លោកស្នងការ ហេង សុផល ផ្ដាំផ្ញើមន្ត្រីថ្មី ត្រូវចៀសឱ្យឆ្ងាយពីគ្រឿងញៀន គោរពវិន័យ បទបញ្ជា ដែលថ្នាក់ដឹកប្រគល់ជូន អនុវត្តឱ្យទទួលបានប្រសិទ្ធភាពខ្ពស់

(កំពង់ធំ)៖ លោកឧត្តមសេនីយ៍ទោ ហេង សុផល បានផ្ដាំផ្ញើមន្ត្រីថ្មីៗត្រូវចៀសឱ្យឆ្ងាយពីគ្រឿងញៀន គោរពវិន័យ បទបញ្ជា ដែលថ្នាក់ដឹកប្រគល់ជូន អនុវត្តឱ្យទទួលបានប្រសិទ្ធភាពខ្ពស់ ចូលរួមអនុវត្តការងារជាប្រចាំថ្ងៃ ប្រកបដោយស្មារតី ទទួលខុសត្រូវ ពង្រីកចំណេះដឹង ពង្រឹងសមត្ថភាព ជាប្រចាំ បង្កើនការងារសាមគ្គីភាព ឯកភាពផ្ទៃក្នុង និងកិច្ចសហការល្អ ជាមួយមន្ត្រីរាជការ មហាជនគ្រប់ស្រទាប់វណ្ណៈ មន្ទីរអង្គភាពជុំវិញខ្លួន។

បណ្ដាំផ្ញើរបស់លោកឧត្តមសេនីយ៍ទោ ហេង សុផល ស្នងការនគរបាលខេត្តកំពង់ធំ នៅក្នុងពិធីសំណេះសំណាល និងប្រគល់ភារកិច្ចមន្ត្រីនគរបាលបំពេញជួសប្រចាំឆ្នាំ២០២៥ ឱ្យទៅបំរើការងារនៅប៉ុស្តិ៍នគរបាលរដ្ឋបាល ឃុំ-សង្កាត់ នៅរសៀលថ្ងៃទី៤ ខែមីនា ឆ្នាំ២០២៦។

លោកឧត្តមសេនីយ៍ស្នងការបានជំរុញមន្ត្រីនគរបាលទាំងអស់ ត្រូវអនុវត្តតួនាទីភារកិច្ចឱ្យបានត្រឹមត្រូវដើម្បីបម្រើប្រយោជន៍ប្រជាពលរដ្ឋ។លោកឧត្តមសេនីយ៍ទោ សូមស្វាគមន៍ និងចូលរួមអបអរសាទរចំពោះប្អូនៗទាំង១៣១នាក់ ដែលទទួលបានជ័យលាភី ក្នុងក្របខ័ណ្ឌមន្ត្រីនគរបាលជាតិ នៃស្នងការដ្ឋាននគរបាលខេត្តកំពង់ធំ។

លោកស្នងការពិតជាមានក្ដីសោមនស្សរីករាយយ៉ាងក្រៃលែង ដែលបានជួបសំណេះសំណាលសាកសួរសុខទុក្ខ និងប្រគល់ភារកិច្ច ជូនប្អូនៗ ឱ្យទៅបំរើការងារនៅប៉ុស្តិ៍នគរបាលរដ្ឋបាល តាមមូលដ្ឋានឃុំ-សង្កាត់ទូទាំងខេត្ត សំដៅបង្កើនប្រសិទ្ធភាពការងារឱ្យកាន់តែល្អប្រសើរបន្ថែមទៀត ក្នុងការផ្ដល់សេវាសាធារណៈ និងកិច្ចប្រតិបត្តិការ រក្សាសន្តិសុខ សុវត្ថិភាព សណ្តាប់ធ្នាប់សង្គម ស្របគោលនយោបាយ «ភូមិ-ឃុំ-សង្កាត់ មានសុវត្ថិភាព»៕