អភិបាលក្រុងតាខ្មៅណែនាំឱ្យបញ្ឈប់រាល់សកម្មភាពការដាក់តាំង ការលក់ដូរ និងការចតរថយន្តឈ្នួល នៅទីតាំងសួនច្បារច្រមុះជ្រូក និងផ្លូវជុំវិញសួនច្បារច្រមុះជ្រូក ជិតរង្វង់មូលលោកតាខ្មៅឱ្យបានមុនថ្ងៃទី ១៥ ខែមីនា ឆ្នាំ២០២៦ជាកំហិត

(កណ្ដាល)៖ អភិបាលក្រុងតាខ្មៅ លោក ឃឹម សំភារ នៅថ្ងៃទី៩ ខែមីនា ឆ្នាំ២០២៦ បានចេញសេចក្តីជូនដំណឹងស្តីពីការរៀបចំសណ្តាប់តាមដងផ្លូវសាធារណៈជុំវិញសួនច្បារច្រមុះជ្រូក ជិតរង្វង់មូល លោកតាខ្មៅ ក្នុងភូមិសាស្ត្រ ភូមិតាខ្មៅ២ សង្កាត់តាខ្មៅ ក្រុងតាខ្មៅ ខេត្តកណ្តាល។ នេះបើតាមសេចក្ដីជូនដំណឹងដែលអង្គភាព The Mirror News ទទួលបាននៅថ្ងៃទី១០ ខែមីនា ឆ្នាំ២០២៦នេះ។

លោកអភិបាលក្រុងបញ្ជាក់ឱ្យអាជីវករ លក់ដូរ និងអ្នកចតរថយន្តឈ្នួល នៅទីតាំងសួនច្បារច្រមុះជ្រូក និងផ្លូវជុំវិញសួនច្បារច្រមុះជ្រូក ជិតរង្វង់មូលលោកតាខ្មៅ ស្ថិតនៅក្នុងភូមិសាស្ត្រ ភូមិតាខ្មៅ២ សង្កាត់តាខ្មៅ ក្រុងតាខ្មៅ ខេត្តកណ្តាលជ្រាបថា៖ ការលក់ដូរលើផ្លូវ លើចិញ្ចើមផ្លូវ លើសួនច្បារ និងការយកដងផ្លូវធ្វើជាចំណតរថយន្ត របស់បងប្អូន បានធ្វើឱ្យប៉ះពាល់ដល់សណ្តាប់ធ្នាប់សាធារណៈ បង្កការលំបាកក្នុងការធ្វើដំណើររបស់បងប្អូនប្រជាពលរដ្ឋ ការកកស្ទះចរាចរណ៍ និងសោភ័ណភាពទីក្រុងតាខ្មៅផងដែរ។

លោក ឃឹម សំភារ អភិបាលក្រុងតាខ្មៅធ្វើការណែនាំដល់បងប្អូនប្រជាពលរដ្ឋដែលមានការពាក់ព័ន្ធ ដូចខាងក្រោម៖

*១. ត្រូវបញ្ឈប់រាល់សកម្មភាពការដាក់តាំងការលក់ដូរ និងការចតរថយន្តឈ្នួល នៅទីតាំង ខាងលើឱ្យបានមុនថ្ងៃទី ១៥ ខែមីនា ឆ្នាំ២០២៦ជាកំហិត។

*២. ផុតកំណត់កាលបរិច្ឆេទខាងលើ ក្នុងករណីមិនអនុវត្តតាមខ្លឹមសារនៃសេចក្តីជូន ដំណឹងនេះ រដ្ឋបាលក្រុងតាខ្មៅ នឹងចាត់វិធានការទៅតាមផ្លូវច្បាប់យ៉ាងម៉ឺងម៉ាត់បំផុត ហើយរាល់ការខូចខាតបាត់បង់ទ្រព្យសម្បត្តិរបស់បងប្អូន រដ្ឋបាលក្រុងតាខ្មៅ មិនទទួល ខុសត្រូវឡើយ៕