ឯកឧត្ដមសាស្រ្តាចារ្យរដ្ឋមន្ត្រី ឈាង រ៉ា ផ្តល់អនុសាសន៍មួយចំនួនដល់ក្រុមការងារបច្ចេកទេសសុខាភិបាល ថ្នាក់ក្រសួង និងថ្នាក់រាជធានី ខេត្ត ត្រូវយកចិត្តទុកដាក់ក្នុងការអនុវត្តផែនការសកម្មភាពការងាររបស់ខ្លួន ក្នុងឆ្នាំ២០២៦នេះ

(ភ្នំពេញ)៖ ឯកឧត្ដមសាស្រ្តាចារ្យរដ្ឋមន្ត្រី ឈាង រ៉ា បានផ្តល់អនុសាសន៍មួយចំនួនដល់ក្រុមការងារបច្ចេកទេសសុខាភិបាល ថ្នាក់ក្រសួង និងថ្នាក់រាជធានី ខេត្ត ត្រូវយកចិត្តទុកដាក់ក្នុងការអនុវត្តផែនការសកម្មភាពការងាររបស់ខ្លួន ក្នុងឆ្នាំ២០២៦នេះ រួមមាន៖ *១៖ បន្តពង្រឹងគុណភាព និងប្រសិទ្ធភាពកិច្ចដំណើរការប្រជុំរបស់ក្រុមការងារបច្ចេកទេសសុខាភិបាល។ *២៖ ពង្រឹងបណ្តាញទំនាក់ទំនង និងផ្តល់ការគាំទ្រដល់ក្រុមការងារបច្ចេកទេសសុខាភិបាលរាជធានី-ខេត្ត (Pro-TWGH) ដោយតាមរយៈការកំណត់នូវយន្តការប្រាស្រ័យទំនាក់ទំនងច្បាស់លាស់។ *៣៖ ក្រុមការងារបច្ចេកទេសសុខាភិបាលរាជធានី-ខេត្ត (Pro-TWGH) ត្រូវធ្វើបច្ចុប្បន្នកម្មព័ត៌មានស្តីពីការគាំទ្ររបស់ដៃគូអភិវឌ្ឍន៍ និងអង្គការមិនមែនរដ្ឋាភិបាល។ *៤៖ នាយកដ្ឋានសហប្រតិបត្តិការអន្តរជាតិ ត្រូវពិនិត្យ និងរៀបចំឡើងវិញ វេទិកាដៃគូសុខាភិបាល (Health Partners Forum) ដែលបានខកខានតាំងពីអំឡុងនៃការរាតត្បាតនៃជំងឺកូវីដ-១៩។

ការផ្ដល់អនុសាសន៍ខាងលើ់របស់ឯកឧត្ដមសាស្ដ្រាចារ្យ  ឈាង រ៉ា រដ្ឋមន្ដ្រីក្រសួងសុខាភិបាល និងជាប្រធានក្រុមការងារបច្ចេកទេសសុខាភិបាល ក្នុងឱកាសអញ្ជើញជាអធិបតីភាព ក្នុងពិធីបើកកិច្ចប្រជុំពិនិត្យលទ្ធផលប្រចាំឆ្នាំ២០២៥ និងផែនការសកម្មភាពឆ្នាំ២០២៦ ដោយបានការចូលរួមពីរដ្ឋលេខាធិកា អនុរដ្ឋលេខាធិការ មន្ទីរសុខាភិបាលរាជធានី ខេត្ត និងអង្គការដៃគូអភិវឌ្ឍន៍ សរុបចំនួន ៧១រូប នាថ្ងៃទី១៣ ខែកុម្ភៈ ឆ្នាំ២០២៦។

ឯកឧត្ដមសាស្រ្តាចារ្យរដ្ឋមន្ត្រីបានស្នើដល់ថ្នាក់ដឹកនាំ មន្ដ្រី បុគ្គលិកសុខាភិបាលទាំងអស់ ត្រូវពង្រឹងកិច្ចសហប្រតិបត្តិការភាពជាដៃគូ រួមគ្នាកសាងអនាគត ប្រកបដោយភាពធន់ និងចីរភាពនៃវិស័យសុខាភិបាល ដើម្បីសុខភាពប្រជាជនកម្ពជា ឆ្ពោះទៅរកការគ្របដណ្តប់សុខភាពជាសាកល (UHC)។ ឯកឧត្ដមបន្ដថា «សូមឱ្យមន្ដ្រីបុគ្គលិកយើងទាំងអស់ រួមទាំងអង្គការដៃគូពាក់ព័ន្ធ ពង្រឹងកិច្ចសហការប្រតិបត្ដិការគ្នាឱ្យបានកាន់ប្រសើរ ពិសេសគឺសូមផ្ដោតទៅលើសុខភាពរបស់ប្រជាជនជាចម្បង ដើម្បីឆ្ពោះទៅរកការគ្របដណ្តប់សុខភាពជាសាកល (UHC)»។

ឯកឧត្ដមសាស្ដ្រាចារ្យ  ឈាង រ៉ា បានសម្តែងនូវការកោតសរសើរដល់អង្គការដៃគូអភិវឌ្ឍន៍សុខាភិបាលទាំងអស់ ជាពិសេសអង្គការសុខភាពពិភពលោក ជាតំណាងដៃគូអភិវឌ្ឍន៍ ដែលបានបន្តបម្រើសេវាជូនប្រជាពលរដ្ឋ ក្នុងការឆ្លើយតបទៅនឹងតម្រូវការជាក់ស្តែង ដោយមានយុទ្ធសាស្រ្តច្បាស់លាស់ និងមានភាពម៉ឹងម៉ាត់ពោរពេញដោយទឹកចិត្តស្រឡាញ់ ក្នុងការបំពេញការងារតាមវិស័យរៀងៗខ្លួន។

គួរជម្រាបថា កិច្ចប្រជុំនេះ គឺផ្តោតលើការពិភាក្សាជុំវិញបញ្ហាសំខាន់ៗ លើការពិនិត្យវឌ្ឍនភាពការងារប្រចាំឆ្នាំ២០២៥ និងដាក់ចេញទិសដៅយុទ្ធសាស្ត្រសម្រាប់ឆ្នាំ២០២៦ រួមមាន៖ ១) របាយការណ៍ប្រចាំឆ្នាំ ២០២៥ និងការវិភាគស្ថានភាព (SWOT) ២) ប្រតិទិនក្រុមការងារបច្ចេកទេសសុខាភិបាល ២០២៦ ដែលភ្ជាប់ជាមួយផែនការយុទ្ធសាស្ត្រសុខាភិបាល និងសូចនាករតាមដានរួម (JMIs) ៣) ផែនការសកម្មភាពសម្រាប់ដំណើរទស្សនកិច្ច គាំទ្រដល់ក្រុមការងារបច្ចេកទេសសុខាភិបាលថ្នាក់ (TWGH ឆ្នាំ ២០២៦ ៤) ការវាយតម្លៃវឌ្ឍនភាព បញ្ហាប្រឈម និងវិធានការអាទិភាពទាក់ទងនឹងសូចនាករតាមដានរួម។

ក្រសួងសុខាភិបាល​ប្តេជ្ញាបន្តកិច្ចសហការយ៉ាងជិតស្និទ្ធជាមួយអង្គការដៃគូអភិវឌ្ឍន៍ ក្នុងស្មារតីរួបរួមសាមគ្គី តម្កល់ផលប្រយោជន៍រួម គោរពវិន័យការងារ ក្រមសីលធម៌វិជ្ជាជីវៈ ព្រមទាំងអនុវត្តយន្តការប្រឹក្សាជាប្រចាំ ដើម្បីធានាការអភិវឌ្ឍវិស័យសុខាភិបាល ដើម្បីធានាការបម្រើសេវាប្រកប ដោយគុណភាព សុវត្ថិភាព ប្រសិទ្ធភាព ស័ក្តិសិទ្ធភាព និងសមធម៌ ជូនដល់ប្រជាពលរដ្ឋកម្ពុជាគ្រប់រូប៕