អគ្គបណ្ឌិតសភាចារ្យ អូន ព័ន្ធមុនីរ័ត្ន៖ សេដ្ឋកិច្ចកម្ពុជាបានស្ទុះងើបឡើងវិញយ៉ាងរហ័ស និងបន្តឈរលើមាគ៌ានៃកំណើនដ៏រឹងមាំ បន្ទាប់ពីវិបត្តិនៃជំងឺកូវីដ១៩ជាសកល
(កណ្ដាល)៖ ឯកឧត្ដមអគ្គបណ្ឌិតសភាចារ្យ អូន ព័ន្ធមុនីរ័ត្ន បានថ្លែងថា សេដ្ឋកិច្ចកម្ពុជាបានស្ទុះងើបឡើងវិញយ៉ាងរហ័ស និងបន្តឈរលើមាគ៌ានៃកំណើនដ៏រឹងមាំ បន្ទាប់ពីវិបត្តិនៃជំងឺកូវីដ១៩ជាសកល ទោះបីជាត្រូវបន្តពុះពារជម្នះ នូវបញ្ហាប្រឈម និងភាពមិនប្រាកដប្រជាខ្ពស់នៃស្ថានភាពតំបន់ និងសកលដោយសារការបន្តប្រឈមមុខខាងភូមិសាស្រ្តនយោបាយកាន់តែស្រួចស្រាល់, រាប់ទាំងការផ្ទុះឡើងនូវសង្គ្រាមនៅមជ្ឈឹមបូព៌ា នាពេលថ្មីៗនេះ; ការបែកខ្ញែកនៃសេដ្ឋកិច្ចសកល ដែលប៉ះពាល់ដល់កិច្ចសហប្រតិបត្តិការ និង ពាណិជ្ជកម្មអន្តរជាតិ; ការងើបមកវិញនៃនិន្នាការឯកតោភាគីនិយម ភាពមិនច្បាស់លាស់នៃទស្សនវិស័យកំណើនសេដ្ឋកិច្ច នៃ បណ្តាប្រទេស និងតំបន់ជាដៃគូពាណិជ្ជកម្មសំខាន់ៗរបស់កម្ពុជា ការប្រែប្រួលអាកាសធាតុ។
ការថ្លែងរបស់ឯកឧត្ដមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រី ក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តកណ្តាល នៅថ្ងៃទី០៤ ខែមិនា ឆ្នាំ២០២៦នេះ ក្នុងពិធីសម្ពោធដាក់ឲ្យប្រើប្រាស់ជាផ្លូវការនូវ «អគារថ្មីមួយខ្នង នៃមន្ទីរពេទ្យបង្អែកជ័យជម្នះ ក្រុងតាខ្មៅខេត្តកណ្តា»។
ឯកឧត្ដមអគ្គបណ្ឌិតសភាចារ្យបានបញ្ជាក់ថា ក្នុងរយៈពេលជិត៣ទសវត្សរ៍ចុងក្រោយ តាមរយៈការខិតខំឥតស្រាកស្រាន្ត និងការកែទម្រង់មុតស្រួចឥតងាករេ លើគ្រប់វិស័យរបស់រាជរដ្ឋាភិបាល ក្រោមការដឹកនាំដ៏ឈ្លាសវៃ ប្រកបដោយជវភាព និងភាពប្រាកដនិយមរបស់សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្រ្តី និងបច្ចុប្បន្នជាប្រធានព្រឹទ្ធសភានិងការបន្តវេនដឹកនាំដ៏ត្រឹមត្រូវ និងប៉ិនប្រសប់ប្រកបដោយចក្ខុវិស័យវែងឆ្ងាយរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា សម្រាប់នីតិកាលទី៧នេះ នៃរដ្ឋសភា កម្ពុជាបន្ដសម្រេចបាននូវសមិទ្ធផលដ៏ធំធេងជាច្រើន និងបានផ្លាស់ប្ដូរមុខមាត់ គួរជាទីមោទនៈ ដោយរក្សាបានយ៉ាងគត់មត់ នូវស្ថិរភាពនយោបាយ សណ្តាប់ធ្នាប់សង្គម សន្តិសុខ សុវត្ថិភាព ព្រមទាំងធានាបានយ៉ាងរឹងមាំ នូវការអភិវឌ្ឍសង្គមសេដ្ឋកិច្ច និងស្ថិរភាពម៉ាក្រូសេដ្ឋកិច្ច និងហិរញ្ញវត្ថុសាធារណៈ។
ក្នុងដំណាក់កាលថ្មីនៃការបន្តខិតខំអភិវឌ្ឍប្រទេស ចាប់តាំងពីដើមនីតិកាលទី៧នេះ នៃរដ្ឋសភា រាជរដ្ឋាភិបាលបានដាក់ចេញ និងកំពុងជំរុញអនុវត្តនូវយុទ្ធសាស្ត្រ បញ្ចកោណដំណាក់កាលទី១ ទន្ទឹមគ្នានឹងកម្មវិធីគោលនយោបាយអាទិភាពចំនួន៦និងវិធានការគន្លឹះចំនួន៥ សំដៅខិតខំជម្នះឲ្យបាន នូវបញ្ហាប្រឈម និងសម្របខ្លួនទៅនឹងការប្រែប្រួលនៃសភាពការណ៍ដែលកើតឡើងជាបន្ដបន្ទាប់ និងដំណាលៗគ្នា ដោយតម្រូវឲ្យរាជរដ្ឋាភិបាលចាត់វិធានការអន្តរាគមន៍ឲ្យបានទាន់ពេល និងចំទិសដៅប្រកបដោយប្រសិទ្ធភាព និងស័ក្តិសិទ្ធិភាពខ្ពស់សំដៅ ម្ខាងន្តរក្សានូវចលនការនៃការអភិវឌ្ឍសង្គម-សេដ្ឋកិច្ច ជារួម និងម្ខាងទៀត ប្រែក្លាយបញ្ហាប្រឈមទាំងនេះ ឲ្យក្លាយទៅជាកាលានុវត្តភាព តាមរយៈការបន្តពង្រឹងភាពប្រកួតប្រជែង ភាពរឹងមាំ និងភាពធន់ទៅនឹងវិបត្តិ ការកែលម្អបរិយាកាសធុរកិច្ច ការបន្តធ្វើពិពិធកម្មសេដ្ឋកិច្ច ការពង្រឹងលទ្ធភាពលើកកម្ពស់ខ្សែច្រវាក់ផលិតកម្មក្នុងស្រុក សំដៅជំរុញការតភ្ជាប់ ទៅនឹង ខ្សែច្រវាក់ផលិតកម្ម ក្នុងតំបន់ និងសកល ការចាប់យកសកម្មភាពផលិតកម្មដែលបង្កើតតម្លៃបន្ថែមខ្ពស់, ការបង្កើតការងារកាន់តែច្រើន សម្រាប់កម្លាំងពលកម្មដែលមានជំនាញមធ្យម និងខ្ពស់ ការពង្រីកមូលដ្ឋានសេដ្ឋកិច្ចជាតិ ឲ្យកាន់តែទូលំទូលាយ។ សំដៅឈានទៅសម្រេចបាននូវ «ចក្ខុវិស័យកម្ពុជា ឆ្នាំ២០៥០»។
ជាលទ្ធផល ទោះបីត្រូវប្រឈមនឹងភាពមិនប្រាកដប្រជាកាន់តែស្រួចស្រាល់ ក្នុងបរិការណ៍សកលក៏ដូចជាត្រូវប្រឈមនឹងការគម្រាម និងការរំលោភលើអធិបតេយ្យជាតិ និងបូរណភាពទឹកដីយ៉ាងណាក្តី ក៏សេដ្ឋកិច្ចកម្ពុជា ត្រូវបានរំពឹងថា អាចនឹងសម្រេចបានកំណើន ក្នុងរង្វង់ប្រមាណ ៥,២% ក្នុងឆ្នាំ២០២៥ និងប្រមាណ៥% សម្រាប់ឆ្នាំ ២០២៦នេះ។ កំណើនសេដ្ឋកិច្ចដ៏រឹងមាំប្រកបដោយចីរភាព, ជាពិសេសក្នុងរយៈពេលជាងពីរទសវត្សរ៍មុនការមកដល់នៃវិបត្តិជំងឺកូវីដ១៩ ជាសកល ពិតជាបានរួមចំណែកយ៉ាងសំខាន់ ក្នុងការផ្តល់លទ្ធភាពដល់រាជរដ្ឋាភិបាលម្យ៉ាងក្នុងការបង្កើនការវិនិយោគសាធារណៈ លើហេដ្ឋារចនាសម្ព័ន្ធគ្រប់ប្រភេទ ជាអាទិ៍៖ ផ្លូវថ្នល់ ស្ពាន សាលារៀន មន្ទីរពេទ្យ ប្រព័ន្ធធារាសាស្រ្ត ប្រព័ន្ធទឹកស្អាត បណ្តាញអគ្គិសនី។
ក្នុងការតម្លើងប្រាក់បៀវត្សប្រាក់បំណាច់មុខងារ និងរបបសន្តិសុខសង្គម ជូនមន្រ្តីរាជការស៊ីវិល កងកម្លាំងប្រដាប់អាវុធ និវត្តជន និងមន្រ្តីបុគ្គលិកគ្រប់ប្រភេទ ទន្ទឹមគ្នានឹងការបង្កើនប្រាក់សោធនប្រចាំខែ សម្រាប់អតីតមន្រ្តីរាជការស៊ីវិល និងអតីតយុទ្ធជន។អគ្គបណ្ឌិតសភាចារ្យ អូន ព័ន្ធមុនីរ័ត្ន បានក្រើនរំលឹករដ្ឋបាលខេត្ត រដ្ឋបាលក្រុង-ស្រុក និងឃុំ-សង្កាត់ ក្រុមការងាររាជរដ្ឋាភិបាល ចុះមូលដ្ឋានខេត្ត និងតាមបណ្តាក្រុង-ស្រុក, គណៈបញ្ជាការឯកភាពគ្រប់លំដាប់ថ្នាក់ ថ្នាក់ដឹកនាំ, ក្រុមគ្រូពេទ្យ និង បុគ្គលិក នៃមន្ទីរពេទ្យបង្អែកជ័យជម្នះ បន្តយកចិត្តទុកដាក់ លើការងារសំខាន់មួយចំនួន ដូចខាងក្រោម៖
*ទី១. ទោះបីសភាពការណ៍ និងសន្តិសុខសណ្តាប់ធ្នាប់សង្គម ជារួម ក្នុងខេត្តកណ្តាល និង តាមបណ្តាក្រុង-ស្រុក ត្រូវបានគ្រប់គ្រងល្អហើយក្តី, ក៏រដ្ឋបាលខេត្ត, ក្រុង-ស្រុក, ឃុំ-សង្កាត់ និង អាជ្ញាធរគ្រប់លំដាប់ថ្នាក់ ត្រូវបន្តយកចិត្តទុកដាក់ខ្ពស់ ក្នុងការថែរក្សាសន្តិសុខ, សុវត្ថិភាព និង សណ្តាប់ធ្នាប់សាធារណៈ ឲ្យបានគត់មត់ ជាប្រចាំ ។ ទន្ទឹមនេះ, រដ្ឋបាលខេត្ត, ក្រុង-ស្រុក, ឃុំ-សង្កាត់ និង កងកម្លាំងមានសមត្ថកិច្ចគ្រប់លំដាប់ថ្នាក់ ក៏ត្រូវបន្តជំរុញ អនុវត្តគោលនយោបាយ «ភូមិ-ឃុំ-សង្កាត់ មានសុវត្ថិភាព» ដើម្បីលើកកម្ពស់ការចូលរួម បង្ការ, ទប់ស្កាត់ និង បង្ក្រាបបទល្មើសនានា ឲ្យកាន់តែមានប្រសិទ្ធភាពខ្ពស់បន្ថែមទៀត ជាអាទិ៍៖ អំពើលួច-ឆក់-ប្លន់, ល្បែងស៊ីសងខុសច្បាប់, ការប្រើប្រាស់ និង ការជួញដូរ គ្រឿងញៀនខុសច្បាប់, បទល្មើសឆបោកតាមប្រព័ន្ធបច្ចេកវិទ្យាព័ត៌មាន, និង សកម្មភាពក្មេងទំនើងគ្រប់រូបភាព ។
*ទី២. ការផ្តល់សេវាសាធារណៈ គឺជាកិច្ចការអាទិភាព ក្នុងកម្មវិធីនយោបាយ របស់រាជ- រដ្ឋាភិបាល ក្នុងនីតិកាលទី ៧ នេះ នៃរដ្ឋសភា, ដែលត្រូវបន្តលើកកម្ពស់, ទាំងគុណភាព និង ប្រសិទ្ធភាព ។ ហេតុដូច្នេះ, រដ្ឋបាលខេត្ត, ក្រុង-ស្រុក និង ឃុំ-សង្កាត់ ត្រូវបន្តលើកកម្ពស់ការផ្តល់សេវាសាធារណៈគ្រប់ប្រភេទ ឲ្យបានកាន់តែរហ័ស និង ងាយស្រួល សម្រាប់ប្រជា-ពលរដ្ឋគ្រប់រូប ស្របតាមគោលការណ៍, ស្តង់ដា, បែបបទ និង នីតិវិធី ជាធរមាន, ប្រកបដោយស្មារតីទទួលខុសត្រូវ, ប្រសិទ្ធភាព, តម្លាភាព និង គណនេយ្យភាព, ដើម្បីឆ្លើយតបទៅនឹងតម្រូវការរបស់បង-ប្អូនប្រជាពលរដ្ឋ ដែលបន្តកើនឡើង ពីមួយថ្ងៃទៅមួយថ្ងៃ ស្របពេលដែលប្រទេសយើង កំពុងមានការរីកចម្រើនយ៉ាងរហ័ស។ ត្រង់ចំណុចនេះ, ខ្ញុំក៏សូមស្នើសុំថ្នាក់ដឹកនាំ, មន្ត្រី-បុគ្គលិក និង ក្រុមគ្រូពេទ្យគ្រប់ជាន់ថ្នាក់ នៃមន្ទីរពេទ្យបង្អែកជ័យជម្នះ រួមសហការគ្នាស្អិតល្មួត ក្នុងការផ្ដល់សេវាពិនិត្យ និង ព្យាបាលអ្នកជំងឺ ដោយយកចិត្តទុកដាក់ខ្ពស់បំផុត, បន្តអភិវឌ្ឍចំណេះ និង ពង្រឹងជំនាញបច្ចេកទេស របស់ ខ្លួន ស្របតាមស្តង់ដាវិទ្យាសាស្រ្តទំនើប, ពង្រឹងគុណភាពនៃការធ្វើរោគវិនិច្ឆ័យ ឲ្យបានកាន់ តែសុក្រឹត្យ តាមស្ដង់ដាបច្ចេកទេសសុខាភិបាល, លើកកម្ពស់ក្រមសីលធម៌វិជ្ជាជីវៈ ក្នុងការពិនិត្យព្យាបាល ក៏ដូចជា ក្នុងការប្រាស្រ័យទាក់ទងជាមួយអ្នកជំងឺ, និង បង្កលក្ខណៈងាយស្រួលជាអតិបរមា ដល់អ្នកជំងឺគ្រប់រូបដែលមកទទួលសេវាសុខាភិបាល នៅទីនេះ។
*ទី៣. រដ្ឋបាលខេត្ត, ក្រុង-ស្រុក, និង ឃុំ-សង្កាត់ ត្រូវបន្តជំរុញការអភិវឌ្ឍហេដ្ឋារចនា-សម្ព័ន្ធរូបវន្តចាំបាច់នានា សម្រាប់បម្រើដល់សកម្មភាពសេដ្ឋកិច្ច, ការវិនិយោគ, ការធ្វើ-ពាណិជ្ជកម្ម, ទេសចរណ៍ និង ការប្រកបមុខរបរខ្នាតតូច របស់ប្រជាពលរដ្ឋ, ពិសេស ត្រូវគិតគូរ និង លើកទឹកចិត្ត ដល់សហគ្រាសធុនមីក្រូ, តូច និង មធ្យម ក៏ដូចជា វិស័យកសិកម្ម និង កសិ-ឧស្សាហកម្ម ដែលជាវិស័យចម្បងរបស់ខេត្ត, សំដៅបង្កើនការងារ និង ប្រាក់ចំណូល របស់ប្រជាពលរដ្ឋ, កាត់បន្ថយភាពក្រីក្រ, ជំរុញកំណើនសេដ្ឋកិច្ច និង រួមចំណែកជាមួយរាជរដ្ឋាភិបាល ក្នុងការអភិវឌ្ឍសង្គម-សេដ្ឋកិច្ច ប្រកបដោយចីរភាព និង បរិយាបន្ន, នេះម៉្យាង; និង ម៉្យាងទៀត, ត្រូវខិតខំទាក់ទាញការវិនិយោគ និង ការបណ្តាក់ទុន ប្រកបអាជីវកម្មនានា ពីគ្រប់ប្រភពស្របច្បាប់ទាំងឡាយ ដើម្បីចូលរួមជំរុញការអភិវឌ្ឍខេត្ត ឲ្យកាន់តែមានសន្ទុះខ្លាំងក្លាបន្ថែមទៀត ។
ទី៤. ក្នុងកាលៈទេសៈពិសេសបច្ចុប្បន្ន ដែលជាតិយើង ត្រូវរួមគ្នាជាឆ្លុងមួយ ក្នុងការ-តស៊ូប្រយុទ្ធប្រឆាំងនឹងការរំលោភបំពាន លើអធិបតេយ្យជាតិ និង បូរណភាពទឹកដី, ខ្ញុំស្នើសុំរដ្ឋបាលខេត្ត, ក្រុង-ស្រុក, ឃុំ-សង្កាត់, គណៈបញ្ជាការឯកភាពគ្រប់លំដាប់ថ្នាក់, ក៏ដូចជា បង-ប្អូនប្រជាពលរដ្ឋទូទៅពីគ្រប់មជ្ឈដ្ឋាន បន្តចូលរួមលើកកម្ពស់ស្មារតីសាមគ្គីភាព និង ឯកភាពជាតិរឹងមាំ ជុំវិញរាជរដ្ឋាភិបាល, ក្រោមការដឹកនាំដ៏ត្រឹមត្រូវ និង ឈ្លាសវៃ របស់ សម្តេចមហាបវរធិបតី ហ៊ុន ម៉ាណែត, នាយករដ្ឋមន្រ្តី នៃព្រះរាជាណាចក្រកម្ពុជា ។ កម្លាំងសាមគ្គីភាព និង ឯកភាពជាតិ ដ៏រឹងមាំរបស់យើងទាំងអស់គ្នា ជាប្រជាជនខ្មែរ ពិតជាមានសារៈសំខាន់ និង មិនអាចខ្វះបាន ដើម្បីជម្នះនូវបញ្ហាប្រឈមផងទាំងពួង ដោយជោគជ័យ, រួមទាំងបញ្ហាព្រំដែន ផងដែរ ។
ទី៥. បន្ទាប់ពីយើងបានកសាងអគារថ្មី ដ៏ស្រស់ស្អាត និង ធំទូលាយ នេះហើយ, ខ្ញុំសង្ឃឹមថា ថ្នាក់ដឹកនាំ, មន្រ្តី-បុគ្គលិក និង ក្រុមគ្រូពេទ្យ នៃមន្ទីរពេទ្យបង្អែកជ័យជម្នះ ដែលបម្រើការងារនៅទីនេះ នឹងយកចិត្តទុកដាក់ខ្ពស់ ក្នុងការថែរក្សាអនាម័យ និង សោភ័ណភាពនៃអគារទាំងមូល ឲ្យបានល្អ និង ស្អាតយូរអង្វែង, ដូចដែល សម្តេចតេជោប្រធានព្រឹទ្ធសភា តែងតែក្រើនរំលឹកយើងទាំងអស់គ្នាថា៖ ការទទួលបានសមិទ្ធផលថ្មី គឺជារឿងល្អ; ប៉ុន្តែ, អ្វីដែលសំខាន់ និង កាន់តែត្រូវយកចិត្តទុកដាក់នោះគឺ៖ ការថែរក្សា និង ការប្រើប្រាស់សមិទ្ធផលទាំងនោះ ឲ្យបានគង់វង្សយូរអង្វែង៕
