ទីតាំងល្បែងស៊ីសងច្រើនប្រភេទខុសច្បាប់ទ្រង់ទ្រាយធំ១កន្លែង នៅក្នុងក្រុងបានលុង ខេត្តរតនគិរី បើកដំណើរការយ៉ាងគគ្រឹកគគ្រេង!

(រតនគិរី)៖ ទីតាំងល្បែងស៊ីសងច្រើនប្រភេទខុសច្បាប់ទ្រង់ទ្រាយធំ១កន្លែង ស្ថិតក្នុងភូមិជ្រៃ សង្កាត់យក្សឡោម ក្រុងបានលុង ខេត្តរតនគិរី បើកដំណើរការយ៉ាងគគ្រឹកគគ្រេង ដែលករណីនេះ បង្កឱ្យមានការរិះគន់ និងព្រួយបារម្ភយ៉ាងខ្លាំងពីបញ្ហាសុវត្ថិភាព និងសណ្តាប់ធ្នាប់សាធារណៈ។ វង់ល្បែងនេះបានចាប់ផ្តើមដំណើរការយ៉ាងចំហចាប់តាំងពីថ្ងៃទី០៥ ខែមីនា ឆ្នាំ២០២៦។ សកម្មភាពល្បែងនៅទី នោះមានច្រើនប្រភេទ៖ យូគី អាប៉ោង ល្បែងជល់មាន់ដែលទាក់ទាញមនុស្សឱ្យចូលមក លេងយ៉ាងច្រើនកុះករ។ នេះបើតាមប្រភពដែលអ្នកសារព័ត៌មានទទួលបាននៅថ្ងៃទី៦ ខែមីនា ឆ្នាំ២០២៦នេះ។

ប្រភពបានបង្ហើបឱ្យដឹងថា ពួកគេមានការសង្ស័យដោយបានលើកឡើងចំៗទៅលើបុគ្គលមួយចំនួនដែលជាអ្នកនៅពីក្រោយ និងបានគ្រប់គ្រងទីតាំងនេះ រួមមានឈ្មោះ ងួន សុវណ្ណា (ហៅអូនធំ) និងឈ្មោះ មេសា ដែលត្រូវបានគេអះអាងថា ជាអ្នកចាត់ចែងផ្ទាល់នៅទីតាំង។ ហើយក៏មានការលើកឡើងពីការពាក់ព័ន្ធរបស់បុគ្គលមានងារជាឧកញ៉ាម្នាក់ផងដែរ។

ក្រុមអ្នកញៀនល្បែងស៊ីសងបានប្រាប់តៗគ្នាថា មេវង់ល្បែងសូមឱ្យស្ងាត់ស្ងៀម ពីព្រោះគេកំពុងរៀបចំទីតាំងថ្មីដែលរំពឹងថា នឹងដំណើរការនៅក្នុងពេលឆាប់ៗ។ ដូច្នេះមានន័យថា ថៅកែវង់ល្បែងនេះ មិនលះបង់គំនិតនោះទេ បន្ទាប់ពីបានបោះទុនវិនិយោគក្នុងការរៀបផែនការបង្កើតវង់ល្បែងស៊ីសងនៅក្រុងបានលុងនេះ។ នេះបើតាមប្រភពបន្ថែមដែលអ្នកសារព័ត៌មានទទួលបាន។

ប្រភពបន្តទៀតថា កន្លងមកអាជ្ញាធរក្រុងបានលុងក៏ធ្លាប់បានប្រកាសថា អាជ្ញាធរបានបង្ក្រាបហើយ ចំពោះទីតាំងល្បែងស៊ីសងច្រើនប្រភេទដែលបង្កការភ្ញាក់ផ្អើលដល់មហាជនទូទៅ ក្នុងរយៈពេលប៉ុន្មានថ្ងៃកន្លងមកនេះ។

ពាក់ព័ន្ធករណីខាងលើនេះ លោក ធូ ឃឿ អភិបាលក្រុងបានលុងបានប្រាប់អ្នកសារព័ត៌មាន នៅព្រឹកថ្ងៃទី ០៦ ខែមីនានេះថា បានបង្ក្រាបហើយ ដោយលោកជាប់រវល់ប្រជុំ មិនបានប្រាប់អំពីលទ្ធផលនោះឡើយ។

បើតាមលោក ហួត បូរី អធិការនគរបាលក្រុងបានលុងមិនបានឆ្លើយតបនោះទេឬបំភ្លឺជូនអ្នកសារព័ត៌មានទេ។​នេះបើតាមប្រភពដែលយើងទទួលបានបន្ថែម។

ជុំវិញករណីខាងលើនេះ ឯកឧត្ដម​ ញ៉ែម សំអឿន អភិបាលខេត្តរតនគិរី បានប្រាប់ នៅព្រឹក ថ្ងៃទី០៦ ខែមីនានេះថា លោកបានបញ្ជាឲ្យអាជ្ញាធរក្រុងបានលុងចុះទៅបង្ក្រាបកាលពីម្សិលមិញម្ដងរួចមកហើយ និងបានប្រាប់ព្រឹកនេះទៀត ឲ្យចុះទៅបង្ក្រាប ពីព្រោះលោកមិនចូលចិត្តបញ្ហាល្បែងស៊ីសងនេះដែរ​និងបានលាន់មាត់ថា កោតតែគេហ៊ានហ្ន៎! ។

បើតាមប្រភពផ្សេងទៀតបានខ្សឹបខ្សៀវថា ម្ចាស់វង់ល្បែងស៊ីសងបានដាក់ទុនវិនិយោគច្រើន ដូច្នេះមិនអាចបញ្ចប់ ឬបញ្ឈប់សកម្មភាពដោយងាយៗនោះទេ។ ប៉ុន្តែគេទទួលស្គាល់ថា ទីតាំងដែលបានបើកដំណើរការរយៈពេល២ថ្ងៃកន្លងមក គឺបាមទាក់ទាញបានអតិថិជនរាប់រយនាក់មកលេងកម្សាន្តស្រែកហ៊ោរកញ្ជ្រៀវ ហើយក៏បាននិងកំពុងរៀបចំទីតាំងថ្មីទៀតដែរ៕