ក្រោយពលរដ្ឋរាយការណ៍ពីក្លិនស្អុយចេញពីរោងចក្រកែច្នៃផ្លែឈើហ្គូប៊ីនហ្វេន នៅស្រុកភ្នំស្រួច មន្ត្រីក្រសួងបរិស្ថានចុះពិនិត្យ ណែនាំឱ្យក្រុមហ៊ុនរៀបចំអាងប្រព្រឹត្តកម្មសំណល់រាវឡើងវិញ
(កំពង់ស្ពឺ)៖ ក្រុមការងារអធិការកិច្ច នៃអគ្គនាយកដ្ឋានគាំពារបរិស្ថាន និងនាយកដ្ឋានវាយតម្លៃហេតុប៉ះពាល់បរិស្ថាន នៅថ្ងៃព្រហស្បតិ៍ ទី៥ ខែមីនា ឆ្នាំ២០២៦នេះ បានចុះត្រួតពិនិត្យក្រុមហ៊ុនកែច្នៃផ្លែឈ្លើហ្គូប៊ីនហ្វេន ស្ថិតនៅភូមិក្រាំងតាតន់ ឃុំអូរ ស្រុកភ្នំស្រួច ខេត្តកំពង់ស្ពឺ ក្រោយពលរដ្ឋរាយការណ៍ថាបង្កបញ្ហាប៉ះពាល់បរិស្ថាន និងមានជះក្លិនស្អុយពីទឹកដែលបង្ហូរចូលស្រះ។
ក្រុមហ៊ុនកែច្នៃផ្លែឈើហ្គូប៊ិនហ្វេន ជារោងចក្រកែច្នៃផ្លែឈើនាំចេញទៅប្រទេសចិន បើកដំណើរការនៅឆ្នាំ២០២៥ មានថៅកែ និងអ្នកគ្រប់គ្រងជាជនជាតិចិន។ ក្នុងរបាយការណ៍កំណត់ហេតុរបស់មន្ត្រីចុះទៅពិនិត្យរោងចក្រ បានរកឃើញថា នៅរោងចក្រមានទឹកសំណល់ស្វាយ (សំណល់រាវ) មិនទាន់សម្អាត ត្រូវបានបង្ហូរចូលស្រះស្តុកចំនួនពីរ និងមានក្លិនស្អុយជាប្រចាំ។ របាយការណ៍បានបញ្ជាក់ទៀតថា ការធ្វើតេស្តទឹកនៅក្នុងស្រះស្តុកទឹកទាំងពីរនេះ ស្រះទី១មានកម្រិត PH ស្មើ ៤.៨១ និងស្រះទី២ មានកម្រិត PH ស្មើនឹង ៤.៧៣។
ក្នុងកំណត់ហេតុបន្តថា សំណល់រាវផ្ទុកដោយក្លិន បានបង្ហូរចេញពីទីតាំងក្រុមហ៊ុន តាមដីទំនាប រួចបន្តចូលតាមប្រឡាយហូរចេញទៅតាមវាលស្រែប្រជាពលរដ្ឋ។ ក្រុមការងារបានយកសំណាកទឹកទៅធ្វើការវិភាគនៅមន្ទីរពិសោធន៍ក្រសួងបរិស្ថាន និងបានធ្វើតេស្តនៅទីតាំងជាក់ស្តែងឃើញកម្រិត PH ស្មើនឹង ៥.០៣។
ក្រោយពីបានពិនិត្យជាក់ស្តែងហើយនោះ ក្រុមការងារក្រសួងបរិស្ថាន បានណែនាំក្រុមហ៊ុនពិនិត្យ និងរៀបចំកែសម្រួលអាងប្រព្រឹត្តិកម្មសំណល់រាវឡើងវិញ ដើម្បីឱ្យមានសមត្ថភាពគ្រប់គ្រាន់ ក្នុងការសម្អាតសំណល់រាវឱ្យឆ្លើយតបនឹងស្តង់ដារឱ្យបានរួចរាល់ មុនថ្ងៃទី៣១ ខែឧសភា ឆ្នាំ២០២៦។
ក្រុមការងារ បានប្រាប់ក្រុមហ៊ុនឱ្យបញ្ឈប់បង្ហូរសំណល់រាវចូលស្រះស្តុក ដែលពុំមានក្រាលកៅស៊ូ ឬចាក់បេតុង ដើម្បីជៀសវាង បង្កបញ្ហាបំពុលបរិស្ថាន និងប៉ះពាល់ដល់ដីស្រែប្រជាពលរដ្ឋចាប់ពីពេលនេះទៅ។
ក្រុមការងារក៏ណែនាំក្រុមហ៊ុនស្នើលិខិតអនុញ្ញាតបញ្ចេញសំណល់ និងរបាយការណ៍បញ្ជាក់គុណភាពខ្យល់ក្នុងអគារ ឱ្យបានរួចរាល់ មុនថ្ងៃទី៣០ ខែមេសា ឆ្នាំ២០២៦។ បន្ថែមពីលើនោះ ក្រុមហ៊ុន ត្រូវរៀបចំបុគ្គលិក ទទួលបន្ទុកផ្នែកគ្រប់គ្រងបរិស្ថានប្រចាំក្រុមហ៊ុន ដោយត្រូវបញ្ជូនឈ្មោះ និងលេខទំនាក់ទំនងទៅក្រសួងបរិស្ថាន ឱ្យបានរួចរាល់ មុនថ្ងៃទី៣០ ខែមេសា ឆ្នាំ២០២៦៕
