និស្សិតស្រីឆ្នាំទី១ ម្នាក់ត្រូវបានរថយន្តកុងតឺន័រកិនស្លាប់ភ្លាមៗនៅផ្លូវបេតុងព្រៃស ខណ្ឌដង្កោ!

(ភ្នំពេញ)៖ និស្សិតឆ្នាំទី១ ភេទស្រីម្នាក់ត្រូវរថយន្ត១គ្រឿងមិនចាំម៉ាក កិនស្លាប់ភ្លាមៗ នៅផ្លូវបេតុងព្រៃស សង្កាត់ព្រៃស ខណ្ឌដង្កោ រាជធានីភ្នំពេញ កាលពីវេលាម៉ោង១២៖០០នាទីរសៀល ថ្ងៃទី២៤ ខែកុម្ភះ ឆ្នាំ២០២៦។ សពរងគ្រោះឈ្មោះ អិន សូណា អាយុ១៨ឆ្នាំ មានស្រុកកំណើតនៅភូមិអូតាពុកក្រោម សង្កាត់ទួលរល្វា ក្រុងប៉ៃលិន ខេត្តប៉ៃលិន។

យោងតាមប្រភពព័ត៍មាននៅកន្លែងកើតហេតុបានឱ្យដឹងថា មុនពេលកើតហេតុយុវតីខាងលើ បានជិះម៉ូតូមួយគ្រឿងម៉ាកស្គុបពីព៌ណស ពាក់ផ្លាកលេខ ប៉ៃលិន 1B-2408 ចេញពីផ្ទះយុវជនដែលត្រូវជាសង្សា ដោយធ្វើដំណើរតាមបណ្តោយផ្លូវបេតុងព្រៃស ក្នុងទិសដៅពីលិចទៅកើត លុះដល់ចំនុចកើតហេតុក៏បានចាប់ហ្រ្វាំងបណ្តាលអោយបោកដួលខ្ទាតចូលក្រោមកង់រថយន្តកុងតឺន័រត្រូវរថយន្តកិនចំពាក់កណ្តាលខ្លួនបណ្តាលអោយស្លាប់បាត់បង់ជិវិតភ្លាមៗនៅកន្លែងកើតហេតុ. ចំណែកអ្នកបើកបររថយន្តបានព្យាយាមបើករថយន្តរត់គេចខ្លួនដល់ចំនុចមុខរោងចក្រស្រាបៀ ត្រូវបានសមត្ថកិច្ចស្រាវជ្រាវនិងឃាត់ខ រថយន្តម៉ាកHYUNDIA ព៍ណឈាមជ្រូកពាក់ផ្លាកលេខព្រៃវែង 3-2635 និងអ្នកបើកបររថយន្តខាងលើ មានឈ្មោះ ផាត ផេន ភេទប្រុស អាយុ២២ឆ្នាំយកមកធ្វើការសាកសួរនិងចាត់ការតាមនិតិវិធី។

ក្រោយពេលកើតហេតុសមត្ថកិច្ចមូលដ្ឋានប៉ុស្តិនគរបាលព្រៃស សហការជាមួយកម្លាំងជំនាញនគរបាលចរាចរណ៍ខណ្ឌដង្កោ និងកម្លាំងជំនាញការិយាល័យនគរបាលចរាចរណ៍ជើងគោកស្នងការនគរបាលរាជធានីភ្នំពេញ ចុះមកធ្វើការវាស់វែងនិងពិនិត្យកាំម៉ារ៉ាសុវត្ថិភាពនៅទីតាំងកើតហេតុខាងលើ និងយករថយន្តនិងម៉ូតូទៅរក្សាទុកដើម្បីដោះស្រាយគ្នាតាមផ្លូវច្បាប់នៅពេលក្រោយ។

ចំណែកសពយុវតីរងគ្រោះខាងលើសមត្ថកិច្ចបានធ្វើកំណត់ហេតុប្រគល់ទៅអោយក្រុមគ្រួសារដឹកយកទៅធ្វើបុណ្យតាមប្រពៃណី៕