ជនជាតិអង់គ្លេស២នាក់ រត់ពន្ធកញ្ឆាក្រៀមឆ្លងដែនពីថៃមកកម្ពុជា ត្រូវបានតុលាការសម្រេចផ្តន្ទាទោសពី ១០ឆ្នាំទៅ ១៤ឆ្នាំ!

(ភ្នំពេញ)៖ ប្រធានក្រុមប្រឹក្សាចៅក្រមជំនុំជម្រះសាលាដំបូងរាជធានីភ្នំពេញ លោក ទិត្យសុធី បូរ៉ាឆាត និងដោយមានទាំងលោក ទុង រតនា ជាតំណាងអយ្យការ នៅព្រឹកថ្ងៃទី២៤ ខែកុម្ភៈ ឆ្នាំ២០២៦ បានដំណើការសវនាការ ដើម្បីប្រកាសសាលក្រមលើសំណុំរឿងជនជាតិអង់គ្លេស២នាក់ ករណីរត់ពន្ធកញ្ឆាក្រៀមឆ្លងដែនពីថៃមកកម្ពុជា ដោយសម្រេចផ្តន្ទាទោសពី ១០ឆ្នាំទៅ ១៤ឆ្នាំ។

ពិរុទ្ធជនទាំង២នាក់ រួមមាន៖ ទី១៖ ឈ្មោះ Hogg Jordan James ដាក់ពន្ធនាគារចំនួន១០ឆ្នាំ និងពិន័យ១០លានរៀល។ ទី២៖ ឈ្មោះ Crellciran Ashey Stepen ដាក់ពន្ធនាគារ១៤ឆ្នាំ និងពិន័យ១៤លានរៀល។

គួរបញ្ជាក់ថា បុរសជនជាតិអង់គ្លេសទាំង២នាក់នេះ ត្រូវកម្លាំងសមត្ថកិច្ចនគរបាលនៃមន្ទីរប្រឆាំងបទល្មើសគ្រឿងញៀនចាប់ខ្លួនកាលពីថ្ងៃទី១៧ ខែមិថុនា ឆ្នាំ២០២៥ ក្រោយរកឃើញជាប់ពាក់ព័ន្ធករណីរត់ពន្ធកញ្ឆាក្រៀម ជិត២០គីឡូក្រាម ពីប្រទេសថៃ តាមអាកាសយានដ្ឋានអន្តរជាតិភ្នំពេញ ដែលប្រតិបត្តិការនេះធ្វើឡើងដោយអនុវត្ដតាមបទបញ្ជានាយឧត្តមសេនីយ៍ ស ថេត អគ្គស្នងការនគរបាលជាតិ។

ជាលទ្ធផល កម្លាំងជំនាញបានរកឃើញវត្ថុតាងកញ្ឆាក្រៀមចំនួន២២ដុំ ស្មើនឹងទម្ងន់១៩គីឡូ ៩០២ក្រាម៕