កម្លាំងប៉ូលិសស្រុកស្អាងចុះពិនិត្យមើលជាក់ស្ដែងអត់ឃើញមានឧបករណ៍ ឬសម្ភារ ក្នុងការប្រព្រឹត្តល្បែងសុីសងខុសច្បាប់នោះទេ!

(កណ្ដាល)៖ ក្រោយមានការបង្ហោះរូបភាពនៅលើបណ្ដាញសង្គម ភ្ជាប់ជាមួយខ្លឹមសារថា៖ ទីតាំងមាន់ជល់តាម laptop មួយកន្លែងដែលស្ថិតនៅចំណុចស្ពានលេខ37 ភូមិព្រែកអំបិល ស្រុកស្អាង ខេត្តកណ្តាល ប្រជាពលរដ្ឋសំណូមពរដល់លោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាល សូមមានវិធានការនិងទប់ស្កាត់ល្បែងស៊ីសងខាងលើផង ដើម្បីភូមិឃុំមានសុវត្ថិភាព។

ដោយអនុវត្តតាមបទបទបញ្ជាលោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាល លោកវរសេនីយ៍ឯក រស់ ចន្ថា អធិការនគរបាលស្រុកស្អាង បានបញ្ជាកម្លាំងផ្នែកជំនាញស្រុកស្អាង និងប៉ុស្តិ៍នគរបាលរដ្ឋបាលព្រែកអំបិល ចុះធ្វើការស្រាវជ្រាវបង្រ្កាបករណីខាងលើនេះ។

ជាលទ្ធផល នៅថ្ងៃទី០១ ខែមីនា ឆ្នាំ២០២៦ កម្លាំងផ្នែកជំនាញ និងប៉ុស្តិ៍នគររដ្ឋបាលព្រែកអំបិល បានចុះស្រាវជ្រាវដល់ទីតាំងដែលបានចុះផ្សាយ ជាផ្ទះលក់បាយកាហ្វេមានម្ចាស់ឈ្មោះ ពៅ សុខហេង ភេទប្រុស អាយុ៤៩ឆ្នាំ ស្ថិតនៅភូមិព្រែកតាទាវ ឃុំព្រែកអំបិល ស្រុកស្អាង ខេត្តកណ្ដាល។

តាមការពិនិត្យជាក់ស្តែង ពុំឃើញមានឧបករណ៍ ឬសម្ភារ ក្នុងការប្រព្រឹត្តល្បែងសុីសងខុសច្បាប់នោះទេ ហើយតាមការបំភ្លឺរបស់ម្ចាស់ផ្ទះបានឱ្យដឹងថា កន្លងមកធ្លាប់មានក្រុមហ៊ុនឆ្នោតជួលដាក់ប្រាកដមែន ប៉ុន្តែបច្ចុប្បន្នរូបគាត់មិនបានជួលឱ្យទៀតទេ ចាប់តាំងពីមានការ ផ្សព្វផ្សាយបទបញ្ជាថ្នាក់ដឹកនាំមិនឱ្យមានការជួល ឬផ្តល់ទីតាំងលេងល្បែងស៊ីសងខុសច្បាប់គ្រប់ប្រភេទរួចមក។

ពាក់ព័ន្ធករណីខាងលើនេះ កម្លាំងសមត្ថកិច្ចជំនាញបានអប់រំណែនាំបន្ថែមដល់ម្ចាស់ផ្ទះមិនឱ្យមានបើក ឬជួលលួចលាក់លេងល្បែងសុីសងខុសច្បាប់គ្រប់ប្រភេទ ជាដាច់ខាត បើសមត្ថកិច្ចស្រាវជ្រាវឃើញមានការផ្តល់ទីតាំងលេងល្បែងស៊ីសងនៅទីតាំងខាងលើ នឹងបង្រ្កាបចាត់ការតាមនីតិវិធី៕