រដ្ឋមន្ត្រី កែវ រតនៈ៖ សង្គ្រាមដែលកំពុងផ្ទុះឡើងនៅមជ្ឈិមបូព៌ា បានបង្កឱ្យមានការព្រួយបារម្ភជាសកល ជុំវិញតម្លៃប្រេងឥន្ធន: និងឧស្ម័ន

(ភ្នំពេញ)៖  «សង្គ្រាមដែលកំពុងផ្ទុះឡើងនៅមជ្ឈិមបូព៌ា បានបង្កឱ្យមានការព្រួយបារម្ភជាសកល ជុំវិញតម្លៃប្រេងឥន្ធន: និងឧស្ម័ន ដែលការណ៍នេះ អាចនឹងជះឥទ្ធិពលមកដល់កម្ពុជា ខណៈការផ្គត់ផ្គង់វិញ នៅមិនទាន់មានសញ្ញាណាមួយ ដែលប៉ះពាល់ភ្លាមៗឡើយ»។ នេះជាការគូសបញ្ជាក់របស់  ឯកឧត្តម កែវ រតនៈ រដ្ឋមន្ត្រីក្រសួងរ៉ែ និងថាមនៅក្នុងបទសម្ភាសន៍ជាមួយអ្នកសារព័ត៌មាន ក្នុងឱកាសចូលរួមកិច្ចប្រជុំកំពូលធុរកិច្ចអាស៊ាន-កម្ពុជា ឆ្នាំ២០២៦ុ។

ឯកឧត្តមរដ្ឋមន្ត្រីបានបន្តថា ប្រេងឥន្ធន: និងឧស្ម័ន ប្រមាណជាង២០% ត្រូវបានចរាចរណ៍ ឆ្លងកាត់តំបន់មជ្ឈិមបូព៌ា ពោលតាមច្រកសមុទ្រ Hormuz ខណៈដែលថ្មីៗនេះ ប្រទេសអ៊ីរ៉ង់ បានប្រកាស គំរាមកំហែង បាញ់នាវាណា ដែលឆ្លងកាត់តាមតំបន់នេះ ដែលនឹងប៉ះពាល់ភ្លាមៗតែម្តង ដល់ការផ្គត់ផ្គង់ប្រេងអន្តរជាតិទាំងមូល មិនមែនតែកម្ពុជានោះទេ ពោលទាំងអឺរ៉ុប, ចិន និងឥណ្ឌាជាដើម សុទ្ធតែប៉ះពាល់ ហើយទាំងអស់នេះ គឺជាអ្វីដែលជាការព្រួយបារម្ភរបស់ពិភពលោក ក៏ដូចជាការព្រួយបារម្ភរបស់កម្ពុជាផងដែរ ។

ឯកឧត្តមបានពន្យល់ថា ប្រទេសកម្ពុជា ក៏ដូចជាប្រទេសជាច្រើនទៀតក្នុងតំបន់និងពិភពលោក គឺជាប្រទេសដែលនាំចូលថាមពល ជាពិសេសប្រេង និងឧស្ម័នតែម្តង ដែលកត្តានេះ នឹងនាំឱ្យតម្លៃប្រេង មានការហក់ឡើង។ ឯកឧត្តមរដ្ឋមន្ត្រីបានបង្ហាញការព្រួយបារម្ភជារួមថា បើទោះមិនប៉ះពាល់ជាមួយនឹងការផ្គត់ផ្គង់យ៉ាងណាក៏ដោយ ក៏ប៉ុន្តែតម្លៃប្រេងឥន្ធន: ក្នុងការនាំចូលមកកម្ពុជា និងមានការកើនឡើង ខណៈបច្ចុប្បន្នតម្លៃនៅមិនទាន់មានការប្រែប្រួល ក៏ប៉ុន្តែនឹងអាចមានការហក់ឡើង នៅពេលដែលការនាំចូលប្រេងថ្មី (ស្តុកថ្មី) មកដល់។

ឯកឧត្តម កែវ រតនៈ បានគូសបញ្ជាក់ថា ដោយសារតែជាកង្វល់រួមរបស់ពិភពលោក រួមទាំងកម្ពុជាផងនោះ ទើបគ្រប់បណ្តាប្រទេសទាំងអស់ បានអំពាវនាវ ឱ្យគូភាគីក្នុងជម្លោះ ឆាប់ងាកទៅរកតុចរចា ដើម្បីរកសន្តិភាពឡើងវិញ ពីព្រោះសង្គ្រាម នឹងប៉ះពាល់ទាំងអស់គ្នា៕ ប្រភព៖ ក្រសួងព័ត៌មាន