សាហាវនិងតិរច្ឆានមែន! កូនប្រុសទាញកាំបិតកាប់ម្ដាយពីក្រោយស្លាប់ក្នុងថ្លុកឈាម ព្រោះខឹងសុំលុយ១០០០រៀល មិនបាន នៅកំពង់ស្ពឺ!

(កំពង់ស្ពឺ)៖ មន្ត្រីនគរបាលស្រុកភ្នំស្រួចឲ្យដឹងនៅថ្ងៃទី១៩ ខែកុម្ភៈនេះថា នៅថ្ងៃទី១៨ ខែកុម្ភៈ ឆ្នាំ២០២៦ វេលាម៉ោង១៣៖១០នាទី នៅចំណុចភូមិព្រៃឫស្សី ឃុំជាំសង្កែ ស្រុកភ្នំស្រួច មានករណីឃាតកម្មមួយកើត ឡើងដោយកូនប្រើកាំបិតប៉័ងតោកាប់សម្លាប់ម្ដាយ។

ជនសង្ស័យឈ្មោះ នឿន ណែត ហៅខ្នែត ភេទប្រុស អាយុ២២ ឆ្នាំ រស់នៅភូមិឃុំខាងលើ បានយកកាំបិតប៉័ងតោកាប់ពីខាងខ្នងលើម្ដាយបង្កើតឈ្មោះ យួន ផាន អាយុ ៤៧ឆ្នាំ រស់នៅផ្ទះជាមួយគ្នា ចំសៀតផ្កាលើត្រចៀកខាងស្ដាំ ចំនួន០១កាំបិត បណ្ដាលឲ្យស្លាប់។

ប្រភពថា មុនពេលកើតហេតុជនសង្ស័យនៅផ្ទះតែ២នាក់ម្ដាយ ពេលដែលជនសង្ស័យកំពុងដេកអង្រឹង ហើយបានសុំលុយម្ដាយ១០០០រៀល យកទៅទិញបារីជក់ តែម្ដាយមិនឲ្យហើយថែមទាំងស្ដីបន្ទោសមិនជួយធ្វើការងារ។ ពេលនោះជនសង្ស័យបានដើរទៅយកកាំបិតប៉័ងតោនៅលើតុកាប់លើម្ដាយ។ ពេលធ្វើសកម្មភាពរួច បានបោះកាំបិតចោលនិងបានដើរមកដេកនៅក្នុងអង្រឹងនៅមុខផ្ទះ ចំណែកម្ដាយជាជនរងគ្រោះបានដើរចូលទៅក្នុងផ្ទះ។ លុះដល់ម៉ោង១៤៖២០នាទី ថ្ងៃដដែល ឪពុកត្រឡប់មកពីកាប់អុសវិញ បានដើរចូលក្នុងផ្ទះទើបឃើញម្ដាយរបស់ខ្លួនដេកស្លាប់នៅក្នុងផ្ទះបាត់ទៅហើយ។

ក្រោយពេលកើតហេតុកម្លាំងសមត្ថកិច្ចទទួលព័ត៌មានចុះដល់កន្លែងកើតហេតុ និងបានហៅជនសង្ស័យឈ្មោះ នឿន ណែត ហៅ ខ្នែត មកសាកសួរ។ ជនសង្ស័យបានឆ្លើយសារភាពថា រូបខ្លួនពិតជាបានធ្វើសកម្មភាពយកកាំបិតប៉័ងតោកាប់សម្លាប់ម្ដាយប្រាកដមែន។

ជនសង្ស័យបានបញ្ជាក់អំពីមូលហេតុថា សុំលុយម្ដាយចំនួន១០០០រៀល យកទៅទិញបារី តែម្ដាយមិនឱ្យ ថែមទាំងស្ដីបន្ទោសថែមទៀត។

បច្ចុប្បន្នកម្លាំងជំនាញកំពុងកសាងសំណុំរឿងចាត់ការតាមនីតិវិធីច្បាប់៕