លោក ផែង វណ្ណៈ ប្រកាសឱ្យមេធាវីជួយរៀបចំពាក្យបណ្ដឹង ប្ដឹងលោក ឈុន ភារម្យ ជាមេបញ្ជាការរងកងរាជអាវុធហត្ថស្រុកអូរជ្រៅ ពីបទជេរប្រមាថជាសាធារណៈ និងគំរាមកំហែង ប្រជាពលរដ្ឋ
(ភ្នំពេញ)៖ អ្នកលេងបណ្ដាញសង្គមដ៏ល្បីមួយរូបនិងជាចាងហ្វាងការផ្សាយ «Pheng Vannak News» លោក ផែង វណ្ណៈ នៅព្រឹកថ្ងៃទី១៧ ខែកុម្ភៈ ឆ្នាំ២០២៦នេះ បានប្រតិកម្មយ៉ាងខ្លាំងចំពោះការជេរប្រមាថនិងគំរាមកំហែងមកលើរូបលោកយ៉ាងធ្ងន់ធ្ងរពីលោក ឈុន ភារម្យ ដែលគេស្គាល់ថា ជាមេបញ្ជាការរងកងរាជអាវុធហត្ថស្រុកអូរជ្រៅ ខេត្តបន្ទាយមានជ័យ។ នេះបើតាមប្រភពដែលអង្គភាពព័ត៌មាន The Mirror News ទទួលបាននៅព្រឹកថ្ងៃទី១៧ ខែកុម្ភៈ ឆ្នាំ២០២៦នេះ។
បើយោងតាមការបង្ហោះសាររបស់លោក ផែង វណ្ណៈ នៅលើបណ្ដាញសង្គមបានបញ្ជាក់ឱ្យដឹងថា «លោក ឈុន ភារម្យ ជាមេបញ្ជាការរងកងរាជអាវុធហត្ថស្រុកអូរជ្រៅ បានយករូបថតខ្ញុំទៅបង្ហោះ ជេរប្រមាថតាមចិត្ត ទាំងខ្ញុំមិនដែលស្គាល់គាត់ ហេីយ មិនដែលមានបញ្ហាអ្វីជាមួយគាត់។ ខ្ញុំសម្រេចអោយមេមេធាវីរៀបចំពាក្យបណ្ដឹងប្ដឹងលោក ឈុន ភារម្យ ពីបទជេរប្រមាថជាសាធារណៈ និងគំរាមកំហែង ប្រជាពលរដ្ឋ»។
បើតាមអ្វីដែលនៅលើគណនីហ្វេសប៊ុកឈ្មោះ «ឈុន ភារម្យ» បានបង្ហោះសារជាច្រើនលើកច្រើនសារដោយប្រើប្រាស់ពាក្យសម្ដីជេរប្រមាថនិងគំរាមកំហែងនិងបានភ្ជាប់រូបភាពលោក ផែង វណ្ណៈ ជាមួយខ្លឹមសារ ដូចជា៖ «សមរភូមិប្រយុទ្ធមិនខ្លាចផង! អញខ្លាចអែង អា ផែង វណ្ណះ ចង់ ឈ្លើយ? អញឈ្លើយជាងអែង, ខ្ញុំបាទ អ/ធ ឈុន ភារម្យ អត្តលេខ046674 បច្ចុឡ មេបញ្ជាររង អហ ស្រុកអូរជ្រៅធ្លាប់រៀនសូត្យជាច្រើនសាលាយោធា! (រាជបណ្ឌិតយោធា) ហើយរៀនច្រើនទៀត? សង្គ្រាមផ្ទុះឡើងបងប្អូនរបស់ខ្ញុំឆេះឡាន ជាច្រើនគ្រឿងទៀត ហើយ ពលី ! ចំណែកខ្ញុំឆេះសញ្ញាបត្រ័ អត់ ស្តាយសោះ ? ហេតុអ្វីអា ផែង វណ្ណះ សូម ឆ្លើយ? ,ស្រាថ្លៃ តែមនុស្សថោក(អាផែង វណ្ណៈ) អញមិនចង់ឈ្លើយទេ) ណាត់ គ្នាបានតើ ok? ,ចេះខឹងដែរ? ឈប់ទៅអាថោកទាប អាកំណើតឆ្កែ សមរភូមិប្រយុទ្ធមិនខ្លាចផង! អញខ្លាចអែង អា ផែង វណ្ណះ ចង់ ឈ្លើយ? អញឈ្លើយជាងអែង, ពួកខ្ញុំអត់មានស្រាល្អ ស្រាថ្លៃផឹកទេ បើអែង(ផែង វណ្ណៈ)) ផឹកឲ ឆ្កួតចុះ»។
គួរជម្រាបជូនថា កាលពីថ្ងៃទី១៦ ខែកុម្ភៈ ឆ្នាំ២០២៦ លោក ផែង វណ្ណៈ បានបង្ហោះសារជាលក្ខណៈឯកជននៅក្នុងទំព័រហ្វេសប៊ុកផ្ទាល់លោកថា «ស្រាមិនទាន់បើកគម្របទេ តែម្ចាស់ធ្លាក់ភ្នែកហើយ!»។
ជុំវិញករណីខាងលើនេះ លោក ផែង វណ្ណៈ បានបញ្ជាក់ឱ្យអង្គភាព The Mirror News បានដឹងនៅព្រឹកថ្ងៃទី១៧ ខែកុម្ភៈ ឆ្នាំ២០២៦នេះថា លោកនឹងឱ្យមេធាវីជួយរៀបចំពាក្យប្ដឹងលោក ឈុន ភារម្យ នៅក្រោយចូលឆ្នាំចិនរួច ព្រោះគាត់ជាមន្ត្រី ហើយលោកក៏មិនដែលមានរឿងអ្វីជាមួយលោក ឈុន ភារម្យ ដែរ។ លោកបានបន្តថា ម្សិលមិញលោកគ្រាន់តែបង្ហោះរូបលេងសើចធម្មតាក្នុងប្រូហ្វាលហ្វេសប៊ុកឯកជនរបស់លោក ហើយលោកគ្រាន់តែសរសេរថា «ស្រាមិនទាន់បើកគម្របទេ តែម្ចាស់ធ្លាក់ភ្នែកហើយ!» លោកបានសរសេរតែប៉ុណ្ណឹង គឺមិនបានប៉ះពាល់អ្វីលោក ឈុន ភារម្យ ទេ ស្រាប់តែលោក ឈុន ភារម្យ យករូបលោកទៅជេរប្រមាថលើលោកគ្រប់យ៉ាងដោយលោកមិនបានដឹងរឿងផង ។ លោកបន្ថែមថា និយាយឱ្យចំ លោកមិនដែលបានស្គាល់លោក ឈុន ភារម្យ នោះទេ។
លោក ផែង វណ្ណៈ បានបន្ថែមទៀតថា ចូលឆ្នាំចូលខែ លោកគ្រាន់តែសរសេរលេងសើចជាលក្ខណៈធម្មតា ប៉ុន្តែលោកមិនដឹងថា តើលោក ឈុន ភារម្យ ខឹងលោក និងមានកំហឹងនឹងលោករឿងអ្វីនោះទេ ព្រោះលោកអត់បានដឹងរឿង ស្រាប់តែគាត់ចូលមកជេរលោក ដោយក្នុងនាមលោក ឈុន ភារម្យ ជាមន្ត្រីតែបែរជាចូលទៅជេរលោកជាប្រជាជនវាមិនទំនងនោះទេ។
ទាក់ទិនករណីខាងលើនេះ លោក ឈុន ភារម្យ ជាមេបញ្ជាការរងកងរាជអាវុធហត្ថស្រុកអូរជ្រៅ ខេត្តបន្ទាយមានជ័យបានប្រាប់ឱ្យអង្គភាពព័ត៌មាន The Mirror News ដឹងតាមឆាតហ្វេសប៊ុក (Messenger) យ៉ាងខ្លីថា «បាទអត់មានអីទេ អរគុណ»៕
