អ្នកសារព័ត៌មានត្រូវបាន កោះហៅ ឃាត់ខ្លួន ចាប់ខ្លួន និងឃុំខ្លួន បានកើតមានឡើងជាបន្តបន្ទាប់ ការធ្វើបែបនេះ មិនអនុលោមតាមច្បាប់ស្តីពីរបបសារព័ត៌មាន បង្កឱ្យប៉ះពាល់ដល់គោលនយោបាយរាជរដ្ឋាភិបាល
(ភ្នំពេញ)៖ សហភាពសហព័ន្ធអ្នកសារព័ត៌មានកម្ពុជាបានកត់សម្គាល់ជាមួយក្តីកង្វល់ ដោយសារសង្កេតឃើញថា អ្នកសារព័ត៌មាន ត្រូវបានកោះហៅ ឃាត់ខ្លួន ចាប់ខ្លួន និងឃុំខ្លួន បានកើតមានឡើងជាបន្តបន្ទាប់។ ការធ្វើបែបនេះ គឺមិនអនុលោមតាមច្បាប់ស្តីពីរបបសារព័ត៌មាន ដែលមានជាធរមាន និងបង្កឱ្យប៉ះពាល់ដល់គោលនយោបាយ រាជរដ្ឋាភិបាល ដែលកំពុងខិតខំប្រឹងប្រែងកសាងសង្គមជាតិមួយប្រកបដោយ នីតិរដ្ឋ និងមានសុខដុមរមនា។ ផ្ទុយទៅវិញ ការអនុវត្តដូចខាងលើ បានបង្កើតជារូបភាពឱ្យទៅបរទេសចាប់យកជាមូលដ្ឋានធ្វើជារបាយការណ៍ នឹងវាយតម្លៃចោទប្រកាន់ដោយអយុត្តិធម៌មកលើរាជរដ្ឋាភិបាលកម្ពុជា ថាបំភិតបំភ័យ បំបាក់ស្មារតី និងធ្វើទុក្ខបុក ម្នេញលើសេរីភាពសារព័ត៌មាននិងសិទ្ធិបញ្ចេញមតិ។ ជាមួយគ្នា កម្មវិបាកដែលជះមកវិញនិងមិនគួរមើលរំលងគឺ ជាការធ្វើឱ្យរេចរឹលជំនឿលើការអនុវត្តច្បាប់ និងដាក់បន្ទុកបង្កការលំបាកដល់ រាជរដ្ឋាភិបាល ចំពោះសាធារណមតិ ទាំងក្នុងប្រទេស និងមុខមាត់កម្ពុជា នៅលើឆាកអន្តរជាតិ។ នេះបើតាមសេចក្តីថ្លែងការណ៍របស់សហភាពសហព័ន្ធអ្នកសារព័ត៌មានកម្ពុជាដែលអង្គភាពព័ត៌មានទទួលបាននៅថ្ងៃទី១៩ ខែកុម្ភៈ ឆ្នាំ២០២៦នេះ។
សហភាពសហព័ន្ធអ្នកសារព័ត៌មានកម្ពុជាក៏បានកត់សម្គាល់ឃើញទៀតថា នីតិវិធីនិងរបៀបរបបនៃការអនុវត្តលើ ករណីមួយចំនួន បានឃ្លាតឆ្ងាយពី «គោលការណ៍សច្ចធារណ៍នៃនិរទោស» ដែលជាគោលការណ៍ច្បាប់ជាមូលដ្ឋាន និងជាសិទ្ធិមួយ ដែលត្រូវបានការពារតាមច្បាប់ជាតិ និងច្បាប់អន្តរជាតិផងដែរ ហើយដែលមិនគួរបន្តឱ្យកើតមា ទៀតឡើយ។ ការមិនអនុលោមតាមគោលការណ៍ខាងលើ មិនមែនជាវិធីដោះស្រាយបញ្ហាដោយសន្តិវិធី ត្រឹមត្រូវ និងស្របតាមស្មារតីច្បាប់នោះទេ ប៉ុន្តែជាការបង្កើតសំណួរបន្ថែម និងជាការពង្រីកបញ្ហាបន្ថែម ព្រមទាំងបានធ្វើឱ្យ ប៉ះពាល់ដល់កិត្តិយសសេចក្តីថ្លៃថ្នូររបស់បុគ្គល, ប៉ះពាល់ដល់កិត្តិយសរបស់ក្រុមគ្រួសារសាច់ញាតិ, ប៉ះពាល់ គោលការណ៍នីតិរដ្ឋ, និងសំខាន់ជាងនេះគឺប៉ះពាល់ដល់មុខមាត់រាជរដ្ឋាភិបាលនិងប្រទេសជាតិ។
ទន្ទឹមនោះ សហភាពសហព័ន្ធអ្នកសារព័ត៌មានកម្ពុជាសូមអំពាវនាវដល់សមត្ថកិច្ចពាក់ព័ន្ធ រួមទាំងមន្ត្រីអនុវត្តច្បាប់ផងដែរ សូមពិចារណាឡើងវិញអំពីវិធីសាស្ត្រអនុវត្តនីតិវិធីសម្រាប់ការដោះស្រាយបញ្ហា។ ជាមួយគ្នា សហភាពសហព័ន្ធ អ្នកសារព័ត៌មានកម្ពុជា ក៏សូមក្រើនរំលឹកដល់អ្នកសារព័ត៌មាន ឱ្យប្រកាន់ខ្ជាប់ជានិច្ចនូវក្រមសីលធម៌វិជ្ជាជីវៈ ដែល ជាអាវក្រោះដ៏ចាំបាច់ និងជាស្នូលនៃជំនឿ។ ជាថ្មីម្តងទៀត សហភាពសហព័ន្ធអ្នកសារព័ត៌មានកម្ពុជា សូមអំពាវនាវ ដ៏ទទូចដល់ផ្នែកពាក់ព័ន្ធ ឱ្យយកចិត្តទុកដាក់ និងងាកមកប្រើប្រាស់ «ច្បាប់ស្តីពីរបបសារព័ត៌មាន» សម្រាប់ជា មូលដ្ឋានចាត់ការលើវិវាទទាំងឡាយ ដែលពាក់ព័ន្ធសេរីភាពសារព័ត៌មាន ដោយមិនគួរមើលរំលងចំពោះច្បាប់ នេះឡើយ។ សហភាពសហព័ន្ធអ្នកសារព័ត៌មានកម្ពុជា ត្រៀមខ្លួនផ្តល់ការពិគ្រោះយោបល់ជូនភាគីពាក់ព័ន្ធអំពី ទិដ្ឋភាពច្បាប់និងវិស័យពាក់ព័ន្ធ ដើម្បីរួមគ្នាកែលម្អស្ថានភាពនេះ។ សូមចងចាំថា ពិន្ទុនិងតម្លៃសង្គមកម្ពុជា គឺជា តម្លៃរួមរបស់យើងទាំងអស់គ្នា។
គួរជម្រាបជូនថា សហភាពសហព័ន្ធអ្នកសារព័ត៌មានកម្ពុជាមានឯកឧត្ដម ហ៊ុយ វណ្ណៈ រដ្ឋលេខាធិការទីស្ដីការគណៈរដ្ឋមន្ត្រី ជាប្រធាន៕
