សម្ដេចបវរធិបតី ហ៊ុន ម៉ាណែត៖ កម្ពុជាបានរៀបចំខ្លួនរួចជាស្រេចជាដៃគូយុទ្ធសាស្ត្រ ក្នុងចំណោមប្រទេសជាសមាជិកអាស៊ាន

(ភ្នំពេញ)៖ សម្ដេចបវរធិបតី ហ៊ុន ម៉ាណែត បានថ្លែងថា «នៅក្នុងក្របខ័ណ្ឌតំបន់នេះ, កម្ពុជាបានរៀបចំខ្លួនរួចជាស្រេចជាដៃគូយុទ្ធសាស្ត្រ ក្នុងចំណោមប្រទេសជាសមាជិកអាស៊ាន។ កម្ពុជាបានផ្ដល់អត្ថប្រយោជន៍ជាយុទ្ធសាស្ត្រសម្រាប់វិនិយោគិន ដែលមានកំណើន៥,២% ក្នុងឆ្នាំ២០២៥ ជាមួយនឹងការព្យាករណ៍ថា នឹងបន្តសម្រេចអត្រាកំណើនរឹងមាំ ក្នុងរយៈពេលមធ្យម ដែលការណ៍នេះបង្កើតឱ្យមានកាលានុវត្តភាពដ៏សម្បើម សម្រាប់ធុរកិច្ច និងការវិនិយោគ».

ការថ្លែងបែបនេះរបស់សម្ដេចបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា នៅថ្ងៃទី៤ ខែមីនា ឆ្នាំ២០២៦នះ នាឱកាសដែលសម្ដេចនាយករដ្ឋមន្ត្រី អញ្ជើញជាអធិបតីភាពដ៏ខ្ពង់ខ្ពស់បើកកិច្ចប្រជុំកំពូលធុរកិច្ច​អាស៊ាន​កម្ពុជាឆ្នាំ២០២៦ នៅសណ្ឋាគារសូហ្វីតែលភ្នំពេញ។

សម្ដេចនាយករដ្ឋមន្ត្រីបានថ្លែងបន្តថា កម្ពុជាប្តេជ្ញាចិត្ត ចំពោះរបៀបវារៈគាំទ្រធុរកិច្ច ដែលកាត់បន្ថយឧបសគ្គ និងបង្កើនល្បឿនទៅកាន់ទីផ្សារ ឱ្យបានជាអតិបរមា។ សម្ដេចបន្ថែមថា រំហូររវិនិយោគចូលទៅក្នុងតំបន់អាស៊ាន បានកើនឡើង ៨.៥%ទៅដល់ទំហំ ២២៦ពាន់លានដុល្លារអាម៉េរិក ដែលជាលទ្ធផលផ្ទាល់កើតចេញពីការប្តេជ្ញាចិត្ត ចំពោះការធ្វើសមាហរណកម្ម និងការធ្វើសុខដុមនីយកម្ម ហេដ្ឋារចនាសម្ព័ន្ធរូបវ័ន្ត និងឌីជីថលក្នុងតំបន់។

សម្ដេចបវរធិបតីបានរំលេចថា៖ «នៅក្នុងក្របខ័ណ្ឌតំបន់នេះ, កម្ពុជាបានរៀបចំខ្លួនរួចជាស្រេចជាដៃគូយុទ្ធសាស្ត្រ ក្នុងចំណោមប្រទេសជាសមាជិកអាស៊ាន។ កម្ពុជាបានផ្ដល់អត្ថប្រយោជន៍ជាយុទ្ធសាស្ត្រសម្រាប់វិនិយោគិន ដែលមានកំណើន៥,២% ក្នុងឆ្នាំ២០២៥ ជាមួយនឹងការព្យាករណ៍ថា នឹងបន្តសម្រេចអត្រាកំណើនរឹងមាំ ក្នុងរយៈពេលមធ្យម ដែលការណ៍នេះបង្កើតឱ្យមានកាលានុវត្តភាពដ៏សម្បើម សម្រាប់ធុរកិច្ច និងការវិនិយោគ»។​

ប្រមុខរាជរដ្ឋាភិបាលកម្ពុជាបានបញ្ជាក់ថា ដើម្បីឱ្យប្រតិបត្តិការធុរកិច្ច អាចមានប្រសិទ្ធភាពចំណាយ និងភាពធន់ យ៉ាងពិតប្រាកដបាន ទាមទារឱ្យមានការធ្វើពិពិកម្មមូលដ្ឋានធុរកិច្ច កម្ពុជាបំពេញបន្ថែមដល់មូលដ្ឋានឧស្សាហកម្ម ក្នុងប្រទេសជាសមាជិកអាស៊ាន ជាមួយនឹងការផ្តល់ជូននូវការពង្រីកខ្សែច្រវាក់ផ្គត់ផ្គង់តំបន់ ប្រកបដោយភាពរលូន និងការប្រើប្រាស់បច្ចេកវិទ្យា។

បន្ថែមពីនេះ ចាប់តាំងពីការចូលរួមជាមួយអាស៊ានក្នុងឆ្នាំ១៩៩៩ មក, កម្ពុជា បានខិតខំយ៉ាងសកម្ម ក្នុងការកាត់បន្ថយរបាំងពាណិជ្ជកម្ម និងការធ្វើទំនើបកម្មក្របខ័ណ្ឌគយ និងឡូជីស្ទីក។ យើងទទួលស្គាល់ថា, ក្នុងពិភពនៃធុរកិច្ច, ប្រសិទ្ធភាព គឺជារូបិយប័ណ្ណដ៏ចម្បង។ ក្នុងស្មារតីនេះ, សម្ដេចនាយករដ្ឋមន្ត្រី បានគូសបញ្ជាក់ថា «រាជរដ្ឋាភិបាលកម្ពុជា ផ្ដល់ជូននូវភាពជាម្ចាស់កម្មសិទ្ធិ ១០០% ដល់វិនិយោគិនបរទេស និង បានធ្វើឌីជីថលូបនីយកម្មពេញលេញនូវបរិយាកាសគតិយុត្ត និងនីតិវិធី។ កម្ពុជាប្តេជ្ញាចិត្ត ចំពោះរបៀបវារៈគាំទ្រធុរកិច្ច ដែលកាត់បន្ថយឧបសគ្គ និងបង្កើនល្បឿនទៅកាន់ទីផ្សារ ឱ្យបានជាអតិបរមា»។

សម្ដេច ហ៊ុន ម៉ាណែត បានថ្លែងបន្តថា គោលនយោបាយសេដ្ឋកិច្ចជាតិរបស់កម្ពុជា ត្រូវបានរៀបចំឡើងស្របតាម យុទ្ធសាស្តបញ្ចកោណ ដែលជាផែនទីបង្ហាញផ្លូវសម្រាប់រយៈពេល ២៥ឆ្នាំ ឆ្ពោះទៅរកការសម្រេចបាននូវចក្ខុវិស័យឆ្នាំ២០៥០។ យុទ្ធសាស្ត្រនេះ ត្រូវបានបង្កើតឡើង ដោយឈរសសរស្ដម្ភចំនួន៥ រួមមាន ៖ មនុស្ស, ផ្លូវ, ទឹក, ភ្លើង, និង បច្ចេកវិទ្យា។

កម្ពុជាបានផ្តល់អាទិភាពដល់បច្ចេកវិទ្យា ជាសមាសធាតុស្នូលនៃគោលនយោបាយជាតិ ដោយសារកំណើនដែលមានតម្លៃបន្ថែមខ្ពស់ មិនអាចបំបែកចេញពីភាពចាស់ទុំផ្នែកឌីជីថល (Digital Maturity) បានឡើយ។ បច្ចុប្បន្ន, កម្ពុជាបាននិងកំពុងអនុវត្តគម្រោង «បដិវត្តកម្មជំនាញ» ដ៏ធំមួយ តាមរយៈកម្មវិធីអប់រំបណ្ដុះបណ្ដាលបច្ចេកទេស និងវិជ្ជាជីវៈ (TVET) សម្រាប់យុវជនចំនួន ១,៥លាននាក់។

ជាមួយគ្នានេះ សម្ដេច បានបន្តដែរថា ដោយមានកិច្ចសហការជាមួយមេដឹកនាំឧស្សាហកម្ម ដូចជា ក្រុមហ៊ុន Toyota, កម្ពុជា ធានាថាកម្លាំងពលកម្មរបស់យើង មិនត្រឹមតែត្រៀមខ្លួនរួចជាស្រេច ក្នុងការបំពេញការងារប៉ុណ្ណោះទ ប៉ុន្តែថែមទាំងអនុលោមតាមតម្រូវការ ក្នុងបដិវត្តន៍ឧស្សាហកម្មទី៤ ផងដែរ។ កម្ពុជា កំពុងលុបគម្លាតរវាងទ្រឹស្តីសិក្សា និងស្តង់ដារឧស្សាហកម្ម ដើម្បីផ្ដល់ជូនវិស្វករ និងអ្នកជំនាញឯកទេសចាំបាច់ សម្រាប់រោងចក្រ និងគ្រឿងបរិក្ខារទំនើបរបស់វិនិយោគិន។ សម្ដេចនាយករដ្ឋមន្ត្រីបានបន្ថែមថា ស្របតាមនិន្នាការ និងស្ថានការណ៍ដែលកំពុងវិវឌ្ឍ និងលេចចេញឡើងថ្មី, រាជរដ្ឋាភិបាលបានសម្រួច យុទ្ធសាស្ត្របញ្ចកោណ – ដំណាក់កាលទី ១ និងបានដាក់ចេញនូវកម្មវិធីលើកកម្ពស់ភាពប្រកួតប្រជែង បង្កើនពិពិធកម្ម និងពង្រឹងភាពធន់ ដើម្បីជំរុញកំណើនសេដ្ឋកិច្ច នៅក្នុងបរិការណ៍សកល ដែលមានភាពមិនប្រាកដប្រជាខ្ពស់ របស់រាជរដ្ឋាភិបាលនីតិកាលទី ៧ នៃរដ្ឋសភា ដែលមានសសរស្ដម្ភចំនួន ៣ រួមមាន ៖ (១) កម្មវិធីគាំទ្រសេដ្ឋកិច្ចតាមវិស័យ សម្រាប់រយៈពេលខ្លី និងមធ្យម; (២) កម្មវិធីលើកកម្ពស់ភាពប្រកួតប្រជែង បង្កើនពិពិធកម្ម និងពង្រឹងភាពធន់ និង (៣) កម្មវិធីសម្របខ្លួនទៅនឹងការប្រែប្រួលរបបពាណិជ្ជ-កម្មអន្តរជាតិ៕