៕
