ឧបនាយករដ្ឋមន្ត្រី ស សុខា៖ តាមរយៈការបង្ការទប់ស្កាត់ និងការចុះបង្ក្រាបបោសសម្អាត Scams Online មកដល់ម៉ោងនេះ យើងមានប្រមាណជាង២១ម៉ឺននាក់ បានចាកចេញដោយស្ម័គ្រចិត្ដពីកម្ពុជា
(ភ្នំពេញ)៖ ឯកឧត្ដមឧបនាយករដ្ឋមន្ត្រី ស សុខា បានគូសបញ្ជាក់ថា «តាមរយៈការបង្ការទប់ស្កាត់ និងការចុះបង្ក្រាបបោសសម្អាត Scams Online មកដល់ម៉ោងនេះ យើងមានប្រមាណជាង២១ម៉ឺននាក់ បានចាកចេញដោយស្ម័គ្រចិត្ដពីកម្ពុជា និងប្រមាណជាង៣ម៉ឺននាក់ ត្រូវបណ្ដេញចេញ ចាប់បញ្ជូនទៅប្រទេសដើមកំណើតវិញ»។
ការបញ្ជាក់របស់ឯកឧត្ដមឧបនាយករដ្ឋមន្ត្រី ស សុខា រដ្ឋមន្ត្រីក្រសួងមហាផ្ទៃក្នុងពិធីអបអរសាទរ ទិវាជាតិប្រយុទ្ធប្រឆាំងអំពើជួញដូរមនុស្ស ១២ធ្នូ ឆ្នាំ២០២៥ ក្រោមប្រធានបទ «រួមគ្នាដើម្បីកម្ពុជា គ្មាន អំពើជួញដូរមនុស្ស និងគ្មានអំពើឆបោកតាមអនឡាញ» នៅថ្ងៃទី២៥ ខែកុម្ភៈ ឆ្នាំ២០២៦។
ឯកឧត្ដមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ នៅថ្ងៃទី២៥ ខែកុម្ភៈ ឆ្នាំ២០២៦នេះ បានបញ្ជាក់ឲ្យដឹងទៀតថា គិតមកដល់ពេលនេះ មានជនបរទេសជាង៣ម៉ឺននាក់ ត្រូវបានបណ្ដេញចេញពីកម្ពុជា ពាក់ព័ន្ធ Online Scams និងបានបញ្ជូនទៅប្រទេសដើមកំណើត។
ឯកឧត្ដមឧបនាយករដ្ឋមន្ត្រី ស សុខា បានសម្ដែងនូវការអរគុណ ចំពោះបណ្ដាឯកអគ្គរដ្ឋទូតនៅក្នុងប្រទេសកម្ពុជា ដែលជានិច្ចកាលបានចូលរួមសហការយ៉ាងល្អ ជាមួយរាជរដ្ឋាភិបាលកម្ពុជា ក្នុងការសម្របសម្រួល និងទទួលយកនូវជនជាតិរបស់ខ្លួន ដើម្បីបញ្ជូនទៅប្រទេសដើមកំណើត៕
