កូនប្រុសតិរច្ឆានម្នាក់បានទាញកាំបិតខ្វែវកាប់ទៅលើម្តាយបណ្តាលឲ្យរងរបួសធ្ងន់ ត្រូវបានក្រុមប៉ូលិសខេត្តបាត់ដំបងចាប់ឃាត់ខ្លួនហើយ!

(បាត់ដំបង)៖ កូនប្រុសតិរច្ឆានម្នាក់កាលពីថ្ងៃទី២៨ ខែកុម្ភៈ ឆ្នាំ២០២៦ វេលាម៉ោង១៥៖០៣នាទី នៅចំណុចភូមិដំណាក់កកោះ ឃុំគាស់ក្រឡ ស្រុកគាស់ក្រឡ ខេត្តបាត់ដំបងបានប្រើប្រាស់កាំបិតខ្វែវកាប់ទៅលើ់ម្ដាយបង្កើតបណ្ដាលឱ្យរងរបួសដៃខាងឆ្វេងធ្ងន់ត្រូវបានកម្លាំងនគរបាលស្រុកគាស់ក្រឡ ខេត្តបាត់ដំបងចាប់ឃាត់ខ្លួន។

ជនសង្ស័យឈ្មោះ ខ្មិត មៃ ភេទប្រុស អាយុ១៩ឆ្នាំ ត្រូវជាកូនបង្កើត រស់នៅភូមិដំណាក់កកោះ ឃុំគាស់ក្រឡ ស្រុកគាស់ក្រឡ ខេត្តបាត់ដំបងនិងជនរងគ្រោះឈ្មោះ មាស ស្រីយ៉ា ភេទស្រី អាយុ ៤១ឆ្នាំ រស់នៅភូមិ ឃុំខាងលេី។

ក្រោយពេលកើតហេតុ សមត្ថកិច្ចបានទទួលបណ្តឹងពីជនរងគ្រោះ លោកអនុសេនីយ៍ឯក ចាន់ ថានូ អធិការនគរបាលស្រុកគាស់ក្រឡបានដឹកនាំកម្លាំងចុះធ្វើការឃាត់ខ្លួនជនសង្ស័យខាងលើនាំយកមកកាន់អធិការដ្ឋាននគរបាលស្រុកគាស់ក្រឡ ដើម្បីធ្វើការសាកសួរ។

ក្រោយពីសាកសួរមក ជនសង្ស័យខាងលើបានឆ្លើយសារភាពថា ខ្លួនពិតជាបានធ្វើសកម្មភាពកាប់ទៅលើជនរងគ្រោះ នៅត្រង់ចំណុចកើតហេតុ ខាងលើ ពិតប្រាកដមែន។ មូលហេតុដោយសារ ខឹងម្ដាយជេរស្ដី និងប្រេីប្រាស់ថ្នាំញៀន។ វត្ថុតាងដកហូតបាន៖ កាំបិតខ្វែវដងដែក ចំនួន០១។

បច្ចុប្បន្ន ជនសង្ស័យខាងលេីត្រូវសមត្ថកិច្ចជំនាញ កំពុងកសាងសំណុំរឿងបញ្ជូនទៅការិយាល័យជំនាញខេត្ត ដើម្បីចាត់ការបន្តតាមនីតិវិធី៕