ឯកឧត្ដម ជុំ កុសល៖ មនុស្សម្នាក់ៗអាចមានតួនាទី និងភារកិច្ចខុសៗគ្នា ប៉ុន្តែគោលដៅរួមគឺដើម្បីជាតិ និងប្រជាជនដូចគ្នា ដូច្នេះ លោក ផន ផល្លា មិនគួរទាញយកគុណសម្បត្តិទុកតែខ្លួនឯងឡើយ

(ភ្នំពេញ)៖ រដ្ឋលេខាធិការនៃក្រសួងព័ត៌មាន ឯកឧត្ដម ជុំ កុសល បានផ្ញើសារជូនទៅកាន់លោក ផន ផល្លា (Phalla Pharn) ដោយបញ្ជាក់ថា លោកមិនមានបំណងឆ្លើយឆ្លងវែងឆ្ងាយនោះទេ ប៉ុន្តែគ្រាន់តែចង់ពន្យល់ឲ្យយល់បន្ថែមបន្តិចប៉ុណ្ណោះ។ ឯកឧត្ដមបានរំលឹកថា កន្លងមកលោកតែងតែកោតសរសើរចំពោះទឹកចិត្តរបស់ ផន ផល្លា ដែលបានចូលរួមជួយដល់កុមារកំព្រា និងកុមារគ្មានទីពឹងជាច្រើន។

យ៉ាងណាក៏ដោយ ឯកឧត្ដមបានអំពាវនាវឲ្យប្រើវិចារណញ្ញាណឲ្យបានជ្រៅជាងនេះ ក្នុងការយល់ដឹងអំពី “សិទ្ធិ” របស់បុគ្គលក្នុងការបញ្ចេញមតិលើស្ថានការណ៍នានា មិនថាក្នុងប្រទេស ឬក្រៅប្រទេសឡើយ។ ឯកឧត្ដមបានបញ្ជាក់ថា សិទ្ធិបញ្ចេញមតិមិនត្រូវបានហាមឃាត់ឡើយ ប៉ុន្តែការប្រើប្រាស់សិទ្ធិនោះត្រូវស្ថិតនៅក្នុងបន្ទាត់ច្បាប់ និងធ្វើឡើងដោយការទទួលខុសត្រូវ។

ក្នុងសារដដែល ឯកឧត្ដមបានលើកជាសំណួរថា ការផ្តល់ព័ត៌មាន និងការបញ្ចេញទស្សនៈលើបញ្ហានានា តើពិតជាខុសឆ្គងដល់ថ្នាក់ណា ឬត្រូវបានបកស្រាយថាជាការបំផ្លាញជាតិដែរ​ឬទេ។ ឯកឧត្ដមបានបញ្ជាក់ថា ការយល់ថាមានមនុស្សមួយចំនួនមើលឃើញតែបញ្ហាខាងក្រៅ ខណៈមិនយកចិត្តទុកដាក់បញ្ហាខាងក្នុង គឺជាការយល់ខុស។

ឯកឧត្ដម ជុំ កុសល ក៏បានសង្កត់ធ្ងន់ថា មនុស្សម្នាក់ៗអាចមានតួនាទី និងភារកិច្ចខុសៗគ្នា ប៉ុន្តែគោលដៅរួមគឺដើម្បីជាតិ និងប្រជាជនដូចគ្នា។ ដូច្នេះ មិនគួរគិតថាមានតែខ្លួនឯងប៉ុណ្ណោះដែលគិតគូរពីបញ្ហាខាងក្នុងនោះទេ ហើយក៏មិនគួរទាញយកគុណសម្បត្តិទុកតែខ្លួនឯងឡើយ ប៉ុន្តែគួរចែករំលែក និងយល់ចិត្តគ្នាទៅវិញទៅមក។គួរជម្រាបថា ការលើកឡើងរបស់ បន្ទាប់ពីលោក ផ​ន​ ផល្លា បានលើកឡើងតាមបណ្ដាញសង្គមហ្វេសប៊ុករបស់លោកដោយមានភ្ជាប់រូបឯកឧត្ដម ជុំ កុសល និងលោក សយ​ សុភាព ដោយមានខ្លឹមសារថា«ខ្លះប្រឹងវិភាគរឿងជើងមេឃ តែភ្លេចក្រឡេកមើលជើងមុង មូសហើរចូលទីដល់ខាងក្នុង ហើរខំាភូមិរត់ខ្ចាត់ខ្ចាយ»៕