ឯកឧត្តម ហែម វណ្ណឌី៖ ការពង្រឹងមូលដ្ឋានគ្រឹះអប់រំនៅកម្រិតបឋមសិក្សា គឺជាចំណុចចាប់ផ្តើមដ៏សំខាន់បំផុត ដើម្បីឈានទៅសម្រេចបាននូវសង្គមមួយដែលផ្អែកលើចំណេះដឹង វិទ្យាសាស្ត្រ និងបច្ចេកវិទ្យា

(ពោធិ៍សាត់)៖ ឯកឧត្តម ហែម វណ្ណឌី បានលើកឡើងថា៖ «ការពង្រឹងមូលដ្ឋានគ្រឹះអប់រំនៅកម្រិតបឋមសិក្សា គឺជាចំណុចចាប់ផ្តើមដ៏សំខាន់បំផុត ដើម្បីឈានទៅសម្រេចបាននូវសង្គមមួយដែលផ្អែកលើចំណេះដឹង វិទ្យាសាស្ត្រ និងបច្ចេកវិទ្យា»។ ឯកឧត្តមបានផ្តោតពីសារសំខាន់នៃការពង្រឹងការអប់រំជាមូលដ្ឋាននៃការអភិវឌ្ឍជាតិ។

ការលើកឡើងរបស់ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ក្នុងពិធីសម្ពោធដាក់ឱ្យប្រើប្រាស់ជាផ្លូវការអគារសិក្សាថ្មីមួយខ្នង និងបរិក្ខានានា នៅក្នុងសាលាបឋមសិក្សាពោធិ៍សាត់ ស្ថិតនៅឃុំផ្ទះព្រៃ ក្រុងពោធិ៍សាត់ ដោយមានការអញ្ជើញចូលរួមពីឯកឧត្តម កែវ រតនៈ រដ្ឋមន្ត្រីក្រសួងរ៉ែ និងថាមពលផងដែរ។

អគារសិក្សាថ្មីនេះ មានកម្ពស់២ជាន់ មាន១០បន្ទប់ ដែលត្រូវបានសាងសង់ឡើង ដើម្បីកាត់បន្ថយភាពចង្អៀតក្នុងថ្នាក់រៀន ខណៈចំនួនសិស្សកំពុងកើនឡើងជាបន្តបន្ទាប់។ យោងតាមរបាយការណ៍សាលា បច្ចុប្បន្ន សាលាបឋមសិក្សាពោធិ៍សាត់មានគ្រូបង្រៀនចំនួន ៦៥នាក់ និងសិស្សសរុប ២.៧៤៤នាក់។ ថ្នាក់រៀនខ្លះមានសិស្សរហូតដល់ ៥៨នាក់ ដែលលើសពីកម្រិតស្តង់ដារ និងបង្កឱ្យមានភាពចង្អៀតក្នុងថ្នាក់រៀន។

គម្រោងសាងសង់នេះ ប្រើប្រាស់ថវិកាប្រមាណ ២៦ម៉ឺនដុល្លារអាមេរិក ជាជំនួយពីមូលនិធិបម្រើផលប្រយោជន៍សង្គមរបស់រដ្ឋាករទឹកស្វយ័តក្រុងភ្នំពេញ និងសមាគមអតីតសិស្សខេត្តពោធិ៍សាត់នៅក្រៅប្រទេស។ គម្រោងក៏បានផ្គត់ផ្គង់បរិក្ខារសិក្សាបន្ថែម រួមមានឧបករណ៍បញ្ចាំងស្លាយ (LCD) ចំនួន៥ឈុត តុ-កៅអីសិស្ស ១៥០ឈុត តុ-កៅអីគ្រូ ១០ឈុត និងក្តារខៀន ១០ផ្ទាំង។

ឯកឧត្តម ហែម វណ្ណឌី បានបន្ថែមថា ប្រព័ន្ធនវានុវត្តន៍ ឬឧស្សាហកម្ម ៤.០ មិនអាចអភិវឌ្ឍជោគជ័យបានទេ លុះត្រាតែកុមារ និងយុវជនជំនាន់ក្រោយទទួលបានការអប់រំប្រកបដោយគុណភាព និងបរិយាកាសសិក្សាសមរម្យ ចាប់តាំងពីកម្រិតបឋមសិក្សា។

គម្រោងសាងសង់អគារសិក្សាថ្មី និងបរិក្ខារសិក្សាទាំងនេះ ត្រូវបានរំពឹងថានឹងជួយកាត់បន្ថយភាពចង្អៀតក្នុងថ្នាក់រៀន កែលម្អបរិយាកាសសិក្សា និងលើកទឹកចិត្តដល់លោកគ្រូអ្នកគ្រូ និងសិស្សានុសិស្ស ឱ្យទទួលបានលទ្ធផលសិក្សាកាន់តែល្អប្រសើរ ដើម្បីរួមចំណែកអភិវឌ្ឍមូលធនមនុស្សនៅក្នុងខេត្តពោធិ៍សាត់៕